Bitso pexaniacuene jiwi petsiwajënaecanaëjëtsijamatabëcuene yapëtaeya pexanaenexa
8
Bëpënëa Dioso pecanaëjëtsijamatabëcuene ayaijumeta pacajunata padaxitanacuapijiwimë, papecajamatabëcuenecujarubinexa. Peyapëtaejamatabëcuenenua jamatabëcueneyanatsiaya pacawawajai, xaniawaetsia paneyapëtaenexa panejinawanapaecuene.2 Bajarapacuenia paxamë xaniawaetsia panecanaëjëtsijamatabëcuene panexainaenexa, bepapecawawajai tsanucaea petsutojumawetsica,b itsajota-ata anijanamutobeje na-epacaxinabeje. 3 Bajarapacuenia-ata tomarajawabelia pejonebaupajawata bepapecawawajai tsanucae mapacueniaje:
4 «Paxamë padaxitanacuapijiwimë pacajunatatsi patacajumaitsinexa mapajumenë. 5 Pacajunatatsi apopaneyapëtaewi pane-exanaecuenenexa, pejewaxijamatabëcuene-ata panexainaewi. Pacajunatatsi patacayapëtaeya-exanaenexa, nacuenecanaëjëtsiaya panejinawanapaenexa.
6 »Panejumetaema, tsipaji xua pacajumaitsijitsiatsi bitso penamatamotsijumenë, pepoperowialiwaisianë-ata. 7 Xua pacajumaitsijitsiatsi pexaniajailiwaisi cajena, tsipaji xanë nawecua-ataejitsibinë tsabiabi tacuaicuaijainexa penajumetsënëtsiliwaisianë. 8 Daxita paliwaisianë pacajumaitsitsi, bitso cajena pexaniajailiwaisianë. Caejawa-ata apoxainae peyamaxë-itojorobicuene.
9 »Pamonae bitso bepijiayo peyapëtaewi, pejumeyapëtaewi-ata, tajumaitsijumenë tsitajumenapebetatsi. Tsitaxaniajaitsinua.
10 »Bajaraxuata, matatoxenetsia asiwaya pataema patacamuxujiobiliwaisianë, patacacujarubiliwaisianënua, panejitsipaejawawecua palatananijawanë, oronanijawanë, bitso pexaniawiriajawanë-ata.
11 »Bitso toxanepanatsi cajena jiwi pexainaejawa xaniawaetsia pecanaëjëtsijamatabëcuene pexainaejawawecua pexaniawirianamatamotsi-ibotoxi. Ajibi itsacuenejawa xua yabara siwajamatabëcuenebëjaijitsia bajarapajamatabëcuenewecua jiwi pexainaejawanexa, tsipaji bajarapajamatabëcueneliwaisi bitso namatamota itsacuenejawanë jiwi pejitsipaejawanëwecua», bepapecajai tsabiabi Dioso pecanaëjëtsijamatabëcuene papecajunatsijawata. […]