Ge bahɛ te ba tin' yire bo mam
25
1 Te Na'ayenɛ yele Moses yeti, 2 Yele Israeldoma la zan'an te ba tare bo'olom na bo mam. Nɛra se'em suunre n tɔgɛ te a bo la, bama bo'olom te n bɔta. 3 Bo'olom sebo te ho wan to'ohe ba zen'an dela sanlema la sanlenpeelega la nyɔgom la 4 guno n de sɔbele pɔɔnhegɔ la mɔlɔgɔ la mɔle mɛŋka la tan' peele soma la boohe konberɔ la 5 peraahe gana n vɛɛn la gana n ane soŋa la zaaŋa dɔɔrɔ la 6 kaam n wan tara lameha butoleladoma la nyɛga se'a n wan tara soa kaam la ko'ɛnka n tara nyuŋo soŋɔ la 7 kuga ponpɔnrɔsabelega la kugusoma te ya kerehɛ a, te ya lamenɛ toolom fugiriga la nyɔn'ɔn zuo funiho la. 8 Ge bahɛ te ba tin' Sogorɛ bo mam, te n ta'an bɔna la ya. 9 Tin' ya Sogorɛ wa, la ko lɔgɔseto woo n wan bɔna ko poan la, doohe mam n yeti n pa'alɛ ho se'em wa.10 Dekɛ zaaŋa dɔɔrɔ maalɛ nɔbiŋere daka, te ka woko dɛna santira ayi' la girigo, te ka yaleŋa dɛna santire la girigo, te ka saazuo woko me dɛna santire la girigo. 11 Dekɛ sanlema ma'an takɛ daka wa poan, la ka yeŋa zan'an, ge kure sanlema kɔkɛ dɛ kenkɛlehe la kae. 12 Kure sanlema banhe senaahe tuhe ka na'ma anaahe la poan, seyi' bɔna loge dena, te seyi' me bɔna loge dena. 13 Peehe zaaŋa dɔɔrɔ, wogoro ge dekɛ takɛ tɔ la sanlema. 14 Dekɛ dɔɔrɔ la tuhe banhe la n boe loga la poan la yɔgɔrɔ la poan, te ba tara dɔɔ tonɔ ziira daka la. 15 Dɔɔ tonɔ kɔ'ɔn bɔna banhe la n boe daka la na'ma poan la bala, to ka tara foore daka la poan. 16 Dekɛ ya mam nɔze'elego kuga wa te n wan bo ho la eŋɛ nɔbiŋere daka wa poan.
17 Dekɛ ya sanlema ma'an kure liŋa, te ka dɛna be'em duuhego zen'an, te ka woko dɛna santira ayi', la girigo, te ka yaleŋa dɛna santire, la girigo. 18 Ge dekɛ sanlema kure kelompagehedoma bayi', dekɛ ba yagelɛ liŋa la nɔya ayi' la zuo.a 19 Dekɛ ayema yagelɛ liŋa la nɔɔrɛn de zuo, te ayema ma yaga nɔɔrɛ deyema la me zuo. Dekɛ sanlema yene kure kelompagehedoma wa, la liŋa la dɛna boyena, te ba yaga liŋa la nɔya ayi' la zuo. 20 Kure kelompagehedoma te ba suga liŋa la zuo, te ba nɛhe tɔ taaba, zenga ba kelompagehe la saazuo, yeregɛ se pin' liŋa la, ge sura beha liŋa la zuo, 21 te ho dekɛ liŋa wa vuge nɔbiŋere daka la, ge dekɛ mam nɔze'elego la te n wan bo ho la, eŋɛ daka wa poan. 22 Bilam te ho wan nyɛ mam. N ne wan ze'ele la kelompagehedoma la n yage mam nɔbiŋere daka liŋa zuo la, teŋasoka, bo Israeldoma wa n nɔɔrɛ n de se'ere.
23 Dekɛ zaaŋa dɔɔrɔ, maalɛ tebole, te de woko dɛna santira ayi', te de yaleŋa me dɛna santire, te de saazuo woko dɛna santire la girigo, 24 te sanlema takɛ de zan'an, ge kure sanlema kɔkɛ dɛ kenkɛlehe la kae. 25 Kure bonlamehega te ka yaleŋa dɛna nu'dibila gu' de nɔɔrɛ la kae, kure sanlema kɔkɛ kenkɛlehe la kae. 26 Dekɛ sanlema kure banhe senaahe tuhe tebole la na'ma anaahe la poan. 27 Lamenɛ banhe n wan tara ziira tebole na'ma tuhe lɛm mɛ la bonlamehega la n kɔkɛ tebole la nɔɔrɛ la. 28 Dekɛ zaaŋa dɔɔrɔ peehe dɔɔsaala la, takɛ tɔ la sanlema, te ba tara dɔɔ tonɔ ziira tebole la. 29 Maalɛ laahe n ane pɛrehe la laahe kanra se'ehe n wan tara zun'uhe la wama la dugulehe se'ehe n wan tara kaanbera daam bo'olom la. Dekɛ sanlema ma'an maalɛ lɔgɔtona wa zan'an. 30 Ge tara boroboro pagela tebole wa zuo, n nɛŋan daarɛ woo.
31 Dekɛ sanlensoma kure butolela zɛ'ɛlega, ka teŋa la ka dibire la. Te ka laahe la n ane wo topuo n tanhɛ la wan dɛna zogɔ yeŋa. 32 Te butolela zɛ'ɛlega dibire wa tara yila ayoobe, yila atan' logerɛ woo. 33 Yili woo wan tara laahe setan' n ane woo topuo la de poan. Te yila ayoobe la zan'an yeti la ana la bala. 34 Te butolela zɛ'ɛlega la poan golɛ laahe senaahe n ane woo topuo la eŋɛ de zuo. 35 Butolela zɛ'ɛlega tara gina yia yila la poan, tagela yila se'a n pa'ahɛ yi'i la, la se'a n pa'ahɛ tan', yila ayoobe woo poan. 36 Ho dekere la sanlensoma kuta butolela zɛ'ɛlega la la ka yila wa, la ka gina la zan'an.