Dioso yapëtaeya-exana Israel-pijinë pemomoxi penawiabinexa icatsia pijanacuamijawaberena
14
Isaías jumaitsi Israel-pijinë pemomoxijawabelia:—Xaniajai, itsamatacabijawabelia Jehová paca-itaxutotsoniataena icatsia Jacob-pijinë papemomoximë, icatsia papeca-asiwanexa daxita nacuanëpijiwiwecua. Nexata, pacacanawiabiana icatsia panijanacuamijawaberena, bajarajota panejinawanapaenexa. Bajarapamatacabita, itsanacuawerena peponaewi pataponaena panijanacuata, bajarajota panenajuajinawanapaenexa nacaewiriawicuenia, Jacob-pijinëmi papemomoximëcuenia panenataenexa. 2 Nexata, itsanacuanëpijiwi papecataicaewimi pexaniacuenia pacayawenonaena Israel papemomoximë panenawiabinexa panijanacuajawaberena. Nexata, pamonae pacacuene-amoneyaba picani, bajarapamonae juya pacuene-amoneyabianame. Bajarapijinia pacuenia pamonae patonacuenebawanapame amoneya bedajubiwicuenia, juya bajarapamonae pacatonacuenebawanapaena amoneyacuenia. Pijatuxanewi panaexanaename pamonaemi picani pacabejiobia-exanabiaba —jai Isaías.
Dioso tajëwelia yapëtaeya-exana Isaías Babilonia nacua pewetsinë yabara
3 Isaías capo̱capo̱naeya jumaitsi Israel-pijinë pemomoxijawabelia Babilonia nacua pepopeyanacua-ewetsinë yabara:
—Pamatacabi Jehová pacacanawiabia-exanaena paxamë Israel papemomoximë, bajarapamatacabi ajibi tsane papecabejiobia-exanabiabicuenemi Babilonia nacuapijiwi. Ajibinua tsane bajarapamonae amoneya bedajubiwicuenia panetonacuenebawanapaecuenemi. 4 Paxamë saya Babilonia nacua pepopeyanacua-ewetsinë jumecapo̱naeya pawënëcanaxëanaename mapaliwaisiyoje wajicuenia. Pajumaitsimë tsane: «¡Yera jane! ¡Taema pacuenia nacacopata baja wajanacabejiobia-exanaenëmi! ¡Yera jane! ¡Taema pacuenia cuenecopatajopa bitso ayaijamatabëcuene penataenëmi-ata!
5 »Jehová baja wecua-ajibia-exanatsi piacuenesaëjawami mapapiacujirubejenëmi nacua-ewetsinë-ata. Nexata, wajanacayanacua-ewetsijamatabëcuenemi ajibi baja.
6 »Bajaraponë anaeya yanacua-ewetabiaba pewetsinacuanë, nexata anaeya peyanacua-ewetsiwi conitabiaba copatsinejewa caematacabi canacujitsia. Aponajamatabëcuenecataitabiabi caeto-ata pibisiacuene pexanaeyaniwa peyanacua-ewetsiwijawabelia. 7 Nexata, maparucaeje daxita peyanacua-ewetsiwimi jamatejemaya jinawanapa. Barëyaya saya naxëanabiaba.
8 »Bajarapacuenia Líbano nacuata penubenaenaejawanë, cedrowirianaenë, bajarapacuenia pinowirianaenë-ata, barëya bajaraponë pecuene-amoneyabixaetsi, tsipaji ajibi baja pematatsënëa penicatabiabijiwitsi tsane.
9 »Bajarapacuenia pamonaemi nebeyaxuabiwimi necuene-amoneyabijawata, nacuanë pewetsiwimi, bajarapamonaemi cawajënae-ewetawanapa pecacopiapitsinexa nepatsixaejitsia petëpaewimi pemëthëjawabereca. 10 Bajarapamonae petëpaewimi pecacopiapitsijawata cajumaitsi tsane: ‘¡Yeee ra jane! Marajotaje cato-ajibi niacuenesaëcuenemi, juya nenacopatsinexa niasaëjibinë pacuenia paxanë. 11 Catocopiarucajopa baja ayaijamatabëcuenenë nenataeyabiabijawami. Nexata, ajibi newënëcanaxëanaeya pecatoracatsiwi árpata. Nijapexaniacamami catonaexana saya ëpetsabanaecuene, bajarapijinia pacuenia sábanapanacuenia camata-acata oro jiwixaewi. 12 Pacuenia Lucerowënëa bajayapijituluputo bitso pexanianë, bajarapijinia pacuenia xamë-ata pexaniacuenia pecayaiyataenë picani ayaijamatabëcuenenëxaemë. Itsiata, Dioso caxuabicab mabetsicaje, xamë necuene-amoneyabinëmi itsanacuanëpijiwi.’ 13 Be-ayaijamatabëcuenenëcuenia nenataexae, jamatabëjumaitsimë picani: «Junaeniajë Dioso pijataxunaejawabetsia, bajarajotatsia juya daxita Dioso pijatulupu ta-ewetsinexa athëbëtatsia. 14 Baitsi, junaeniajë pajubopënëyabetsia itaboxojawabetsia, bajarajotatsia tanaexanaenexa pepo-ayaijamatabëcuenenënë pacuenia Dioso pepo-ayaijamatabëcuenenë», jamatabëjamë picani. 15 ‘Itsiata baja, aeconoxae pepobeweliajamatabëcuenenëmë pecaxuabixaereca mapamëthëareca, pepomëthëjawabereca,’ cajai tsane mëthëta pecacopiapitsiwi», pajamë tsane wajita —jai Isaías Israel-pijinë pemomoxijawabelia Babilonia nacua pepopeyanacua-ewetsinë yabara. 16-26 […]
27 »Jehová, ponë daxitacuene pecuenecaëjëpaenëtsi, siwanajamatabëcuenewereta baja pacuenia exanaejitsia Asiria nacuapijiwijawabelia. Nexata, ajibi cajena pecuenecanaranatsiwitsi, pexanaeyaniwa pesiwanajamatabëweretsicuenia. BajaraPonë namaxërowitanuca, pijajiwi peyawenonaenexa, pecapanepaenexa Asiria nacuapijiwi pesaëwecua. Nexata, ajibi cajena pemaxëcanawiatsiwitsi, pijajiwi peyawenonaeyaniwa, pesiwanajamatabëcueneweretsicuenia. 28-32 […]
C15—C28 […]