Te Moses dɛɛma Yetro wa'an mɔen la na, zen'an te Moses bɔna la, lɛm la Yenɛ zoore la
18
1 Te Yetro la n de Midian teŋa keema, dɛna Moses dɛɛma la, n ta wom Yenɛ n eŋɛ yelese'a woo bo Moses, la Israel nɛreba la, la Na'ayenɛ n tare ba se'em Mizraim teŋa poan yehe na.2 Moses n daa ta behɛ a pɔga Zipora, te ka lebe la, a dɛɛma Yetro daa to'e pɔka la mɛ, 3 la ka bodibinto toyi' la. Kayema yu'urɛ dɛna Gerson. Moses yeti de vɔnrɛ dela enŋa dela saana teŋsaaŋa poan. 4 Kayema la me yu'urɛ n de Eliezer. Se'ere n sɔe la, Moses yeti, Mam sɔ Yenɛ wa n de mam soŋora, enŋa n fan' mam Faro so'a nɔɔrɛn bahɛ.
5 Te Moses dɛɛma Yetro ihege tare Moses dayɔɔhe wa, la a pɔga la wa'an mɔen la na, zen'an te Moses bɔna la, lɛm la Yenɛ zoore la. 6 Te Yetro tom nɔɔrɛ bo Moses yeti, Mam, ho dɛɛma Yetro n kene na, la ho pɔga, la ka bodibinto toyi' la. 7 Te Moses yehe to'ohɛ a dɛɛma la, ta paɛ en, dɔnbelɛ teŋa, ge ihege gin' en kaŋkaŋe. Te ba po'ohɛ taaba yeŋa ba'ahɛ, ge nya doohe taaba kɛn' Moses sogorɛ poan na. 8 Te Moses yele a dɛɛma la Na'ayenɛ n eŋɛ Faro la, teŋa la nɛreba se'em Israeldoma zuo, la yeletooro se'a n paɛ ba sore la zuo, te Na'ayenɛ fan' ba se'em.
9 Te Yetro poorɛ pee, la Na'ayenɛ n eŋɛ Israeldoma la soŋa soŋa se'em la, la en fan' ba Mizraimdoma wa nu'uhen bahɛ se'em la. 10 Te Yetro nya yeti, Pɛnka paɛ Na'ayenɛ se'ere n fan' ya Faro nu'uhen bahɛ la. 11 Nananawa, mam mi' te Na'ayenɛ wa n gane yena woo n boe. Se'ere n sɔe la, Mizraimdoma wa n daa tone Israeldoma wa pototooma la, enŋa n fan' ba bahɛ wa. 12 Te Yetro wa, tare nyɔ'an bo'olom na, kaanbɛ bo Yenɛ, te Aron, la Israel keendoma la woo wa'ana di, ge nyu' la Moses dɛɛma wa, Yenɛ nɛŋan.
13 Yiimbeere, te Moses zin'ire te a gankɛ nɛreba la yɛla, te ba kae en bahɛ teŋasoka bolika, tara tara la zanɔɔrɛ. 14 Moses dɛɛma la n nyɛ Moses n ete sɛla woo se'em bɔ'ɔra nɛreba la, soke en yeti, Hom ete nɛreba wa la wane n bala wa? Bene n sɔe te hom ma'an tole zin'an gankera nɛrekooŋɔ wa ho ma'an bolika ha, tara tara la zanɔɔrɛ.
15 Te Moses lebehe yele en yeti, ba wa'ana te ba baŋɛ la Na'ayenɛ potɛn'ɛrɛ. 16 Ba han ne tara nɔkpe'ene, ba ne tare dɛ wa'an la mam zen'an na, te mam ne behɛ de teŋa soke, ge pa'alɛ ba Yenɛ nɔze'elego la a pa'alegɔ la n de se'em.
17 Te Moses dɛɛma la lebehe yele en yeti, Ho ka ete soŋa. 18 Hom, la nɛresɛba n kene ho zen'an na wa wan taregɛ. Toonɛ la ba' kanregɛ mɛ bo ho, hom ma'an kan ta'an tona dɛ. 19 Kelehe mam, te n bo ho potɛn'ɛrɛ dena wa, te Yenɛ me soŋɛ hɔ. Hom zɛ'a Yenɛ nɛŋan bo nɛreba la, tara ba daaŋɔ la woo paara Yenɛ. 20 Pa'alɛ ba malema la pa'alegɔ la, ge pa'alɛ ba, ba wan vɔna ba vom se'em, la ban wan eta sɛla. 21 Ge ganhɛ boraahe Israel buuri la woo poan, borase'ehe n tare Yenɛ zɔɔlom ba poan, ge dɛna nɛre zure ba nɛreba la zen'an, ba dɛna nɛresɛba n ka bote piŋa lɔgɔrɔ, la ho bo ba sore te ba dɛna kpɛ'ɛndoma behera nɛreba tuha bii nɛre kɔbehe bii nɛre pihinuu bii nɛre pia pia. 22 Bahɛ te bama dɛna gankereba bo nɛreba la saŋa woo, ge te yelese'ere n ne ta kpe'em, ba ne tare yele denɛ na bo ho. Bala n wan bahɛ te zeero kan le ta'an gaŋɛ hɔ, ge ba lagom ziira la bɔ'ɔra ho mɛ. 23 Ho han eta wana, ge te Yenɛ soŋora hɔ, ho wan nyaŋɛ ba leebego wa zan'an, te nɛra woo ne lebe kule la popeelom.
24 Te Moses kelehe a dɛɛma la potɛn'ɛrɛ la soŋa, ge tom enŋa n pa'alɛ en sɛla woo se'em la, 25 ganhɛ borase'ehe n de birikindoma Israel buuri la woo poan, bahɛ ba te ba dɛna nɛŋadoma nɛreba la zan'an poan, ba dɛna kpɛ'ɛndoma behera tuha, te sɛba behera kɔbehe, te sɛba behera pihinuu, te sɛba me behera nɛre pia pia. 26 Bama n de gankereba bo nɛreba la saŋa woo. Yele se'a n ne kpe'em la, te ba ne tare wa'an Moses zen'an na, ge yelese'a n ka kpe'em la, ba mɛhe n ne maalɛ aŋa.
27 Te Moses nya bahɛ a dɛɛma Yetro sore, te a lebe kule a teŋa.