Pacuenia Jerusalén tomarapijiwi pijawajabitsaëwi matatoyorotsia nubenaejitsia
6
Xua Jehová jumaitsi, bajaraxua Jeremías juya jumewajunupaeba Judá nacuata pejinawanapaewijawabelia:—Pitoyawitsi tsi-itorobianajë Jerusalén tomarapijiwijawabelia. Nexata, paxamë Benjamín papemomoximë, panejinawanapaewi Judá nacuata,a xania baja tsane. ¡Pajaire pewajënae pacuenia papanepaejitsiamë tananeconitsia-exanaematacabitanexa Jerusalén tomarapijiwi! Nexata, pawecuarëcëpecaename bajarapatomara. Tecoa tomaratab panejinawanapaewi panayapijiwi-obianame trompetajawa, Judá nacuapijiwi perëcëpecaenexa pijawajabitsaëwiwecua. Bajarapijinia pacuenia Bet-haquerem-jawatac panejinawanapaewi petsëxëxaneto patsita-exanaename, jiwi peyapëtaenexa pijawajabitsaëwi petsimaxëpatsijawanexatsi, tsipaji pijawajabitsaëwi tsimaxënajetarubenatsi norteneniad payenepanajawawerena, bitso pibisiacuenia pewerebiabinexatsi.
2 »Bajarapacuenia pa-exanaename, tsipaji Jehová raja jumaitsi: «Jerusalén, Sión-tsutota pe-ecaetomara, werebiabijitsianë bitso bepexaniawa taxënatoyocuenia asiwaya tataeyabiabitomarami. Bajarapacuenia taeyabiabi-atanë bajarapatomara, itsiata pijawajabitsaëwi tatsicopatsixae werebiabia-exanajë. 3 Nexata, pacuenia oveja pewetsinë exananutabiaba pijacarpabo petusatonacuatalia, jamatejema pija-ovejabitsaëto po̱na pexaewanapaenexa matatoyorotsia, bajarapacuenia Jerusalén-pijiwi pijawajabitsaëwi petuxanewi exananubiana pijacarpabonë Jerusalén matatoyorotsia. Pacuenia oveja jamatejema xaeponapona carpabo matatoyorotsia pewetsinëtsi petocopatsipo̱najawatsi, bajarapacuenia Jerusalén tomarapijiwi pematatoyorotsianubenaewitsi pijawajabitsaëwi wecuanotaponaenatsi daxitaxuanë xaina tomara matatoyorotsia, pacuenia wajabitsaëwi penamatacaitorobiwi tocopatatsi pexanaenexa. 4 Nexata, Jerusalén tomarapijiwi pijawajabitsaëwi najumaitsi tsane pejamatabëcuenebarëyanexa: ‘Nacuenexaniawaetsianatsi wajabarënabenexa bajarapatomarapijiwijawabelia. ¡Naxatsia! Barënabenatsi matonejejawa-ata,’ najai tsane.
»Bajarapaepatota, najumaitsi tsane: ‘¡Jaipe! Bitso baja nacayacaniwiyobanajetaruca ajenaconoxae. 5 Itsiata baitsi jane, barënabenatsi merawi-ata. Bajarapacuenia bijianaenatsinua bajarapamonae pijapiapiabonë, pabonëjawata nayapijiwitaeyabiaba pijawajabitsaëwiwecua,’ najai tsane», jai Jehová.
6 »Nexata, Jehová daxitawecua piacuenesaënë jamatabëcueneyawenonaeya jumaitsi tsane Jerusalén-pijiwi pijawajabitsaëwijawabelia: «Xanë raja tocaëjëtajë Jerusalén tomarapijiwi tananeconitsia-exanaenexa, tsipaji raja bajarapatomarapijiwi bitso ayaicuenia namata-enetsia nabejiobia-exanapona. Bajaraxuata, panicatsianame naejawanë, bajaraxuanëta panenatsinacuenebinexa benamutocuenia panejunaenexatsia, bajarapatomara peyacaranatanutsi-ibopanayenepanajawatsia panejunaenexa. Bajarapacuenia nexata pacatoyapëxanepanaena panejonenexalia pijatomara-ënëabelia daxita bajarapamonae panewerebiabinexa penaneconitsixae xanëjawaberena, 7 tsipaji bajarapaJerusalén tomarapijiwi bitso capitsapapona daxitacuene pibisiacuene pexanaejawanexa. Pacuenia meramëthë bacapitsapeca daxitamatacabi, bajarapacuenia bajarapatomarajawata ëpepopibisiacuene pexanawanapaejawa wënëliwaisipitsapabiaba, penacobetoxotsicuene-ata. Bajarapamonaetuatuajëtanua taeyabiabajë saya jiwi namata-enetsia penawajënërubabiabijawa penabejawata», jai tsane Jehová Jerusalén tomarapijiwi pijawajabitsaëwijawabelia.
