SALMO 103
Jiwijawabelia Dioso pexaniacuene peto-exanaexae, Diosojawabelia jiwi pejamatabëcuenebarëyajawa peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Tajamatabëcuenewetsina wënëxaniatsianajë Jehová ayaijamatabëcuenenë yabara. Daxita tajamatabëcueneta bajaraPonë pewënë yaiyataeya-exanaenajënua. 2 Tajamatabëcuenewetsina wënëxaniatsianajë Jehová taneyawenonaejawa yabara. Aponacofënëtsinë tsane daxita papexaniacuene bajaraPonë neto-exanabiaba.
3 Jehová baja newecua-ajibia-exana daxita pibisiacuene ta-exanaeneconimi. Nejamatejemaya-exananua baja daxita tawitanejawami. 4 Necapanepa tatëpaejawaminexawecua. Nitaxutotsoniataeyabiaba. Niasiwanua tsabiabi. 5 Jehová pexaniacuene nerajutabiaba. Nejamatabëcuene-asaëya-exanabiaba. Pacuenia amaru perujunë-ata, apocorofecueranae, bajarata-itsinexa bajaraPonë nejamatabëcuene-asaëya-exanabiaba tajamatabëcuenecueranaejawami.
6 Pajiwi itsamonae bejiobia-exanatsi, bajarapajiwi Jehová yapijiwiyawenonabiaba, pexaniajamatabëcueneta. 7 Bajayata xuanë ayaicuene Jehová exanaejitsia, bajaraxuanë copiata tsipaeba Moisés-jawabelia. Bajaraxuacujinae, ayaicuene bajaraPonë pexanaejawanë, tsitajëta Israel-pijinë pemomoxi. 8 Jehová raja jiwi pitaxutotsoniataenë. Pexaniajamatabëcuenenënua. Bepijia bajaraPonë apo-anaepanae. Ayaicuenia naca-asiwa.
9 «¿Detsa xuajitsia pibisiacuene exaname?», aponacajai napëna. BajaraPonë apo-anaetsitecae bajayajebi. 10 Ayaineconi raja picani xainatsi pibisiacuene waja-exanaeneconi. Itsiata, ayaicuenia Jehová aponacananeconitsia-exanae pacuenia nacatocaëjëta wajanacato-exanaenexa wajaneconijamatabëcuene. 11 Bajarapacuenia exana, tsipaji pacuenia ayaitusatoxaneto nacopataruca itaboxo, mapa-iraje tuatuajëta bajarapitsipinijicuenia bajaraPonë asiwa peyaiyataewitsi. 12 Pacuenia nacuatabubeje bitso nawecuatajëbeje, bajarapijinia pacuenia bitso tajë Jehová nacawecuaxuaba pibisiacuene waja-exanaeneconimi. 13 Pacuenia pexi pexainaenë, itaxutotsoniatane pexi, bajarapijinia pacuenia Jehová itaxutotsoniatane pamonae yaiyatanetsi. 14 Bajarapacuenia nacato-exana, tsipaji bajaraPonë yapëtane apowaja-aperabësaëjawa. Aponacofënëtsi atsatota wajanaca-exanaecuene.
15 Pacuenia wayafopijimatonoto pijamatacabianë apotonawitsitsi bajayajebi perucaenexa, bajarapijinia itsitsi jiwitsi-ata. 16 Pematonoto saya aitabë cae-epatoyonexa. Bajaraxuacujinae tsaquena. Jowibota caputatsi. Nexata baja, pematonoto aponamatacotsi icatsia. Bajarapijinia itsi jiwi-ata. Cae-epatoyo saya ponapona. 17 Jehová cajena daxitamatacabijawabelianexa piasiwanë pamonae yaiyatanetsi. Nexata, tsiteca pewajënaeyabelia itaxutotsoniataeyabiabiana bajarapamonae, pemomoxijawabelia-ata. 18 Pamonae exana pacuenia Jehová itoroba, bajarapamonae itaxutotsoniataeyabiaba. Pamonae aponacofënëtsi Dioso penajumecopatsiliwaisi Moisés-pijinëta, pitorobicueniatsi pexanaenexa, bajarapamonae itaxutotsoniataeyabiaba.
19 Jehová raja daxitacuene pepopewetsinë athëbëwetsica. Nexata, pepopitorobinë tsaponaponae daxitanacuanëpijiwi. 20 Paxamë Jehová papija-ángelewimë, ayaijamatabëcuene panexainaewi, pacuenia bajaraPonë paca-itoroba, pa-exanabiabame. Nexata, pexaniacuenia pawënëxaniatabiabianame bitso ayaijamatabëcuenenë yabara. 21 Paxamë-ata Jehová papijajiwibitsaëtoxanetomë, pajamatabëcuene-ewetabiabame. Pacuenia pacatojitsipa, pa-exanabiabame. Paxamë-ata pexaniacuenia pawënëxaniatabiabianame bitso ayaijamatabëcuenenë yabara. 22 Paxamë-ata Jehová papeca-exanaenëxi, bajaraPonë pexanaenacuata panejinawanapaenëxi, pexaniacuenia pawënëxaniatabiabianame bitso ayaijamatabëcuenenë yabara.
¡Xanë-ata tajamatabë-ëthëtowetsina pexaniacuenia wënëxaniatsianajë Jehová bitso ayaijamatabëcuenenë yabara!
C104—C105 […]