SALMO 115
WajaDioso peponaponaejawa athëbëtatsia peliwaisi
1 Jehová, pepacuene apoxanepanae cajena ëjiwi penawënëxaniatsijawa. Biji rajane, jiwi toxanepanatsi ëxamë pecawënëxaniatabiabijawa, tsipaji xamë asiwaya yawenonabiabame. Paxanë panijajiwi paneto-exanabiabamenua daxita pacuenia najumecapanepaeya panejumaitsimë. 2 Bajaraxuata, apotoxanepanaetsi pamonae apopecayapëtaewi Jehovámë, pejumaitsitsabiabijawa paxanë yabara: «¿Detsa jota ponapona pijaDioso israelitawi?», pejaitsabiabijawa cuene-aebiaya.
3 WajaDioso athëbëtatsia ponapona. Exanaponapona xua tsitaxanepanatsi pexanaejawa. 4 Itsiata, pamonae apopecayapëtaewi, natonacuenebabiaba pecobeta, jumapecataenëanë palatananitota, oronanitota-ata, pesiwanajamatabëcuenecopatabiabinexa bajarapajumapecataenëanëjawabelia bediosowicuenia. 5 Bajarapajumapecataenëanë xainae-ata picani pecuaibo, apocuaicuaijai. Xainae-ata picani pitaxutobeje, apotae. 6 Xainae-ata picani pemuxuwojotobeje, apojumetae. Xainae-ata picani pepumu, apotuxuni. 7 Xainae-ata picani pecobebeje, apowaetabi. Xainae-ata picani petaxubeje-ata, apoponaponae. Pecuaibowojotojawawetsina apopitsapae itsajumeyo-ata. Nexata, apoxanepanae itsacuenejawayonexa-ata. 8 Pamonae exana bajarapajumapecataenëanë, pamonae-ata siwanajamatabëcuenecopatabiaba bajaraxuanëjawabelia, cuene-amatamobi tsane pepitsinexa xua namatawenona, pacuenia bajarapajumapecataenë acuenematamobi Jehová pitabarata.
9 ¡Israel papemomoximë, pasiwanajamatabëcuenecopabare Jehovájawabelia! Bajara-ëPonë baja cajena nacayawenonabiaba. Nacacaranatabiabanua itsacuenewecua.
10 ¡Paxamë, pasacerdotewimë, pasiwanajamatabëcuenecopabare Jehovájawabelia! Bajara-ëPonë baja cajena nacayawenonabiaba. Nacacaranatabiabanua itsacuenewecua.
11 ¡Paxamë Jehová paneyaiyataewi, pasiwanajamatabëcuenecopabare bajaraPonëjawabelia! Bajara-ëPonë baja cajena nacayawenonabiaba. Nacacaranatabiabanua itsacuenewecua.
12 Jehová raja nacanajamatabënapitabiaba, wajanacato-exanaenexa najumecapanepaeya pejumaitsicowëya. Nexata, nacayawenonabiabiana. Israel-pijinë pemomoxitsi nacayawenonabiabiana. Sacerdotewi-ata yawenonabiabianatsi. 13 Pamonae yaiyatane Jehová, pexaniacuenia juya yawenonabiabianatsi, bepejiobiwi, petuxanewi-ata.
14 Pacatojitsipatsi Jehová pexaniacuenia papecayawenonaejawa panexi ayaibitsaëtoxanetonë panexainaponaenexa, panewajënaeyabelia panemomoxi-ata ayaibitsaëtoxaneto penaexanaponaenexa. 15 Pacatojitsipatsinua Jehová, ponë pexanaenë ira, itaboxo yajawa, panewajënaeyabelia pexaniacuenia papecayawenonabiabinexa.
16 Itaboxo raja Jehová pijajawa. Juya rajuta mapanacuaje daxitajiwijawabelia. 17 Pajiwi baja tëpa, moya boca, tsipaji acuenebi pecuaicuaijaijawa. Nexata, apocaëjëpaetsi pewënëxaniatsijawa Jehovájawabelia. 18 Itsiata, waxaitsi pexaniacuenia wënëxaniatsianatsi Jehová daxitamatacabijawabelianexa ayaijamatabëcuene pexainaejawa yabara.
C116—C117 […]