Potipar n dekɛ sɛla woo eŋɛ Yosef nu'uhen
39
1 Ba tare Yosef keŋɛ la Mizraim teŋa, te Potipar n de Mizraim naba Faro pɛɛntɛɛnreba kpɛ'ɛma la n ta da' en Ismael buuri la zen'an. 2 Te Na'ayenɛ bɔna la Yosef, te a panrɛ ge kɛn'ɛra a daana Mizraim teŋa nɛra wa zen'an. 3 Yosef daana la n ta kpanhɛ baŋɛ te Na'ayenɛ n boe la Yosef, te en ete sɛla woo kena soŋa la, 4 te a kpɛ'ɛma la suunre kɛn' la en, te a dekɛ Yosef te a gura en, ge dekɛ a yire zan'an la sɛla woo n boe yire la poan eŋɛ Yosef nu'uhen. 5 Pɔhɛ saŋsɛka poan te kpɛ'ɛma la dekɛ a yire la a sɛla woo n boe de poan eŋɛ Yosef nu'uhen la, Na'ayenɛ kan' la som bahɛ yire la sɛla woo poan Yosef zuo. Te kan'somɔ sige Potipar lɔgɔrɔ woo poan. Lɔgɔseto n boe yire la seto n boe yeŋa zan'an.6 Potipar n dekɛ sɛla woo eŋɛ Yosef nu'uhen se'em n bala. Te Yosef sɔna sɛla woo behera. Potipar mɛŋa ka le lɛbera yire la lɔgɔrɔ bii de tooma bɔba, han dagana a dia te a wan paana di ma'an. Te Yosef iŋa mɛ soŋa soŋa, te a som te la ka tana eta. 7 Te la bɔna bɔna te a daana la pɔga ta tara kɔnre la Yosef. Te a yele Yosef yeti, Mam bote mam la hom n baŋɛ taaba. 8 Te Yosef ka sakɛ ge yele en yeti, Behɛ, dage mam n behere sɛla woo yire wa poan? Mam daana wa ka le behera sɛsɛla yire wa poan. A dekɛ a sɛla woo eŋɛ la mam nu'uhen. 9 Nɛra ka boe yire wa poan te a kpe'eŋo paɛ mam. Mam kpɛ'ɛma wa ka dekɛ sɛla sogɛ mam. Hom ma'an te a ka dekɛ eŋɛ mam nu'uhen. Se'ere n sɔe la, hom dela a pɔga. Bala, wane te mam wan tom pototoondena wa ganlom n mɛŋa n Yenɛ la nɛŋan? 10 Te pɔka la daarɛ woo sina ge yɛta Yosef bala mea, te Yosef me kɔ'ɔn zɛ'a kaŋkaŋe te enŋa kan tom bala la en bii a pon lɛna en.
11 Daarɛ deyema te Yosef ta kɛn' deon te a ta tom a yire poan tooma a se'a. Bala ma'an te nɛnɛra ka boe yire la poan. 12 Te pɔka la gin' Yosef fuo tara ge yele en yeti, Zina mam la hom wan baŋɛ taaba. Te Yosef zugum te a peɛn wuu koŋe, ge yɛɛ a fuo te a yɛ bahɛ en, ge zɔ yehe na. 13 Pɔka la n behɛ te a ka nyaŋɛ bahɛ te Yosef eŋɛ enŋa n bote se'em la ge me zɔ ge bahɛ a fuo la a nu'uhen la, 14 te a dekɛ fuo la yi' yire la yamehe la zan'an lagahɛ na yele ba yeti, behɛ ya, ba tare Hebru nɛra wa na te a ganlom to mɛ. A kɛn' la ka'lam na te a gan'arɛ la mam te mam kaahɛ. 15 N nyɛ te mam kaahe ninmɔ'ɔrɛ ɛɛra se'em n wan fan' mam bahɛ la, te a zɔ yehe ge bahɛ a fuo wa, 16 ge nya dekɛ fuo la biŋe lɛm a mɛŋa bala gura te Yosef daana la ta paɛ na. 17 Te a yele en yeti, Hebru teŋa yameŋa la te ho tare wa'ana la n ihege kɛn' ka'lam na te a gan'arɛ la mam. 18 Ge en kɛn'na te mam kaahɛ yeti fan' ya mam bahɛ la, te a zɔ yehe ge bahɛ a fuo wa.
19 Yosef daana Potipar n wom yetɔgom la te a pɔga la dekɛ yele en yeti, Ho yameŋa la en eŋɛ mam se'em n wana la, te la daam en te a sunsunya nyie. 20 Te a wa nyɔkɛ Yosef ta pagɛ zen'sɛka te ba pagara naba mɛŋa nɛreba la. Ge Yosef n ta bɔna paka deo la poan la, 21 te Na'ayenɛ kelom bɔna la en la nɔŋerɛ ge bahɛ te se'em n behere sɛba n boe paka deo la poan la nɔŋɛ Yosef. 22 La eŋɛ la bala te se'em n behere ba paka deo la poan la ta bo Yosef kpe'eŋo te a beha sɛla woo n boe paka deo la poan la. Enŋa n sɔe sɛla woo n ete paka deo la poan beha. 23 Kpɛ'ɛma la n dekɛ sɛla woo eŋɛ Yosef nu'uhen la, a paleŋa ka ɛngere. Se'ere n sɔe la a mi' te Na'ayenɛ n boe la Yosef, te sɛla woo te a eta ete la soŋa.