9
1 Te Na'ayenɛ yele Moses yeti, Keŋɛ Faro zen'an ta yele en yeti, Na'ayenɛ n de Hebrudoma Yenɛ la yeti, Bahɛ te n nɛreba la keŋɛ, ta po'ohɛ mam. 2 Ho han ka sakɛ te ba keŋɛ, ge gu ba, 3 Na'ayenɛ wan damɛ' ho dunhe la ban' kantɛ, a wan ŋmɛ' ho yiri la bonhe la yogoma la nii la piihe la boohe zan'an la ban' kantɛ. 4 Ge Na'ayenɛ wan yelege Israel nɛreba dunhe la se tɔka, Mizraimdoma dunhe la me se tɔka, duŋa la kayena kan loe Israeldoma dunhe la poan ki.5 Te Na'ayenɛ pa'alɛ saŋa yeti beere wa Na'ayenɛ wan tom toondena wa teŋa wa poan. 6 Yiimbeere, te Na'ayenɛ tom bala, te Mizraimdoma dunhe zan'an ki, ge Israeldoma la duŋa la kayena ka loe ki. 7 Te Faro tom nɛreba te ba ta vɛɛnhɛ, te a baŋɛ te Israel nɛreba la, ba duŋa la kayena me ka loe ki. Ge la bala zan'an, a suunre ka maahom, te a bahɛ te nɛreba la keŋɛ.
8 Te Na'ayenɛ yele Moses la Aron yeti, Vaɛ ya bugum tɔ'ɔlega poan tampegelom la nu'o me'en, te Moses ze'ele Faro nɛŋan lobe bo bahɛ te bo yeregɛ. 9 Bo wan lebege pɔɔnhegɔ kantɛ pin' Mizraim teŋa zan'an, ge bahɛ te nɔten kɛ'ɛhe mɔrɛ nɛreba, la dunhe woo n boe Mizraim teŋa wa poan. 10 Te ba tɔnbegɛ tampegelom la, ta ze'ele Faro nɛŋan, te Moses lobe bo bahɛ te bo yeregɛ, bahɛ te nɔten kɛ'ɛhe nyɔgɛ Mizraim teŋa nɛreba, la ba dunhe zan'an. 11 Te tiimdoma la ka le tana zɛ'ɛta Moses nɛŋan. Se'ere n sɔe la, nɔten kɛ'ɛhe la nyɔkɛ tiimdoma la mɛhe mɛ, ta' la Mizraim teŋa nɛra woo. 12 Te Na'ayenɛ bahɛ te Faro kanbɛ a suunre, kan kelehe Moses la Aron wo Na'ayenɛ n pon yele Moses se'em la.
13 Te Na'ayenɛ yele Moses yeti, Ihege bolika yu'uŋyu'uŋɔ keŋɛ Faro zen'an, ta yele en yeti, Na'ayenɛ n de Hebrudoma Yenɛ la yeti, Bahɛ te n nɛreba wa keŋɛ ta tona bɔ'ɔra mam. 14 Han dagana bala, saŋkana wa poan, n wa ka'ɛ namehegɔ bahɛ hom, la ho kpɛ'ɛndoma wa, la ho teŋa nɛreba wa zan'an zuo na, te ho baŋɛ te se'em ka boe teŋparɛ wa zuo ana wo mam. 15 Wana ma'an n pon damɛ ne hom, la ho nɛreba wa, la too seko n wan piie ne ya teŋparɛ wa zuo bahɛ. 16 Ge mam bahɛ te ya vɔna la dela, n pa'alɛ n paŋa, ge bahɛ te n yu'urɛ pota teŋparɛ wa zuo. 17 Ho kelom zabera mɛ la mam nɛreba wa, te ho kan bahɛ te ba keŋɛ. 18 Beere wana ma'an, n wan bahɛ te saakuga se'a n nan ka tabelɛ ni Mizraim teŋa en pɔhɛ na tara tara la zina wa, wa'ana ni Mizraim teŋa wa poan. 19 Bala zuo, tom nɔɔrɛ bo te ba pe'e dunhe, la sɛla woo te ho tara te la bɔna mɔen ha na kɛn'ɛhɛ yire. Nɛresaaleba, la dunhe woo n boe mɔen ha han ka kɛn' na, ge te saakuga la paɛ na, ba wan ki.
20 Te Faro kpɛ'ɛndoma sɛba n zote Na'ayenɛ yetɔgom la, zɔ kalam ta kan'ahɛ ba yamehe, la ba dunhe zan'an tare kule na, 21 ge te sɛba n ka nane Na'ayenɛ yetɔgom la, bahɛ ba yamehe, la ba dunhe zan'an mɔen ha.
22 Te Na'ayenɛ yele Moses yeti, Zɛnkɛ ho nu'o pa'alɛ saazuo ha, te saakuga lu Mizraim teŋa wa zuo na, a lu nɛresaaleba, dunhe, la sɛla woo n de tia, bii sɛla woo n yehe bɔna samana zuo, Mizraim teŋa wa poan zuo na. 23 Moses n zɛnkɛ a doore la tɔ saazuo ha la, te Na'ayenɛ tom saa te ka tanhera, la saakuga, la bugum baha na. Te Na'ayenɛ bahɛ te saakuga la lure Mizraim teŋa, 24 te saakuga la luta, te saa nyagera nɛŋa la poore zan'an. La wa dɛna la sabeeo seko taaba te Mizraim n pɔhɛ na nan ka tabelɛ nyɛ ko taaba. 25 Mizraim teŋa poan zan'an, saakuga la lu sagom sɛla woo n boe mɔen ha ka kɛn' na, dɛna nɛreba bii dunhe mɛ, ge sagom ban borɛ sɛla woo samana zuto, la tiihe. 26 Gosen teŋa, zen'an te Israeldoma kɛn'ɛra la ma'an te saakuga wa ka ni bilam.
27 Te Faro yi Moses la Aron na, yele ba yeti, Saŋkana wa, mam baŋɛ te mam tue ya. Na'ayenɛ n tare yelemɛŋɛrɛ, ge mam, la n nɛreba wa zan'an tue mɛ. 28 Sohɛ Na'ayenɛ te saa tanhega la, la saakuga la seke ya. N wan bahɛ te ya keŋɛ, ya kan le kɛn' ka'lam.
29 Te Moses yele en yeti, Mam yehere wa, n wan zɛnkɛ n nu'uhe bo Na'ayenɛ, te saa tanhega la, la saakuga la go'e, te ho baŋɛ yeti, teŋparɛ wa dela Na'ayenɛ denɛ. 30 Ge han dɛna hom, la ho kpɛ'ɛndoma la, mam mi' te ya nan ka zote Na'ayenɛ n de Yenɛ la.
31 Bala ma'an la, te guno puuri mɛ, te mui me nyɔgera, te ba zan'an sagom. 32 Ki n ka lagom sagom. Se'ere n sɔe la, bama nan ka zo'e.
33 Te Moses ze'ele Faro zen'an yehe, ta yehe teŋa la kenkɛleŋa ha. Ta zɛnkɛ a nu'uhe sohɛ Na'ayenɛ, te saa tanhega la, la saakuga la go'e, te saa la me go'e nia. 34 Faro n nyɛ te saa la, la saakuga la, la saa tanhega la go'e ya la, te a le tom be'em. Enŋa la a kpɛ'ɛndoma la kanbɛ la ba sunya. 35 Faro suunre n kanbɛ se'em n bala, te a kan bahɛ te Israeldoma wa keŋɛ, wo Na'ayenɛ n pon yele Moses se'em la.