8 »Orijibia, Jehová pacajumaitsi juya paxamë paJerusalén-tomarapijiwimë: «¡Wecae apopacatocopiapatsi abaxë patacananeconitsia-exanaejawaminexa, panacuenexanere tajitsipaecuene pataneto-exanawanapaenexamë! Bajarapacuenia itsa apopanacuenexanetsimë tsane, nexata pacawecuanatsatsianatsi patacayawenonaeyaniwa. Nexata, panijatomara pacatonacopatsiana jiwinejewa petusatonacuacuenia», pacajai Jehová paJerusalén-pijiwimë.
9 »Orijibia, padaxitamë Judá nacuata panejinawanapaewi Jehová daxitawecua bitso piacuenesaënë nejumaitsi paxamë yabara: «Paxamë pa-israelitawimë panijawajabitsaëwi pacataicaena padaxitamë. Pacuenia uvacuai penotsinë xaniawaetsia jaita daxita maxëranaxijawa penacopabiyaniwa caecuaito-ata, bajarapijinia pacuenia pacajaitsiana paxamë panenacopabiwi, papecataicaenexa panenacopatsiyaniwa caejiwiyo-ata mapanacuataje», nejai raja Jehová —jai Jeremías Judá nacuapijiwijawabelia.
10 Icatsia, Jeremías jumaitsi:
—Bajarapacuenia Jehová tanejumaitsixae, xanë Jeremíasnë jumecanawiatajë mapacueniaje: «¿Denexata pamonaejawabelia tsipaebijitsipajë bajarapaliwaisi? ¿Depamonae nenamuxuna-ewetsipa tamuxujiobiliwaisi? Bajarapamonae aponamuxuna-ewetsi tsane, pejumetaenexa mapitsiliwaisi tatsipaebijawataje. Jehová, bajarapamonae pijapibisiacuene pexanawanapaejawami muxuxatatatsi, nejumeliwaisi pejumetaeyaniwa. Nexata, bajarapamonae apocuenecaëjëpaetsi pejumetaecapanepaejawa nejumeliwaisi. Amuxujitsibi tsabiabi, apopetsitaxanepanaexaetsi bajarapaliwaisi. 11 Jehová, nebara-anaepanaecuene xanë-ata netsijamatabëcuenewënëca mapapibisiacuene pexanawanapaewijawabeliaje. Aponecuenecaëjëpae baja bajaraxua», janë xanë Jehovájawabelia. Nexata, xanë-ata Jehová nejumaitsi: «¡Bajarapabara-anaepanaejamatabëcuene wajaxainaejawabeje to-itajëre nejumaitsijawata pejewaxijawabelia, callejawa penamuxusitsiwi, pewëjëawijawabelia caejamatabëcuene pexainaewi, bajarapacuenia bitso perujujiwijawabelia-ata, bajarapacuenia peyapëtaenexa petaicaejawanexatsi pijawajabitsaë! 12 Nexata, bajarapacuenia bajarapamonae pijabonëmi, pijapabianëmi-ata, pijawaximi-ata canacopatsiana itsamonae, pewecuanaxainaeyabinexatsi pijawajabitsaëwi. Bajarapacuenia pijawajabitsaëwi to-exanaenatsi bajarapamonae. Bajarapacueneta najamatabëcuene-itajëtsianajë bajarapamonaejawabelia tananeconitsia-exanaecuene. Xanë Jehovánë bajaraxua xaniajanë tsane tato-exanaenexa.
13 »Bajarapacuenia to-exanaenajë, tsipaji daxita bajarapamonae, beweliajamatabëcuenewijawaweliacujinae, ayaijamatabëcuenewijawabelia-ata, jitsipabiaba pepitaponaenexa itsamonae pecobecowë yamaxë-itojorobiaya. Bajarapijinia daxita profetawi, sacerdotewi-ata nanaexana peyamaxë-itojorobiwi. 14 ¡Pataema! Bajarapamonae, tajajiwi, itsamonae pijaneconi natsiquejemacuenia totaeyabiaba, ayaineconi natsixainae-ata. Nexata saya, natsiquejemacuenia muxujiobabiaba. Najumetsënëtsiaya jumaitsi tsabiabi: ‘Liwaisi aponatsixainaetsi tsane. Daxitacuene saya xanepanaena. Jamatejematsi tsane,’ jai tsabiabi, itsa caranata, paepatota pewajënaeyabelia bitso ayai tsanajetarucae. 15 Picani bajarapamonae bajarapejumaitsijawa benayabara-aura tsabiabi. Itsiata baitsi jane, daxita bajarapamonae aponatoyapëtae piaurajamatabëcuene, bitso apotajitsipaecuene pexanaejamatabëcuene. Bajaraxuata, xanë pamatacabi naneconitsia-exanaenajë bajarapamonae, yajawananeconitsia-exanaenajë itsamonae xanëjawaberena penaneconitawanapaewi. Xanë Jehovánë maxua jumaitsinëje», nejai Jehová —jai Jeremías pewajunupaebijawata Judá nacuapijiwijawabelia. 16-30 […]
C7—C16 [...]