SALMO 127
Daxitacuene yabara Dioso wajanacayawenonaenexa, wajanamatawenonaejawa peliwaisi
1 Itsajiwi itsa nacueneba itsacuenejawa, xanepana pewajëtsinexa Jehovájawabelia, bajaraPonë peyawenonaenexatsi. Nexata, bo pexanaewi xanepana pewajëtsinexa Jehovájawabelia, peyawenonaenexatsi, bo pexanaejawa peweretetsicujinae peto-itsacueneyaniwatsi. Patomarapijiwi apowajëtsi Jehovájawabelia, bajarapatomarapijiwi bajaraPonë apoyawenonae tsipae. Nexata, bajarapatomarapijiwiyajuwënëjiwi majitsinejewa, merawijebi pijawajabitsaë copia-ewetsi-ata tsipae pijatomaraberena picani petsimaxëjoneyaniwatsi, itsiata tsimaxëjonejitsipatsi. 2 Itsamonae ëpexaejawa pesiwanacuenebinexa, yananianabiaba. Nexata, itsa nacueneba, merawi-ata abaxë nacuenebabiaba. Aponacuera-ewetabiabi. Nexata penacuenebijawa, bitso cueranabiaba. Itsiata, Dioso piasiwawi, merawi yajawa aponacuenebi-ata, aponamatawenonae pexaejawanexa.
3 Jehová wajanaca-asiwaxae, papejewaxi xainatsi, bajaraPonë nacarajuta. 4 Pacuenia wajabitsaënë cuererebonë cobenanuca pijawajabitsaë pewajënae-ewetanucaejawata, bajara-itsi papejewaxi Jehová nacarajuta itsa abaxë pejanajiwitsi, tsipaji bajarapamonae caëjëpatsi wajanacajamatabëcueneyawenonaenexa itsamonae itsa nacatsimaxëpata. 5 ¡Ponë pexi ayaibitsaëto xaina, barëya, tsipaji apocuene-amoneyabitsi tsane pijawajabitsaë, neconitsi-atatsi juez-nëjawabelia!
C128—C138 […]