SALMO 119
Pamonae jumecowënëta Dioso penajumecopatsiliwaisi Moisés-pijinëta, pejamatabëcuenebarëyajawa peliwaisi
1 Bitso jamatabëcuenebarëya, pamonae jumecowënëtawanapa Jehová penajumecopatsiliwaisi Moisés-pijinëta, aneconijibianua jinawanapa bajaraPonë pitabarata.
2 Bitso jamatabëcuenebarëya pamonae jumecowënëtawanapa Jehová pitorobiliwaisianë, daxita pejamatabë-ëthëtojawawetsina pejaitsiwi caejamatabëcuene pexainaenexa Jehovájawabelia. 3 Bajarapitsijamatabëcuene pexainaewi apo-exanae itsapibisiacuenejawa-ata. Biji rajane, jumecowënëtawanapa pacuenia Jehová itorobatsi.
4 Jehovámë, panetonajumecopatame nejumeliwaisi, xaniawaetsia patajumecowënëtawanapaenexa. 5 ¡Ayaicuenia jitsipajë picani bajarapaliwaisi pexaniajaicuenia tajumecowënëtaponaponaenexa! 6 Bajarapacuenia itsa exanaponaponaejitsipajë bajarapaliwaisi tane-itorobicuenia, apo-auranë tsipae daxita bajarapaliwaisi tanajamatabënapitsijawata.
7 Jehovámë, xaniawaetsia nejumeliwaisi taneyapëtaeya-exanaecujinaemë pexaniajaicuene, tanecuenexanetsijawatanua, matapania jane baja, necuenecaëjëpaena tacawënëxaniatsinexa taxaniajaijamatabëcueneta. 8 ¡Jumecowënëtaponaponaenajë nitorobiliwaisianë! ¡Pëtsa nexuabame daxitamatacabijawabelianexa!
9 ¿Detsa pacuenia pewëjëato caëjëpaejitsipatsi aneconijibia peponaponaenexa? Bajaraponë itsa jumecowënëtsipa pacuenia nijumeliwaisi itorobatsi, aneconijibia ponaponaejitsipa.
10 Jitsipajë taca-imoxoyotsijawa daxita tajamatabëcueneta. ¡Pëtsa necopatame nejumeliwaisita tane-itorobicueniamë saicayacuenia taponaponaeyaniwa! 11 Jehová, tajamatabë-ëthëtota jamatabënaponaponajë nejumeliwaisi, pibisiacuene ta-exanaeyaniwa, tananeconitsiyaniwa xamëjawabelia. 12 Pexaniajamatabëcuene carajutatsi nijumeliwaisi yabara. ¡Necujarubare tajumecowënëtabiabinexa daxita nenajumecopatsiliwaisianë! 13 Tacuaibowojotota tsipaebajë baja itsamonaejawabelia, daxita pacuenia xamë itorobame jiwi pexanawanapaenexa. 14 Tajumecowënëtsijawa nenajumecopatsiliwaisianë Moisés-pijinëta bitso nejamatabëcuenebarëyaya-exana, taxainaejawawecua ayaijawa tacobecowë, palata-ata. 15 Tajamatabë-ëthëtota siwacanaëjëtaponaenajë nitorobiliwaisianë yabara, namuxuna-ewetabiabianajë nenajumecopatsiliwaisi, bajarapacuenia ta-exanaponaponaenexa. 16 Siwajamatabëcuenebarëyanë tsaponaponae tsane daxita nitorobiliwaisianë. Aponacofënëtsinë tsane caeliwaisiyo-ata.
17 ¡Tajatuxanenë, neyawenonaponare, tanecaëjëpabiabinexa tacajumecowënëtsijawa! 18 ¡Neyapëtaeya-exanare, xaniawaetsia tayapëtaenexa papinijijamatabëcuene xaina nejumeliwaisi! 19 Xanë saya cae-epatoyonexa ponaponajë mapanacuataje. ¡Pëtsa newecuamatayatame nejumeliwaisi! 20 Daxitamatacabi bitso nejamatabëcuene-enabiaba, xaniawaetsia tayapëtaenexa nejumeliwaisi.
21 Xamë itawetame ayaijamatabëcuenewi penataewi pecopabinexa pibisiacuene pexanabiabijawa. Bajarapamonae naneconitsia-exanaename apopejumecowënëtsixae nejumeliwaisi. 22 ¡Pëtsa copatame bajarapamonae, tanecapo̱capo̱naenexa tacajumecowënëtsixae! 23 Petuxanewi pibisiacuenia nebaracuaicuaijai-ata, itsiata jamatabënaponaponabiabianajë nejumeliwaisi. 24 Xanë bitso siwabarëyanë nejumeliwaisi. Nemuxujiobabiaba nejumeliwaisi. 25-96 […]
97 ¡Xamë, Jehovámë, nenajumecopatsiliwaisi bitso cajena ayaicuenia xanë asiwanë! ¡Daxitamatacabi bajarapaliwaisita natocanaëjëtabiabajë!
98 Nitorobiliwaisianë nejamatabëcueneyawenona, bitso pexaniacuenia tacanaëjëtsinënexa tajawajabitsaëwecua, tsipaji bajarapaliwaisianë caematacabi canacujitsia yajawaponaponajë.
99 Bajarapaliwaisi pejamatabëcueneta, xaniawaetsia natoyapëtaniji tacanaëjëtsicuene daxita tanecujarubiwiwecua, tsipaji bëpënëa canaëjëtaponaponajë tanejamatabëcuenematacaponaenexa.
100 Bajarapaliwaisi pejamatabëcueneta, naexanajë bitso tayapëtaenënexa penaweretsiwiwecua, tsipaji jumecowënëtabiabajë pacuenia nitoroba.
101 Xaniawaetsia tajumecowënëtaponaponaenexa nitorobiliwaisi, nacuene-ewetaponaponajë pibisiacuene ta-exanaeyaniwa.
102 Xanë aponawecuatsatsinë nenajumecopatsiliwaisi, tsipaji raja xamë tanecujarubinëmë bajarapaliwaisi.
103 Najumecapanepaeya nejumaitsiliwaisi tajumetaejawata bitso netsita pexaicaeliwaisi, banara pexaicaejawa matatoxenetsia.
104 Nitorobiliwaisianë pejamatabëcueneta, bitso tayapëtaenë naexanaponajë. Bajaraxuata, daxita penajumetsënëtsiliwaisianë nawecua-itoyanë, tatsipaebiyaniwa, tajumexaniataeyaniwanua.
105 Nejumeliwaisi baja cajena netojëpa lámpara tanetsiwajënae-itayotsinexa, tanematacaponaenexanua itsaxuayo najetarucaejitsianë. Nexata, neyapëtaeya-exana xaniawaetsia taponaponaenexa Xamë nitabarata. 106-176 […]
C120 […]