43
1 Te kom la kelom sigera teŋa wa zuo mimi', 2 te disɛka te Yosef sɔɔnrɔ la wa'ana da' Mizraim teŋa la ta ba'ahɛ. Te ba sɔ la le yele ba yeti, Lebe ya ta da' dia la fiin na te to le walehɛ behɛ. 3 Te Yuda lebehe yele en yeti, Boraa la daa yele tomam mɛ la ninmɔ'ɔrɛ yeti, to han ka dɔla to nu'uhun kanrɛ la ge lebe to ma'an na, to kan nyɛ enŋa nɛŋa. 4 Bala, ho han wan bahɛ te to nu'uhun kanrɛ la doohe to, to wan keŋɛ ta nyɛ dia la da' na. 5 Ge ho han kan bahɛ te a doohe to, to yeti to namehɛ la to mɛŋa keŋɛ yoo. Se'ere n sɔe la, boraa la daa yele tomam yeti, ya han ta lɛbera na ge ka tare ya yebega la na, ya kan nyɛ mam nɛŋa. 6 Te Israel lebehe soke ba yeti, Bene n sɔe te yamam nɔɔ ta yɛta boraa wa te ya tare yebega ha, nya tare yele dena wa na ziila mam wa? 7 Te ba me lebehe yeti, Boraa la daa ba' soke to gaŋɛ mɛ, a daa soke tomam mɛhe yɛla mɛ, la te buuri poan yɛla, soke to yeti, Ya sɔ la kelom vɔna? Ya tare yebega kayema ha? Te tomam me yeen lɛbeha en sokere to se'em la bɔ'ɔra en. Tomam yeti to eŋɛ la wane baŋɛ te a wan ta yele to yeti to tare to yebebila la wa'ana? 8 Te Yuda yele ba sɔ Israel yeti, Yeen bahɛ te bia la doohe to te to keŋɛ nananawa. Bala te tomam la hom la to kɔma wa kan vibe. 9 Mam mɛŋa wan ze'ele bo a som. Sɛla sɛla kan eŋɛ en. N han ka tare en lebena bo ho, daaŋseko wo te ho bɔta ho pɔ' bahɛ n zuo gura n kum. 10 To han ka go'on ne, wana ma'an to keŋɛ ne ge lebe na, ge le keŋɛ.11 Te ba sɔ Israel yele ba yeti, La han wan dɛna bala, ya wan eŋɛ se'em n dela, doohe ya go'ohe teŋa wa samanɛ wɔla te ana nyɛlom sun' ya tapɔtɔ poan tare ta bo boraa la te la dɛna ya bo'olom n bala. Tare ya tebehegɔ kaam la seerom fiin wa la ge tara tiihe biila la kaam n tare nyuŋo soŋɔ la sukaam pa'ahɛ. 12 Ge tara ligiri la sugumnɔɔren boyi'. Se'ere n sɔe la, ligise'a te ba daa dekɛ lebehe eŋɛ ya bɔra la poan la dela ya tare i lebe ta tehɛ. Daanse'ere ba daa tulum mɛ. 13 Tare ya ya yebega la me pa'ahɛ keŋɛ ta bo boraa la wo enŋa n yele se'em la. 14 Gaŋɛ Zan'an Yenɛ la wan bahɛ te boraa la ta zɔ ya ninbɔn'ɔn ge bahɛ te ya sɔɔn la n yee ha la Benyamin doohe ya lebe na. Ge han dɛna mam, lan han pon gan'an mɛ te mam kɔma la wan bɔregɛ, ba wan seren bɔregɛ. 15 Te a dayɔɔhe wa kan'ahɛ ba bo'olom la, ge dekɛ ligiri la sugumnɔɔren boyi' nya pe'e Benyamin pa'ahɛ. Te ba yɛ'a Mizraim teŋa, ta paɛ dekɛ ba mɛhe pa'alɛ Yosef.
