SALMO 91
Wajawajabitsaë wajanaca-itsacueniabiyaniwa, Dioso wajanacacaranatsijawa peliwaisi
1 Pajiwi itaxutuajamatejemaya yajawaponapona Dioso, Ponë ayaijamatabëcuenenë daxitawecua, bajarapajiwi ewetabiabatsi daxita pibisiacuenewecua. 2 Nexata, jumaitsi tsabiabi Jehovájawabelia: «Xamë raja tane-ewetsinëmë, tanewecuatorotsinëmënua daxita pibisiacuenewecua. Xamë raja tajaDiosomë, Ponëjawabelia siwanajamatabëcuenecopatabiabajë tane-ewetsinexamë», jai tsabiabi. 3 Caenë Dioso raja wajanacacapanepaenë wajawajabitsaëwecua, namuetsia nacawajënae-ewetsi-ata wajanacabeyaxuabinexa, wajanacacapanepaenënexanua jiwi peyatëpaedomae-atawecua. 4 Pacuenia wacara pexi bacaranateca pecorofetota, bajarapijinia pacuenia, Dioso nacacaranatsiana daxita pibisiacuenewecua. Pacuenia wajabitsaënë pija-escudopanata nacaranata pejorojoronaeyaniwatsi pijawajabitsaë, bajarapijinia pacuenia, Dioso nacacaranatsiana daxita pibisiacuenewecua, wajanacajumaitsicuenia waja-itaxutuajamatejemaxae. 5 Bajarapacuenia wajanacajumaitsixae, apocujunawitsi tsane matacabita, merawi-ata, nacatsi-ayai-ata itsacuene. 6 Apocujunawitsinua tsane jiwi peyatëpaedomae-ata, daxitanacuanëjawa peyacaëjëpaedomae, nacatocopiapatsi-ata merawituatuajëta, itsa jume, matoneje-epatota-ata tsane.
7 Yatëpae-ata tsane bajarapadomae imoxoyo wajamuxuneneta pe-enaewi, mil pajiwibeje, diez mil pajiwibeje-ata, itsiata aponacatocopiapatsi tsane waxaitsijawaberena. 8 Bajarapacuene saya taenatsi waja-itaxutota. Taenatsi Dioso penaneconitsia-exanaejawa pibisiacuene pexanaewi.
9 Wajasiwanajamatabëcuenecopatsixae Jehovájawabelia wajanaca-ewetsinexa, wajaxainaexae ayaijamatabëcuenenë Dioso wajanacacuenecaranatsinënexa, 10 nexata aponacacuene-amoneyabi tsane itsacuene piayaicuenejawanë-ata. Jiwi peyatëpaedomae-ata aponaca-imoxoyotsi tsane wajajinawanapaebojawata. 11 Bajarapacuenia apotaetsi tsane, tsipaji Dioso raja itorobiana pija-ángelewi, wajanaca-ewetsinexa. Nexata, bajarapamonae naca-ewetabiabiana daxitajawa itsajota jinawanapatsi. 12 Ángelewi pecobeta nacayotsiana wajanacataxutsaquitsiyaniwa ibotonëjawabelia.a 13 Newëthë-ata aponaca-itsacueniabi tsane. Pianaepanaenë jomo, nacasini-ata, aponaca-itsacueniabi tsane.
14 Jehová nacajumaitsi: «Pajiwi xanë niasiwa, nesiwanajamatabëcuenecopatanua Xanëjawaberena tayawenonaenexa, bajarapajiwi capanepaenajë. Caranatsianajënua piayaicuenewecua, taneyapëtaejiwixae.
15 »Bajarapitsijiwi itsa nejunatsiana, jumepitsianajë. Paepatota jamatabëcuenebëjai itsacuene yabara, yajawanë tsane. Bajarapacuenewecua yawenonaenajë pepanepaenexa. Tocopatsianajënua jiwi peyaiyataenexatsi. 16 Bajarapitsijiwi tocopatsianajë mapanacuataje bajayajebi piasaëtsaponaponaenexa. Capanepaenajënua tajanacuayabetsia», jai Jehová.
C92—C94 […]