Pibisiacuene pexanaejiwibeje pexaniacuene pexanaejiwibeje peliwaisi
10
Mapaliwaisianë Salomón capitsapa pemuxujiobiliwaisianë:Papexijiwi penaliwaisicanaëjëtsiwi, pijamonaejiwibeje bitso siwajamatabëcuenebarëyatsi. Itsiata pijinia, papexijiwi pecuenejemabijiwitsi, pijamonaejiwibeje bitso bayapijiwi-auratsi.
2 Papalata jiwi pita piabejecuene penacuenebijawata, ayaijawa topitsapae-atatsi, apocueneyawenonaetsi peyaiyataenexatsi. Itsiata, jiwi pexaniajaitsabiabixae, pexaniacuenia pexanabiabixae-ata, peyaiyataecuene xaina. Bajarapayaiyataecuene capanepaenatsi petëpaejawawecua, tsipaji bajarapacuene bitso namatamota palatawecua.
3 Jehová apocopatsi tsane pexaejawanejewa, pexaniacuene pexanabiabijiwi. Itsiata, pamonae pibisiacuene pexanabiabiwi Jehová wecuacaranatsiana xuanë picani itaxutuajitsipa pexainaejawanexa.
4 Pajiwi aponacuenebabiabi, bajarapajiwi pexainaejawa apoxainabiabi pecobecowëjawanë. Pajiwi pijinia nacuenebabiaba, xainabiaba pecobecowëjawanë.
5 Pajiwi caetuatabiaba pe-ubijawanëmi penaweretsimatabita, nacuene-itajëta bitso peyapëtaejiwicuene. Itsiata, pajiwi buta saya rurucabiaba pe-ubijawanë pecaetuatsimatacabita, nacuene-itajëta apopia-urajiwicuene.
6 Pajiwi pexaniacuene exanabiaba, Dioso pexaniacuenia yawenonaenatsi. Pajiwi ajamatabëcuenebeje pecuaicuaijawata nacuenematayata bitso papibisiacuenejawa exanaejitsia.
7 Pexaniacuene pexanaejiwi, pewënamuto itsamonae pexaniacuenia wënëliwaisicacuaicuaijaitsi tsabiabi tsane penajamatabënapitabiabijawatatsi. Itsiata, piajamatabëcuenebejewi pewënamuto bepijiayo jiwi nacofënëtsianatsi.
8 Pajiwi xaniawaetsia canaëjëtabiaba, namuxuna-ewetabiaba pemuxujiobiliwaisitsi. Pajiwi pijinia, jema cuaicuaijai tsabiabi canaëjëtsinejawa, pepopiabejecuene natotaena.
9 Pajiwi xaniajai tsabiabi, pexaniacuenia exanabiabanua, bajarapajiwiyo aliwaisijibia jamatejema ponaponaena. Pajiwi pijinia pibisiacuene jiwi pepëya exanabiaba, bajarapajiwi itsamatacabijawabelia pibisiacuene pexanaejawami wënëtaenatsi. 10-11 […]
12 Jiwi itsa jamatabëcuenewënëca pitoyajamatabëcuene, bepijiayo najume-anaenotabiaba. Juya, itsa jamatabëcuenewënëca piasiwajamatabëcuene, siwajamatabëcuenecaewabiaba itsamonaejawabelia daxita apopejitsipaecuene peto-exanaejawanëtsi, liwaisicayajatsinejewa itsamonaejawabelia. 13-17 […]
18 Pajiwi najamatabëcuenematayata pitoyajawa itsajiwi, bajarapajiwi penajumetsënëtsijiwi. Pajiwi pijinia pibisiacuenia baracuaicuaijai tsabiabi itsajiwi, bajarapajiwi apopenatsiwajënaecanaëjëtsijiwi.
19 Pajiwi itaxutojema ayaicuenia cuaicuaijai tsabiabi, belia pibisialiwaisianë yajawacuaicuaijai. Pajiwi pijinia yapëtaeya cuaicuaijaitsabiabi, liwaisi penatsiwajënaecanaëjëtsijiwi.
20 Pacuenia pepopexaniapalatananitojawa bitso namatamota, bajarapacuenia liwaisinamatamota pexaniajamatabëcuenejiwi pecuaicuaijailiwaisi. Itsiata, piajamatabëcuenebejejiwiyo paliwaisi capitsapabiaba pecuaicuaijaijawata, aliwaisimatamobi cajena.
21 Pajiwi pexaniajamatabëcuenejiwi, muxujiobabiaba pexanialiwaisita. Bajarapaliwaisi jamatabëcueneyawenonabiaba ayaibitsaëto. Itsiata, pajiwi liwaisi apopenatsiwajënaecanaëjëtsijiwi yajawatëpaena apopecanëjëtsijamatabëcuene. 22-27 […]
28 Pamonae pexaniajamatabëcuenewi copia-ewetawanapa pebarëyajamatabëcuene. Pamonae pijinia pibisiajamatabëcuenewi, jamatabëcuenenaxuabiana pexaniacuene pecopia-ewetsijawa.
29 Jehová ewetabiaba pexaniacuene pexanawanapaewi. Itsiata, tocaëjëta pewerebabiabijawa pamonae pibisiacuene pexanawanapaewi.
30 Pajiwi pexaniacuene exanaponapona, apoliwaisibijianaetsi tsane. Itsiata, pajiwi pibisiacuene exanaponapona, bajayajebi apoponaponae tsane mapanacuataje.
31 Pajiwi pexaniacuene exanaponapona, pexaniacanaëjëtsicuenia cuaicuaijai tsabiabi pemuxujiobijawata. Itsiata, pajiwi cuaicuaijai tsabiabi penajumetsënëtsiliwaisianë, peyamaxë-itojorobiliwaisianë-ata, jume-itawetsianatsi pemoyanexa bepe-ebarëtojutsinëtsicuenia.
32 Pajiwi pexaniajamatabëcuenejiwi, cuaicuaijai tsabiabi itsamonaenexa pexanepanaeliwaisianë. Itsiata, pajiwi pibisiajamatabëcuene xaina, cuaicuaijai tsabiabi itsamonaenexa piamuxujitsibiliwaisianë.