Dioso yapëtaeya-exana Jeremías-jawabelia jiwi pijapibisiajamatabëcuene yabara
—Jehová raja jumaitsi mapacueniaje: «Pajiwi xanë Diosonëwecua siwanajamatabëcuenecopata pewënajiwijawabelia, jaitanua peyawenonaenexatsi penamatawenonaecuene, tonajumecopatajë bitso pibisiacuene petaenexa. 6 Pacuenia tsaquenapona petsewinacuata pe-ecaenaemëyo, apopexainaepeyawenonaecuenetsi, bajarapijinia pacuenia itsi tsane xanëwecua pajiwi siwanajamatabëcuenecopata pewënajiwijawabelia. Apoxainae tsane tayawenonaecuene. Nexata, bejiobicueneta ponaponaena.
7 »Itsiata baitsi jane, pajiwiyo nesiwanajamatabëcuenecopata xanë Jehovánëjawaberena, bajarapajiwiyo pexaniacuene bitso taeyabiabiana, tanejamatabëcuene-ewetaponaponaexae tayawenonaenexa. 8 Pacuenia mene-itapata penucaenae, ema aporunae-ata, baxunaxaniaba petsewimatacabita, bëpënëayareca petabunepe pexainaexae, apocuaiwerewerecaenua. Bajarapijinia pacuenia tane-itaxutuajamatejemajiwi, aponasiwajamatabëcuenebëjai tsane, pibisiacuene tocopiapatsi-atatsi, pejamatabë-ëthëtojawawetsina tanesiwanajamatabëcuenecopabixae Jehovánëjawaberena. Nexata, capitsapabiabiana tajitsipaecuenejawanë, jiwi bejiobia-exanae-atatsi.
9 »¡Maxuaje xaniawaetsia panayajiwitaema! Bitso jiwi pejamatabëcuene yamaxë-itojorobatsi,a pibisiacuene pexanaenexa, itsa peyamaxë-itojorobijawanëwecua. Bajarapajamatabëcuene cajena bitso abeje. ¿Jipatsa nexata cuenecaëjëpatsi xaniawaetsia jiwi pejamatabëcuenecanaëjëtsinexa? 10 Xanë raja, caenënë Jehovánë, jiwi tajamatabëcuenejaitsinë, tajamatabëcueneyapëtaenexa xua jiwi bëpënëa najamatabëxaina. Nexata, pexanaecujinae penajamatabëxainaecuenia, xanë juya to-exanaenajë pexaniacuene, itsa jume, naneconitsia-exanaenajë pijaneconijamatabëcuene», jai raja Jehová —jai Jeremías Judá nacuapijiwijawabelia. 11-27 […]
C18 [...]