16 Yosef n ta nyɛ te Benyamin boe ba poan la, te a yele a tontona se'em n behere a yire la yeti, Tare nɛreba wa kule n yire ta behɛ duŋa ko' dogɛ dia, ge ba wan di wontɛɛŋa dia la mam yire. 17 Tontona la eŋɛ wo Yosef n yele en se'em la, tare boraahe wa kule Yosef yire. 18 N tare ba ta kɛn'ɛhɛ yire la, te ba zin'an te ba paleŋa ɛngera. Se'ere sɔe la, bama potɛn'ɛrɛ dela, Tomam n daa wa'an yia na te ba daa dekɛ to ligiri la lebehe to bɔra la poan te to me daa ka baŋɛ ge tare i kule la n bala te ba tare to wa'an ka'lam na wa. A bote a zabɛ la to mɛ la a dekɛ to lebege a yamehe, ge fan' to bonhe wa tara. 19 Bala te ba nya ihege paɛ Yosef tontona la zen'an yire la nayaŋa nɔɔrɛn, 20 nya yele en yeti, Naa, tomam daa pon wa'an ka'lam yia me na da ki. 21 Ge tomam n daa ye' lɛbera la, to daa ta paɛ la zen'an te yenɛ ba' nyɔnlom. Te tomam kɛn' bilam te to gan'arɛ, ge nya yu'uhɛ to bɔra la te to behɛ. Tomam nyɛ te nɛra woo ligiri n zone se'em te a tare wa'ana te a da' dia la, zone la bala bɔna to bɔra la poan paga ki la zuo na. Bala te tomam tara i lebe na. 22 To me kelom tare ligise'a te to wan da' dia zina mɛ wa'ana. Tomam ka baŋɛ se'em n daa lebehe dekɛ to ligiri la sun' to bɔra la poan. 23 Te tontona la lebehe yele ba yeti, Bala dage yele, da bahɛ ya te la dɛna daaŋɔ. Ya Yenɛ la n daa lebehe dekɛ ya ligiri la eŋɛ ya bɔra la poan. Mam nɔn mi' te mam daa to'e ya ligiri la. N tɔgɛ bala ba'ahɛ la ge nya keŋɛ ta yu'ɛ Simeon tara en wa'an ba zen'an na. 24 Te tontona wa nya tare boraahe wa kɛn' Yosef yire ta bo ba ko'om te ba pee ba na'ma, ge bo ba bonhe la yaama te se zɛ'a ɔbera. 25 Te ba nya maahom ba bo'olom la gura Yosef. Se'ere n sɔe la, ba wom te a wan kule wontɛɛŋa na, te bama la enŋa di wontɛɛŋa dia a yire la poan.
26 Yosef n ta paɛ yire wontɛɛŋa na la, te ba dekɛ disɛka te ba tare ze'ele ba teŋa na la bo en, ge pɔnrɛ na'ma a nɛŋan. 27 Te a soke ba gɔɔm, ge soke ba yeti, Ya sɔ la te ya daa yeti a ba' korogɛ mɛ la, a kelom vɔna? 28 Te ba lebehe yele en yeti, Ɛɛn, to sɔ la n de ho yameŋa la kelom vɔna, ge dɛna a mɛŋa. Ge suure ba mɛhe teŋa na'ahɛ en. 29 Te Yosef zin'an behere ba kaara, te a niho ta tɔ a mɛŋa yebega se'em la enŋa n de ma ayena la. Te a soke ba yeti, Ya yebebila se'em te ya daa yele mam a yele la n bala? Ge yele en yeti, Na'ayenɛ wan zɔ ho ninbɔn'ɔn n dayɔa. 30 N behɛ a yebega la, la ve'e en mɛ, te a ihege kalam ta kɛn' bɔ'seko n de a ma'an bɔ'ɔ la poan ta sogɛ kɛla. 31 N ta kele ba'ahɛ la, nya yehe na eŋɛ ko'om wire a nɛŋa ge lebe kɛn' ba zen'an na, ge kelom nyɔkɛ a mɛŋa ge bahɛ te ba tare dia na, 32 tɔnrɛ en a ma'an, ge tɔnrɛ keendoma la me nɛra woo la a laa, ge tɔnrɛ Mizraim nɛreba la me en lagom dita la en la ba ma'an. Se'ere n sɔe la, Mizraimdoma ka dite la Hebrudoma. La dela kihire bo Mizraimdoma la. 33 Yakob dayɔɔhe la n zin'ire Yosef nɛŋan se'em dita dela, keema la n zin' yia, tagala se'em n tagale en la, tara bala ta paɛ se'em n de nu'uhe kanrɛ la na. Te ba nya zin'an beha taaba te la eŋɛ ba pakerɛ. 34 Ban ta tɔnta ba dia Yosef dia tebole la zuo la, Benyamin tɔntɛ gane nɛra woo la sugumnɔɔren bonuu. Te ba nya di ge nyu' ban bote se'em.