Yakob ta yi' a dayɔɔhe la lagahe na yele ba yeti
48
1 Te la eŋɛ dabeha fiin wa, te ba wa'ana yele Yosef yeti, Ho sɔ ka paɛ a mɛŋa. Te Yosef ihege tare a dayɔɔhe seyi' la, Manase la Epraim keŋɛ te a ta behɛ en. 2 Ban yele Yakob yeti, Ho dayɔa Yosef n wa'ana te a behɛ ho la, Israel giinla kpeŋe mɛ te a ihege a soŋɔ la zuo malom zin'ire. 3 Yakob yele Yosef yeti, Gaŋɛ Zan'an Yenɛ wa tabelɛ nɛɛ a mɛŋa pa'alɛ mam mɛ Luz teŋa n boe Kanaan teŋa poan la, kan' som bahɛ mam zuo, 4 ge yele mam yeti, n yeti n bahɛ te ho wom mɛ. Ho wan wi'ɛ ho kanlɛ poan. N wan bo ho buuri, ge dekɛ teŋkana wa bo ho yaahe te ka dɛna ba sɔ'ɔlom yɛ'ɛha.5 Bala, ho dayɔɔhe seyi' wa te ho dɔge se Mizraim teŋa wa poan ge te mam nya baŋɛ wa'an ho zen'an na wa dela mam denɛ. Epraim la Manase dela mam denɛ, wo Areuben la Simeon n de n denɛ se'em la. 6 Kɔmsɛba te ho nya wan dɔgɛ pooren la n ta dɛna ho denɛ. Teŋsɛka te ba wan ta to'e la, kɔmbana bayi' wa yu'ura ta kaanla pa'ahɛ ho keendoma la yu'ura poan mɛ. 7 Mam n yuum ta ze'ele Padan teŋa lɛbera kula n sɔ teŋa na la, ninbɔn'ɔn n yuum ta nyɔkɛ mam sore. Arakel yuun ki la n kenɛ mea poan sore zuo, Kanaan teŋa poan. Bala ma'an te to gee la fiin wa la to paɛ Eprat teŋa. Te mam pin' en la Eprat teŋa sore la kenkɛleŋa, Betlehem n bala.
8 Israel n nyɛ Yosef dayɔɔhe la, a soke yeti, Bana dela bane? 9 Te Yosef yele en yeti, Kɔma sɛba te Yenɛ bo mam ka'lam bala. Te Israel yeti, Tara ba paɛ n nɛŋan wa na te n kan' som bahɛ ba zuo. 10 Bala ma'an te Israel korogɛ mɛ te a nini ka le nyɛta soŋa. Te Yosef ve'e kɔma la paɛ a sɔ la nɛŋan, te a sɔ la gin' kɔma la nu'uhe waahena ba, 11 ge sɔnha la Yosef yeti, Mam daa pon ka le tara potɛn'ɛrɛ te n wan le nyɛ hɔ la n niho. Ge Yenɛ wa n bahɛ te mam le nyɛ hɔ ta ta' la ho kɔma ha wa.
12 Te Yosef nya ve'e kɔma la n gan a sɔ la na'ma zuo la ihege saazuo, ge pɔnrɛ na'ma teŋa na'ahɛ a sɔ la, 13 ge nya dekɛ Epraim ze'ele a mɛŋa zuɔ nu'o bɔba, tɔ la a sɔ la gɔbega nu'o, ge dekɛ Manase me ze'ele a mɛŋa gɔbega nu'o bɔba, tɔ la a sɔ la zuɔ nu'o, nya zan'ɛn kɔma la du' a sɔ la te a ta'an dekɛ a nu'uhe seyi' pagelɛ kɔma bayi' la zuto boyena. 14 Ge a sɔ Israel n tɛɛn a nu'uhe te a kan' som bahɛ kɔma la zuo la, a puue se mɛ, te a zuɔ nu'o tee keŋɛ ta pagalɛ Epraim n de yebega la zuo, ge te a gɔbega nu'o ton keŋɛ ta pagalɛ Manase n de keema la zuo.
15 Te a nya kan'ara baha Yosef zuo yɛta te, Yenɛ se'ere te mam sɔ Abraham la Isaak dɔla la, Yenɛ se'ere n behere mam vom na paɛ zina wa la. 16 Yenɛ soŋora se'em n to'ohe mam n daaŋɔ woo poan bahera la, kan' som bahɛ bodibinto wa zuo. La doohe kɔma wa poan te n yu'urɛ da bɔregɛ, te mam sɔyaabdoma Abraham la Isaak yu'urɛ la da bɔregɛ. Kɔma wa wi'ɛ ba kanlɛ poan teŋparɛ wa zuo.
17 Yosef n ta nyɛ te a sɔ la zuɔ nu'o page la Epraim n de yebega la zuo la, a poorɛ ka pee la bala. Te a gin' a sɔ la nu'o vɛ'ɛra te a pagalɛ Manase n de keema la zuo, 18 ge yɛta a sɔ la yeti, Aai, n sɔ, ena n de keema, dekɛ ho zuɔ nu'o la pagalɛ enŋa zuo.
19 Te a sɔ la zagahɛ ge yeti, Mam mi' bala n dayɔa, n mi' te enŋa me wan tara nɛreba ge me kanregɛ. Ge la dela pɛnregerɛ te a yebega la wan gaŋɛ en, te a yaahe zo'e lebege teŋhe. 20 Te a kan' som bahɛ kɔma la zuo ba'ahɛ ge yeti, Israel nɛreba wan tare la yamam yu'urɛ kan'ara wa som bɔ'ɔra nɛreba. Ba ne wan kan' yeti, Yenɛ eŋɛ ho som wo Epraim la Manase la. Israel eŋɛ la wana bahɛ te Epraim dɛna yebega ge tole a keema Manase nɛŋa. 21 Te Israel nya yele Yosef yeti, Mam dabeha paɛ mɛ n bala, ge Yenɛ wan leen bɔna la hɔ, ge tare ho lebe ho sɔyaabdoma teŋa la poan. 22 Ge n pa'ahere hom la tɔntɛ deyena gana ho keendoma la. N dekɛ Amoridoma teŋa la te mam dekɛ n so'a la n tanhɔ to'e la pa'ahɛ la hom.