SALMO 106
Dioso yawenonabiaba Israel-pijinë pemomoxi, pibisiacuene exanabiabi-ata
1 Wënëxaniatsianatsi Jehová, tsipaji pexaniajamatabëcuenenë. Pitaxutotsoniataejamatabëcuene tsitecaena daxitamatacabijawabelia.
2 ¡Caejiwi-ata apocuenecaëjëpaetsi xaniawaetsia pecuenewajunupaebinexa Jehová papinijisaëta xua exana! ¡Caejiwi-ata apocuenecaëjëpaetsi pexaniacuenia pewënëxaniatsinexa Jehová, pacuenia picani tsixanepanatsi peto-exanabiabinexatsi!
3 Pamonae catsitecawanapa pexanaejawa ëpexaniacuenejawanë, jamatabëcuenebarëya tsawanapae tsane.
4 Jehová, nenajamatabënapire paepatota pexaniacuene to-exanaejitsiamë nijajiwi. Nexata, necapanepaejawata nijajiwi, xanë-ata necapanepaename. 5 Daxita xua neyawenonaecuene nijajiwi, nitapetsiwi, bitso jitsipajë patanajuacabarëyajawa. Nexata pacanajuawënëxaniatsianatsi pataneyawenonaejawamë yabara.
6 Pacuenia patajasalinaiwimi pibisiacuene exanawanapa, bajarapijinia pacuenia paxanë-ata pa-exanabiabajë. Pibisiacuene pa-exanabiabajënua, bitso pepopiabejecuenejawanë-ata.
7 Patajasalinaiwimi cacuenetae-ata pexaniacuenia neyawenonaejawa Egipto nacuata, itsiata apotsitanamatamotsitsi papexaniacuenejawanë to-exaname. Mar Rojo manuamene-itapata nacofënëta daxita asiwaya neyawenonaejawami. Caranata bajarajota cabara-anaepana. 8 Itsiata baitsi jane, Jehovámë, capanepame bajarapamonaemi, nenajamatabëcuene-itajëtsinexa bitso pinijisaë nexainaenëcuene, xaniawaetsia jiwi pecawënëcacuaicuaijainexa bajaraxua yabara.
9 Nexata xamë itorobame petsewinexa peyacaranatsijawami Mar Rojo manuamene. Bajarapacuenia copatame nijajiwi pexaniatsewitusatojawalia penicabinexa bajarapamanuamenetuatuajëalia. 10 Nexata bajarapacuenia, xamë capanepame pitoyawitsi pecobewecua, bajarapacuenia-ata pijawajabitsaëwecua. 11 Daxita pijawajabitsaëwimi matacënëbia-exaname merata pebubunaenexa. Bajarapamonaemi caenë-ata apo-asaë tsaponaponae. 12 Bajarajota patajasalinaiwimi matapania cajumexaniatane najumecapanepaeya nejumaitsijawami. Pecacuenetaecujinae, bajarapamonae cawënëcanaxëanaa pexaniacuenia.
13 Itsiata, bajarapamonae bepijia nacofënëta netsita-exanaejawanëmi. Apocajamatabëcuene-ewetsi neyapëtaeya-exanaeliwaisianënexa pacuenia exanawanapaejitsia.
14 Nexata petsewinacuata pejinawanapaejawata, Diosomë cajamatabëcuene-ëjëbabiaba, daxita pejamatabëcuenesaëta cawajëcabiaba neto-exanaenexa penatojitsipaejawanë. 15 Nexata, Diosomë, to-exanabiabame picani xua ca-itoroba, itsiata yajawatsi-itorobame peyatëpaewitanenexa. 16-42 […]
43 Jehovámë, patajasalinaiwi capanepabiabame bajayajebi. Bajarapacuenia to-exanae-atamë, bajarapamonae ajamatabëcuenetajaya wecuaponabiaba netojumecopatsiliwaisi. Bajarapapibisiacuene jamatabëcuene-amoneyabatsi, orijibia bitso pibisiacuene pexanawanapaenexa. 44 Bajarapacuenia cato-exanae-ata, xamë itsiata bejiobiataneme pebejiobia-exanaejawatatsi. Nexata, xaniawaetsia jumetaneme bajarapamonae nasiwayabëjaiya pecawajëcaejawata. 45 Bajarajota, najamatabënapitame nenajumeliwaisicajonejawami bajarapamonaejawabelia. Nexata, nebejiobiataejawata bajarapamonae wecuatixitame nenaneconitsia-exanaejawa, tsipaji xamë bitso jiwi nitaxutotsoniataenë. 46 Orijibia, pamonae israelitawiyajuwënëwi petaicaewimitsi, bajarapamonaenua tocopatame pijawajabitsaë pitaxutotsoniataenexatsi.
47 ¡Panecapanepare, Jehová Dioso! ¡Panecaetuare patajanacuayaberena itsanacuanëjawa patanecayajatsicujinae, patacawënëxaniatawanapaenexa, patanabarëya-exanaenexa patacawënëxaniatsijawata!
48 ¡Asiwaya pawënëxaniare Jehová, Israel-pijinë pemomoxi pijaDioso, nacua pexanaewajënaeya daxitamatacabijawabelianexa-ata! «¡Bajara-itsi tsane», padaxitamë pajamëre! ¡Pawënëxaniare Jehová!
C107—C114 […]