SALMO 139
Dioso daxitajawa peponaponaejawa, daxitacuene-ata peyapëtaejawa peliwaisi
Peyanacua-ewetsinë David-pijinë peyaquinaesalmo.
1 Jehová, xanë nejamatabëcuenetaneme. Nexata, xaniawaetsia nejamatabëcueneyapëtaneme.
2 Neyapëtaneme daxita xua exanabiabajë. Nexata, yapëtaneme ta-ecae-epato, tanonotapunae-epato-ata. Tajë ponaponae-atanë xamëwecua, tajëwerena nejamatabëcueneyapëtaneme.
3 Netaneme tanajetarucaejawata namutua, tanacuera-ewetarucaejawata-ata. Daxita xua exanabiabajë, yapëtaneme.
4 Daxita tajumaitsiliwaisinexa, tajumaitsiwajënaeya, yapëtaneme.
5 Nematatoyorotsiaponaponame. Tawajënaewerena, tacowëwerena-ata, nesaëta ne-ewetaponaponame.
6 Xamë daxitacuene neyapëtaejawa. Ayaijamatabëcuenenëmë bitso. Nexata, aponecaëjëpae xaniawaetsia tacajamatabëcueneyapëtaenexa pacuenia jamatabëcuene-itsimë daxitacuene yabara.
7 ¿Detsa belia ponaejitsipajë tajë nijaEspíritu Santowecua, itsajota bajaraPonë apoponaponae? ¡Ajibi cajena! ¿Detsa belia cawecuanajetabijirawijitsipatsi? ¡Ajibi tacawecuanajetabijirawijawabelia!
8 Itsa ponaejitsipajë tajëbetsia, athëbëabetsia, bajarajotatsia ponaponame. Itsa ponaejitsipajë tajëbereca, iratuatuajëabereca, bajarajotareca-ata ponaponame. 9-10 Itsa pënaponaejitsipajë matacabipijijuameto, tapatsinexa manuamenetabuyabereca, bajarajotareca-ata ponaponame. Nexata, bajarajotareca-ata xaniawaetsia ne-ewetsipame ta-itsacueneyaniwa.
11-12 Itsa jumaitsinë tsipae: «Merawi raeta, piaitaquirijawata, Dioso aponetae tsane», itsa janë tsipae, itsiata xamë netaejitsipame, tsipaji merawi-ata apocatsitamerawi. Merawi piaitaquirijawata-ata, apocawecuanacaranatsitsi tsipae, tsipaji merawi-ata catsitanapebeta pacuenia matacabita. Merawi, matacabi-ata, catsitanajëpabeje.
13 Bajayata xanënexa taena itsa nenacoxita, xamë ne-exaname taena pecototota. Xaniawaetsia ne-exaname daxita taperabëto, tajamatabëcuene yajawa.
14 Barëyanë bitso xamëjawabelia, tsipaji pexaniacuenia bitso ne-exaname. Bitso cajena pexaniacuene daxita nexanaejawa. Bajarapacuenia tane-exanaexaemë pexaniacuene carajutabiabatsi.
15 Taena pecototota, itsajota daxitajiwi aponetae tawitsabaponaejawa, xamë caenëmë netaneme.
16 Itsa abaxë aponaexanaenë taena pecototowecua, xamë netaneme. Naexanaenejewanë abaxë, nijabaxutota yaquinarutame pamatacabibeje ponaponaejitsianë.
17 Netsitaxanepana bitso nenajamatabëxainaecuene. Nawita bitso tanesiwanajamatabëxainaecuenemë.
18 Itsa namata-ëjëtsipajë tanesiwanajamatabëxainaecuenemë, nawitsipa bitso tajetabo-atsatoxi matatoxenetsia. Itsa naëcotajë tamajitsicujinae, tsiteca cayajawatsi.
19 ¡Dioso, werebiabare pibisiacuene pexanaewi! ¡Jiwibewi newecuatixire! 20 Bajarapamonae cabaranatsipaeba pibisiacuenia. Pibisiacuenia cawënëjona nijawajabitsaë.
21 Jehová, xanë itoyanë pamonae ca-itoya. Itoyanë pamonae catsimaxënajamatabëwereta, 22 tsipaji nijawajabitsaë xanë-ata tajawajabitsaë.
23 ¡Dioso, nejamatabëcuenetaema tanejamatabëcueneyapëtaenexamë! ¡Nejamatabëcuene-ëjëre neyapëtaenexa pacuenia jamatabëcuene-itsinë!
24 Itsa taneme itsacuene ta-exanaejawa, xua aponejitsipaecuene, neyapëtaeya-exanaename. Neyapëtaeya-exanaename nejitsipaecuene ta-exanaenexa.
C140—C145 […]