N wan sɛ n nɔbiŋere la mam la hom teŋasoka
17
1 Abram yuuma pihiwae' la awae' poan te Na'ayenɛ nɛɛ a mɛŋa pa'alɛ en, ge yele en yeti, Mam de Pɛɛntɛɛnreba Yenɛ la. Dɔla mam, da tara tuure. 2 N wan sɛ n nɔbiŋere la mam la hom teŋasoka, ge eŋɛ ho te ho wi'ɛ zo'e.3 Te Abram pɔnrɛ na'ma ŋmɛ nu'po'ɔ. Te Yenɛ yele en yeti, 4 Mam nɔbiŋere n wana te n biŋera la ho wa. Ho yeti ho wi'ɛ mɛ te la ka tara makerɛ. 5 Bala, ho yu'urɛ kan le dɛna Abram yɛ'ɛha, de nya wan dɛna la Abraham. Se'ere n sɔe la, mam eŋɛ ho te ho dɛna la teŋhe zo'e zo'e sɔ. 6 N wan eŋɛ hɔ te ho wom velegɛ. N wan bahɛ te teŋhe ze'ele ho poan na, te nadoma ze'ele ho poan na. 7 N wan sɛ n nɔse'ere te n biŋera mam la hom la ho yaahe se'ehe n wan wa'an pooren na, la buuri saŋhe se'ehe woo n nan kene na la te de dɛna sera. N wan dɛna hom la ho yaahe se'ehe woo n wan wa'an ho pooren na la Yenɛ wuuha. 8 Kanaan teŋsɛka te ho dɛ'a saana zɛ'a ka poan zina wa, n wan dekɛ ka bo hom la ho yaahe se'ehe n wan wa'an pooren na la, te ka dɛna ya sɔ'ɔlom, te mam dɛna ya Yenɛ.
9 Yenɛ yele Abraham mɛŋa yeti, Han dɛna hom, la dela pɛnregerɛ te ho tara mam nɔbiŋere la. Hom la ho yaahe se'ehe n wan wa'an ho pooren na la zan'an. 10 Mam nɔbiŋere se'ere n boe bo hom la ho yaahe n wan wa'an ho pooren na te ya dɔla n wana. Ya han dɔgɛ bodibila woo ya ŋma ka boraanɛ. 11 Ya boraa woo ŋma, te la dɛna danlehom bo nɔbiŋere se'ere n boe mam la yamam teŋasoka wa. 12 Ya yaahe se'ehe woo n wan wa'an pooren na la, ba han dɔgɛ bodibila woo te ka paɛ dabeha anii, ba ŋma ka boraanɛ. Yameŋa woo n lagom kɛn'ɛra la ya, bii sɛba woo te ya da' la ya ligiri saama zen'an, ŋma ya ba. 13 Ba han dɔgɛ yameŋa ya yiya poan bii ya da' la yameŋa la ligiri, ŋma ya en. Mam nɔbiŋere danlehom la wan bɔna ya iŋhe poan la bala ka tara ba'ahegɔ. 14 Se'em woo n de bodibila bɔna ya poan ge han ka ŋma a boraanɛ, ya ŋmaɛ a daana ya buuri la poan bahɛ. A ka doohe mam nɔbiŋere la.
15 Te Yenɛ le yele Abraham yeti, Han dɛna ho pɔga Sarai, da le yi' en Sarai yɛ'ɛha, a yu'urɛ wan dɛna la Sarah. N wan doohe a poan bo ho dayɔa. 16 N wan kan' som bahɛ a zuo te a dɛna teŋhe ma. Teŋhe nadoma wan yehe la enŋa poan na.
17 Te Abraham pɔnrɛ na'ma ge la' ge yele a mɛŋa yeti, Mam me nya wan nyɛ bia n yuuma kɔbega wa poan, te Sarah me dɔgɛ bia a yuum pihiwae' wa poan? 18 Te Abraham yele Yenɛ yeti, Hom yeem bahɛ te Ismael bɔna ho kan'an wa poan.
19 Te Yenɛ yeti, Ɛɛn la dela bala. Ge ho pɔga Sarah wan dɔgɛ dayɔa bo ho te ho segɛ ka yu'urɛ Isaak. N wan biŋe n nɔɔrɛ la en te de ka tara ba'ahegɔ, ta paɛ a yaahe se'ehe n wan wa'an a pooren na. 20 Ge han dɛna Ismael me, n wom ya. N wan kan' som bahɛ a zuo ge bahɛ en te a wi'ɛ dɛna nadoma pia la bayi' sɔ. A wan dɛna teŋkantɛ sɔ. 21 Ge mam yeti n biŋe n nɔɔrɛ mɛ la Isaak, se'em te Sarah wan dɔgɛ en yuunse'ere n kene na wa, saŋkana wa poan la. 22 Yenɛ n tɔgɛ la Abraham ba'ahɛ la, a bahɛ en mɛ.
23 Daanden daarɛ mea te Abraham dekɛ a dayɔa Ismael la sɛba woo te ba dɔgɛ ba a yire poan bii sɛba te a da' ba la ligiri na te ba dɛna boraahe bɔna a yire la poan la, ŋma ba wo Yenɛ n bo en a nɔɔrɛ se'em la. 24 Abraham dela yuum pihiwae' la awae' ge ŋma, 25 te a dayɔa Ismael dɛna yuuma pia la atan' ge ŋma. 26 Abraham la a dayɔa Ismael zan'an lagom ŋma la daan denɛ mea. 27 Boraa woo n kɛn'ɛre a yire la poan dɛna yamehe se'ehe te ba dɔgɛ a yire la poan, la da'aba woo te a da' ba saama zen'an la zan'an lagom ŋma mɛ la en.