Lot lagom dole Abram
13
1 Abram n ze'ele Mizraim teŋa poan yehe se'em n bala lebe Negev pɔgɔtia la poan la a pɔga la a lɔgɔrɔ la zan'an, te Lot lagom doohe en. 2 Te Abram lebege dakanrɛ, tara dunhe la sanlenpeelega la sanlema.3 Te a ze'ele Negev pɔgɔtia la poan lomehe zen'enhe ta paɛ Betel na. Zen'sɛka n boe Betel la Ai teŋasoka te a tabelɛ tin' a sogorɛ bini 4 ge pɔhɛ mɛ' bimbine bini po'oha Na'ayenɛ la. Bilam te Abram bɔna po'oha Na'ayenɛ.
5 Lot n dole Abram ɛɛra la me tare piihe la nii la sogora mɛ. 6 Ge zen'an la pɔ'ɛ bo ba mɛ te ba kan ta'an lagom bɔna bɔberɛ yenɛ. 7 Te zaba pɔhɛ luta Abram duŋkeema la Lot duŋkeema teŋasoka. Bala ma'an, te Kanaandoma la Perizidoma n kɛn'ɛre teŋa la poan.
8 Te Abram yele Lot yeti, La ka nare to bahɛ te zaberɛ kɛn' mam la hom teŋasoka bii zaba bɔna hom duŋkeema la mam duŋkeema wa teŋasoka. To sɔe taaba mɛ. 9 Dage sɛnka n bala gan'an yɛ'ɛha wa? Bahɛ te to yelehe. Hom han keŋɛ zuɔ mam wan keŋɛ gɔbega. Hom han keŋɛ gɔbega mam wan keŋɛ zuɔ.
10 Te Lot gorege behɛ te Yordan bɔn'ɔrɔ la kɔ'ɔn ma'ɛn mɛ la yaama wo Na'ayenɛ va'am la. Ana wo Mizraim teŋa la yɛ'a Zoar teŋa la ha. Lana woo tole mɛ ge te Na'ayenɛ nya sagom Sodom la Gomora teŋhe la. 11 Te Lot loe Yordan bɔn'ɔrɔ la bo a mɛŋa, dekɛ a nɛŋa tɔ dapɔya bɔba ha keŋɛ. Boraahe seyi' wa n yelege taaba se'em n bala. 12 Te Abram bɔna Kanaan teŋa, te Lot me keŋɛ ta bɔna teŋkanra la n boe bɔn'ɔn man'aha poan la, tin' a sogorɛ lɛm Sodom teŋa. 13 Sodom teŋa boraahe tone la toonfɛn'ɛha ta ba' gaŋɛ, ge tona toonbe'kanra Na'ayenɛ nɛŋan.
14 Lot n tole ba'ahɛ la, te Na'ayenɛ yele Abram yeti, Ze'ele hom n ze' zen'an wa, la ho gorege ho zuo behɛ ho nɛŋa bɔba, la pooren la zuɔ la gɔbega zan'an. 15 Hom nyɛte teŋsɛka wa, n yeti n dekɛ ka bo la hom la ho buuri, te ka dɛna ya sɔ'ɔlom yɛ'ɛha. 16 N wan eŋɛ te ho buuri la zo'e wo teŋa wa tentɔnɔ la. Te se'em n wan nyaŋɛ kanlɛ teŋa wa tentɔnɔ, a me wan nyaŋɛ kanlɛ ho buuri la. 17 Keŋɛ ta kae teŋa la yaleŋa la ka woko zan'an behɛ ge n yeti n dekɛ ka bo ho mɛ.
18 Te Abram vɔn' a sogorɛ la keŋɛ ta kɛn'ɛra lɛm Mamre tikanra n boe Hebron teŋan, ge mɛ' bimbine bilam po'oha Na'ayenɛ.