Te Yakob yele a sɔ la yeti, Mam dela Esau
27
1 Isaak ta korogɛ mɛ te a nini ka le nyɛta, te a yi' a dayɔkeema Esau na yele en yeti, N dayɔa, te Esau sakɛ yeti, Ɛɛn, n sɔ, mam n wana. 2 Te Isaak yele en yeti, Mam nya korogɛ mɛ wa. N me ka mi' n kum daarɛ. 3 Bala dekɛ ho mɔen lɔgɔrɔ yehe ta tɛn' sɛla na 4 dogɛ n kɔnrehe dia wa bo mam te n di ge la n dekɛ ho kan'somɔ bo ho ge ki.5 Bala ma'an te Arebeka kɛleha Isaak n tɔgɔra bɔ'ɔra Esau la. Te Esau yehe tole mɔen la te a ta ɛ sɛla ko na bo a sɔ la. 6 Te Arebeka yi' Esau yebega Yakob na me yele en yeti, Behɛ, mam wom ho sɔ n yeti ho keema Esau, 7 te a keŋɛ ta ko sɛla na dogɛ bo en te a di ge ze'ele Na'ayenɛ nɛŋan kan' som bo en ge ta'an ki. 8 Bala n bia, ma'ɛn ho mea ge eŋɛ sɛla te n yeti n pa'alɛ ho wa. 9 Keŋɛ dunhe la poan ta loe boohe seyi' n ane soŋa tare na, te n dogɛ kɔnrehe dia la wo ho sɔ la n bote ka se'em la, 10 te ho tare ta bo en te a di ge dekɛ a kan'somɔ la tee bo hom ge ta'an ki.
11 Te Yakob yele a ma la yeti, Mam keema Esau dela iŋkɔnbega daana. Mam me iŋa ka ane bala. 12 N sɔ wa han ta yeti a sa'abɛ mam behɛ te n ka ane bala, la ta dɛna la mam yeti n pan'ahɛ en mɛ. La me han deŋɛ eŋɛ bala, a yeti a kan' la be'em bahɛ n zuo, ge mɔŋɛ mam kan'somɔ la.
13 Te a ma la lebehe yele en yeti, N bia, kan'be'o la han ta wa'ana, ko sige mam zuo. Yeen keŋɛ ta eŋɛ mam yeti ho eŋɛ sɛla la tare na bo mam kalam.
14 Te Yakob keŋɛ ta tare dunhe la na bo a ma la te a ko' se, dɔgɛ kɔnrehe dia la wo a sɔ la n bote ka se'em la. 15 Ge dekɛ a bikeema Esau fusonɔ yɛ' Yakob, 16 ge dekɛ boohe la gana la pin' a nu'uhe la a nyugela bɔba wa, 17 nya dekɛ kɔnrehe dia la te Isaak bɔta la, la boroboro se'a te a maalɛ la bo Yakob.
18 Te a tare dia la paɛ a sɔ la nɛŋan yi' en yeti n sɔ, te a sakɛ yeti, Ɛɛn n dayɔa, ane n bala? 19 Te Yakob yele a sɔ la yeti, Mam Esau ho bikeema la. N ba'ahɛ sɛla te ho yeti n eŋɛ na la. N belone ho mɛ, ihege la di mam n yehe ta ko' sɛla na la ge kan' ho kan' somɔ bahɛ n zuo. 20 Te Isaak soke en yeti, N dayɔa, ho eŋɛ la wane nyɛ la wana kalam na wa? Te bia la lebehe a sɔ la yeti, Na'ayenɛ ho Yenɛ la n bo mam nyaŋerɛ. 21 Te Isaak yele Yakob yeti, Vuruge na te n sa'abɛ ho behɛ nya ho seren dela mam dayɔa Esau bii ho dagɛ enŋa. 22 Te Yakob vuruge paɛ a sɔ la, te a sa'abɛ en behɛ ge yeti, Konkore la dela Yakob konkore, ge te nu'uhe la me dɛna Esau nu'uhe. 23 Isaak ka baŋɛ en. Se'ere n sɔe la a nu'uhe la tare la kɔnberɔ wo a keema Esau la. Te Isaak kan'somɔ la bahɛ a zuo, 24 ge soke en yeti, Hom seren dela mam dayɔa Esau wa? Te a lebehe yeti, Ɛɛn mam bala. 25 Te a nya yeti, Mam dayɔa wa, tare hom keŋɛ ta ko' sɛla na dogɛ la na te n di ge kan' som la bo ho. Te Yakob dekɛ dia la na bo en te a di. Te a bo en daam te a nyu'. 26 Te Isaak nya yele en yeti, Paɛ n nɛŋan wa na n dayɔa, la ho kɔkɛ mam.
