7
1 Te Na'ayenɛ yele Moses yeti, Behɛ, n eŋɛ hɔ te ho ana mɛ wo Yenɛ la Faro nɛŋan, te ho keema Aron dɛna ho nɔtɔgɔha. 2 Yele mam bo ho nɔse'ere woo la, te ho keema Aron ne to'e tɔgɛ bo Faro, te a bahɛ te Israeldoma yehe a teŋa la poan. 3 Ge mam mɛŋa wan bo Faro sunkanberɛ, te mam n pon tona n nyalema la kerehe kekeko Mizraim poan se'em la zan'an, 4 Faro la kan kelehe ya, bala te mam wan zabɛ la Mizraim teŋa wa la gankerɛ tooro, ge tare n nɛreba Israeldoma wa ba yizuo, ba yizuo yehe na. 5 N han zabɛ la Mizraim teŋa wa, dekɛ en nu'o paŋa tare Israeldoma wa yehe na, Mizraimdoma wa wan baŋɛ te mam de Na'ayenɛ.6 Te Moses la Aron eŋɛ doohe Na'ayenɛ n bo ba nɔɔrɛ se'em la. 7 Moses dela yuuma pihinii, te Aron dɛna yuuma pihinii la atan' ge pɔhɛ ze'ele Faro nɛŋan tɔgɛ bo en.
8 Te Na'ayenɛ yele Moses la Aron yeti, 9 Faro la han ta bɔta te ya eŋɛ yelekerega pa'alɛ en, hom Moses yele Aron te a dekɛ doore la bahɛ teŋa naba la nɛŋan, ge de wan lebege bonsɛla. 10 Bala te Moses la Aron keŋɛ Faro zen'an, ta eŋɛ doohe Na'ayenɛ n bo ba nɔɔrɛ se'em la, te Aron dekɛ doore la lobe bahɛ teŋa, naba la a kpɛ'ɛndoma la nɛŋan, te de lebege bonsɛla. 11 Te Faro me yi' a yamdoma, la mi'ilomdoma sɛba n de Mizraim teŋa la tiimdoma na, te ba wa'ana me eŋɛ bala mea. 12 Ba woo dekɛ la ba dɔya bahɛ teŋa, te a lebege bonsɛ'doma gan'an, te Aron doore la, nyɔkɛ bama dɔya la vole. 13 Ge la bala zan'an, Faro kanbɛ la a suunre, ka be'e behɛ ba, wo Na'ayenɛ n pon yele ba se'em la.
Te Na'ayenɛ yele Moses yeti, Faro suunre kanbɛ mɛ
14 Te Na'ayenɛ yele Moses yeti, Faro suunre kanbɛ mɛ, a zagahɛ mɛ te a kan bahɛ te nɛreba la keŋɛ. 15 Bala, keŋɛ a zen'an bolika kana wa, dekɛ ho doore la n daa lebege bonsɛla la, ta maahom zɛ'a kolaa la nɔgbenɛ ge gura en, te a han ta yɛ'a Nile Kolaa la poan na, ho to'ohɛ en bilam. 16 Yele naba wa yeti, Na'ayenɛ n de Hebrudoma Yenɛ la en tom mam ho zen'an na, te n yele ho yeti, Bahɛ te n nɛreba wa keŋɛ mɔen ha ta po'ohɛ mam, ge tara tara la zina, ho pon ka kɛleha. 17 Na'ayenɛ yeti ya, Yele dena wa wan bahɛ te ho baŋɛ te mam de Na'ayenɛ. Doore wa te n zanla n nu'uhen wa, n yeti n dekɛ dɛ ŋmɛ' la Nile Kolaa ko'om wa te bo lebege ziim. 18 Zim n boe bo poan wan ki', te ko'om la fɛn'ɛra, te Mizraimdoma wa kan ta'an nyu' Nile Kolaa wa poan ko'om.
19 Te Na'ayenɛ yele Moses yeti, Yele Aron te a zɛnkɛ doore la tɔ Mizraim teŋa ko'om n boe zen'an woo, kolaahe, bɔgɔhe, bulehe, la mɔga zan'an, te Mizraim teŋa ko'om la zan'an lebege ziim, ziim wan bɔna teŋa la poan zen'an woo, dɔɔrɔ ko'om dogorɔ, la kuga ko'om dogorɔ woo poan wan dɛna ziim. 20 Te Moses la Aron eŋɛ doohe Na'ayenɛ n bo ba nɔɔrɛ se'em la, te a ze'ele Faro la a kpɛ'ɛndoma nɛŋan, zɛnkɛ doore la ŋmɛ' Nile Kolaa la ko'om la, te ko'om la zan'an n boe Nile Kolaa la poan la lebege ziim, 21 te zim se'e woo n boe ko'om la poan ki, te Nile Kolaa la fɛn'ɛra, te Mizraimdoma ka tana nyuura ka ko'om, te ziim to'e Mizraim teŋa zan'an. 22 Te Mizraim teŋa tiimdoma la me wa'an dekɛ ba lika tooma la eŋɛ bala mea. Te Faro kanbɛ a suunre, pon kan kelehe ba wo Na'ayenɛ n pon yele se'em la. 23 Te Faro wa lebe kule, ge pon ka dekɛ yele la te de dɛna sɛla a suunre poan. 24 Te Mizraimdoma wa nya dɔla Nile Kolaa la nɔgbenɛ gaara angera ko'om. Se'ere n sɔe la, ba kan ta'an nyu' Nile Kolaa la poan ko'om la. 25 Na'ayenɛ n sagom Nile Kolaa la, dabeha ayopɔe en ta tole.