Abram, da zɔta dabeem
15
1 Yele ana n eŋɛ tole la, te Na'ayenɛ yelehom wa'an Abram zen'an zaanheŋɔ poan na yeti, Abram, da zɔta dabeem. Mam n de ho soka zen'an, Mam n de ho yɔɔrɛ kantɛ.2 Te Abram yele Na'ayenɛ yeti, Daana Na'ayenɛ, Hom yeti ho bo mam la bem ge te n ka tara buuri ge te Eliezer n de Damaskus teŋa nɛra wa ta yeti a sɔe mam yire wa? 3 Abram yeti, Hom ka bo mam kɔma la zuo te yameŋa ta sɔɔra mam yire wa.
4 Te Na'ayenɛ yelehom wa'an Abram zen'an na yeti, Boraa kana wa kan sɔe ho yire la. Ho mɛŋa ziim bia n yeti ka sɔe ho yire wa. 5 Gee tare Abram yehe na yele en yeti, Gorege saazuo behɛ ŋmarebibihe wa nya ho wan nyaŋɛ kanlɛ se. Ho buuri yeti ba ta zo'e la bala. 6 Te Abram nam Na'ayenɛ, te Na'ayenɛ yi' en tontɔɔ nɛra.
7 A me yele en yeti, Mam n de Na'ayenɛ tare ho ze'ele Ur teŋa n boe Kaldea sɔ'ɔlom poan la yehe na, te n dekɛ teŋa wa bo ho, te ho sɔe ka sɔna te ka dɛna ho sɔ'ɔlom yɛ'ɛha.
8 Te Abram yeti, Daana Na'ayenɛ, n wan eŋɛ la wane baŋɛ te n wan seren nyaŋɛ to'e teŋa la sɔna ka?
9 A yele en yeti, Tare nagabila la boa la pedibiga te ba zan'an dɛna yuuma atan' atan' na. Ge tara dayene la nadoma dayene paalega pa'ahɛ na.
10 Te Abram tare lɔgɔtona wa wa'an Na'ayenɛ zen'an na, ko' tɔ aanhom tɔ wanwele wanwele, nya degehɛ nɛnɔ la tagalɛ taaba biŋe. A aanhom nɛnɔ la woo la bala biŋe, ge dayɛma la ma'an te a ka aanhom. 11 Te ziiro ne ɛnkɛ na ze'ele te to di nɛnɔ la, te Abram ne dige to.
12 Te yenɛ ta yɛ'a lua, te Abram zɛɛ gɔɔm. Te lika kantɛ wa'ana pin' en. 13 Te Na'ayenɛ yele en yeti, Mina te ho yaahe ta yeti ba keŋɛ la teŋsɛka n dage ba teŋa ha, ta dɛna saama bini. Ba wan dɛna yamehe ge nyɛ namehegɔ ka poan yuuma kɔbehe senaahe. 14 Ge la kene na te mam wan ta namehɛ teŋsɛka te ba keŋɛ ta dɛna yamehe ka poan namehera la. Bala han ta wa'ana tole, ba nya wan ze'ele ka poan yehe na la tarega. 15 Ge han dɛna hom, hom wan korogɛ paɛ la ho daarɛ ge nya kule paɛ ho sɔdoma la iŋma'ahom. 16 Ho yaahe senaahe poan ha saŋa n de sɛba n wan ta lebe zen'kana wa poan na. Se'ere n sɔe la, Amoridoma toonbe'ero la nan ka perɛ paɛ bo paarɛ zen'an.
17 Te wontɛɛŋa ta lu te la nyɔnlom ba'ahɛ, te dokɔ la bugum sige na doohe nɛnɔ la zuo zan'an. 18 Daanden daarɛ, zen'kaŋa mea poan te Na'ayenɛ biŋe nɔɔrɛ la Abram yeti, Ho yaahe te n wan dekɛ teŋa wa bo. Ka wan pɔhɛ la Mizraim teŋa kolaa wa ta paɛ Euprates Kolaa kantɛ la, 19 tare ta paɛ Kendoma la Kenizdoma la Kadmondoma la 20 Hitidoma la Perizidoma la Arepadoma la 21 Amoridoma la Kanaandoma la Girgasdoma la Yebusdoma teŋhe la zan'an.