27 Te Yakob paɛ kɔkɛ a sɔ la, te Isaak wom dunhe nyuŋo a futo la poan, nya kan' som bo en ba'ahɛ ge yeti, Yelemɛŋɛrɛ, mam dayɔa wa nyuŋo ane me wo samanɛ se'ere te Na'ayenɛ kan' pɔn'ɔhegɔ bahɛ de zuo la. 28 Yenɛ wan bahɛ te mɛgelom luta ho zuo, ge bo ho teŋa wa tarega. Yenɛ bahɛ te ho kɛ' ki te la ka tara makerɛ, ge bo ho daam paalom me bala. 29 Teŋhe wan tona bɔ'ɔra hɔ, te buuri zo'e zo'e suuta bɔ'ɔra hɔ. Dɛna ho sɔɔnrɔ la zan'an daana, te ho ma dayɔɔhe la zan'an suuta bɔ'ɔra hɔ. Se'em n kan' be'em bo ho, kan'be'o boe a daana zuo. Se'em n kan' som bo ho, kan'somɔ boe a daana zuo.
30 Isaak kan' som bo Yakob ba'ahɛ mɛ te a yehe, te la eŋɛ fiin wa, te a keema Esau bala ze'ele a mɔen la kɛn'ɛra na. 31 A nya dogɛ a kɔnrehe dia la tare wa'an a sɔ la zen'an na yele a sɔ la yeti, N sɔ, ihege zin'ire di mam yehe ta ko' sɛla na la dia ge bo mam ho kan'somɔ la. 32 Te a sɔ Isaak soke en yeti, Hom dela ane? Te a yele en yeti, Mam dela ho dayɔkeema Esau. 33 Te Isaak ihege gbe'era ge tanhera yeti, Ge ane n de ne enŋa keŋɛ mɔen ko' duŋa na dogɛ tare na bo mam la? Mam kɔ'ɔn di mɛ ba'ahɛ n bala ge te ho me kɛn'ɛra na wa. Mam me deŋɛ kan' som bahɛ a zuo. A me seren wan nyɛ som la.
34 Esau n wom a sɔ la n yele se'em la, te a bo tagurega supe. Ge yele a sɔ la yeti, N sɔ, kan' som bahɛ mam me zuo na. 35 Te a sɔ la yeti, Ho yebega la n bala wa'ana pan'ahɛ mam to'e ho kan'somɔ la. 36 Te Esau yeti, Dagɛ wana zuo te ba seren segɛ en te Yakob la? A pan'ahɛ mam la boyi' n bala. Yia a daa fan' la mam kenɔ, le to'e mam kan'somɔ wa. Ge le soke a sɔ la yeti, Bala hom ka gee kan'somɔ boyena me biŋe mam?
37 Te Isaak yele en yeti, Mam deŋɛ kan' bo en te a dɛna ho daana. Ge te a sɔɔnrɔ la woo dɛna a yamehe. Ge dekɛ ki maalegɔ la daam paalom maalegɔ kan'an woo bo en. N le yeti n eŋɛ la bem bo ho n dayɔa? 38 Te Esau le soke a sɔ la yeti, Hom ka tare kan'somɔ la koyena me wan kan' bahɛ mam me zuo? Ge kaahɛ paŋa paŋa. 39 Te Isaak yele en yeti, Ho wan zaan la tarega ho bɔŋa teŋa wa zuo. Ho wan zaan la saazuo mɛgelom. 40 Ho yeti ho tara la so'a vɔna, ge dɛna ho yebega la yameŋa. Ge la han ta woŋɛ hɔ, ho wan pakɛ a yɔgɔhɔga la ho nyugela poan bahɛ.
41 Te Esau tara diŋo la Yakob, la n pan'ahɛ to'e a kan'somɔ ba sɔ la zen'an la. Nya yele bo a mɛŋa yeti, N sɔ ka pɔnre la kum wa, a han ki' te ba pin' ba'ahɛ, n wan ko' Yakob wa.
42 Arebeka n ta wom sɛla te a bikeema la tɛn'ɛha la, te a tom yi' yebega la na yele en yeti, Ho keema Esau tare la potɛn'ɛrɛ deyema la hɔ. A gure la saŋa kayema ha te a ta ko hɔ. 43 Bala n bia, eŋɛ mam n yeti ho sɛla wa. Ihege nananawa keŋɛ n tanya Laban n boe Haran teŋa la zen'en. 44 Ta bɔna bilam gura te ho keema wa suunre ta ma'ɛn. 45 Ho keema wa suunre han ta ma'ɛn te a tamɛ sɛla te ho dekɛ eŋɛ en la, n wan tom yi' ho na. N ka bote n bɔregɛ ya zan'an bahɛ daanyenɛ.
46 Te Arebeka yele Isaak yeti, Mam nya tarege mɛ la Hiti pɔka wa. Yakob me han yeti a di pɔka teŋa wa poan te ka dɛna Hiti pɔka wo kana wa, mam ki nyane mam n vɔe.