«Tajajiwi saya pejumeta bitso niasiwa tsabiabi, itsiata aponejumecowënetabiabi. Pematabacabëta yaiyataeya nubenabiaba taitabarata, itsiata pepacuene aponeyaiyatae pejamatabë-ëthëtojawawetsina. Daxita xua exana penajamatabëcuene-itajëtsinexa tane-asiwajawa, exana saya itsamonae pecujarubixaetsi. 14 Bajarapacuenia tajajiwi pexanabiabixae, pinijicuenejawanë tsita-exanaenajë tabenajacaeya-exanaenexa icatsia taneyaiyataenexa. Wecua-ajibia-exanaenajë daxita pemuxujiobiliwaisianë pamonae pecuenecaëjëpaewitsi pemuxujiobijawa. Wecua-ajibia-exanaenajënua daxita peyapëtaewi peyapëtaecuene», jai Dioso Isaías-jawabelia israelitawi yabara.
15 Orijibia Isaías jumaitsi:
—¡Bejiobi tsane pamonae canaëjëta pewecuanamatayabijawa Pepopetuxanenë, pesiwanajamatabëcanaëjëtsijawa pibisiacuene pexanaenexa, pamonaenua pibisiacuene exana pitaquirijawata Dioso petaeyaniwatsi! Bajarapamonae nawëxaniabiaya jumaitsi tsabiabi: «Pepopetuxanenë Dioso apocuenecaëjëpaetsi wajanacataejawa pitaquirijawata, nexata apoyapëtae xua exanatsi», jai tsabiabi. 16 Bajarapitsiwi pepacuene piajamatabëcuenecowëbiwi. Canaëjëre: Pepopetuxanenë Dioso jiwi pexanaenë, bajaraxuata wecua-ayaijamatabëcuenenë pexanaewi, pacuenia pefaratsinë wecua-ayaijamatabëcuenenë pefaratsiwaxi.
»¿Itsajawata pecobecowëjawa jumaitsi tsipae pexanaenëtsijawabelia: «Bajaraponë apone-exanae cajena» jai tsipae? Jume cajena.
»¿Itsajawata waxi jumaitsi tsipae pefaratsinëtsi yabara: «Ponë nefarata cobecoxanatsi cajena pefaratsicuene, nexata bijiaya ne-exana», jai tsipae? Jume cajena.
»¿Detsa xuajitsia nexata, paxamë pibisiacuenia pabaracuaicuaijamë tsabiabi Pepopetuxanenë panijaDioso? —jai Isaías. 17-24 [...]
C30-49 […]