SALMO 78
Bajayata Israel-pijinë pemomoxi Dioso peyawenonaejawa peliwaisi
1 Tajamonae, panenamuxuna-ewetsianame paliwaisi pacatsipaebijitsiatsi. 2 Pacatsipaebianatsi perujuliwaisi. Pacuenia bajayata wajasalinaiwimi exana, pacatsipaebianatsi. 3 Paliwaisi-ata nacatsipaeba wajasalinaiwimi, pacatsipaebianatsi. 4 Bajarapaliwaisi apoyawajunuaxainaetsi tsane. Tsipaebabiabianatsi wajaxi-ata pejumetaenexa. Bajarapaliwaisi wajaxi tsipaebabiabianatsi peyapëtaenexa bajayata Jehová ayaicuene pexanabiabijawa, peyapëtaenexanua jiwijawabelia bajaraPonë peyapëtaeya-exanaejawa Jehová pecaëjëpaejawatsi daxitacuene pexanaejawa.
5 BajaraPonë pitorobiliwaisi rajuta Israel-pijinë pemomoxijawabelia. Tsipaeba pacuenia jinawanapaejitsia pibisiacuene pexanaeyaniwa. Orijibia, itoroba wajasalinaiwimi juya bajarapaliwaisi petsipaebabiabinexa pexijawabelia. 6 Bajarapacuenia Jehová itoroba wajasalinaiwimi juya bajarapaliwaisi petsipaebabiabinexa pexijawabelia, pamonae-ata bexëa naexanapona, bajarapaliwaisi peyapëtaenexa. 7 Bajarapacuenia daxitajiwi Dioso pejumeliwaisi pexijawabelia itsa tsipaebabiabiana, daxitajiwi siwanajamatabëcuenecopabiana Diosojawabelia. Aponacofënëtsi tsane xua bajaraPonë to-exanabiaba bajarapamonae pijasalinaiwimijawabelia. Pewajënaeyabelia jumecowënëtaponaena Dioso pitorobiliwaisi. 8 Nexata, bajarapamonae apo-exanae tsane pacuenia bajayata pijasalinaiwimi exana. Bajarapamonae pijasalinaiwimi apojejai Dioso pejumeliwaisi pejumecowënëtabiabiyaniwa. Caejamatabëcuene apoxainae Dioso pejumecowënëtabiabiyaniwa.
9 Jacob pexënato, Efraín, pemomoxi pexaniabitsabianë, pexaniacuererebonënua, xainae-ata, rëcëpeca pijawajabitsaëjawabelia penawajabitsaëtsijawata. 10 Pacuenia Dioso itorobatsi, apojumecowënëtsi. Apojejai pexanaponaeyaniwa pacuenia bajaraPonë itorobatsi. 11 Bajarapamonae nacofënëta xuanë Dioso to-exanatsi. Nacofënëtanua petaejawa bajaraPonë ayaicuene pexanaejawanë. 12 Bajarapamonae paxajiwimi tane bajaraPonë ayaicuene pexanaejawanë Zoán wayafota, Egipto nacuata, xuanë jiwi apocaëjëpaetsi pexanaenexa. 13 Bajarapamonae paxajiwimi Dioso pematacaponaejawata, manuamene-epatualia benamutocuenia tsewia-exanaxualia, bajarapamonaemi petaxuta itsapanabelia pepanepaenexa. Manuamene-epatualia, itsaxuayolia Dioso tsewia-exanaxualia, namata-enetsiabeje mene nucaeya-exana. Pacuenia namata-enetsiabeje banuca bo petabufaratsijawa, bajarapacuenia namata-enetsiabeje mene nuca. 14 Matacabita bajaraPonë itorobabiaba piapiapajubo bajarapamonae pematacaponabiabinexatsi. Merawi icatsia itorobabiaba pitarunutsicotia bajarapamonae pematacaponabiabinexatsi. 15 Bajarapamonae petusato nacuata mera piapaenexa, ibotoxanetotuatuajëarena Dioso wocowococaeya-exana. Nexata, bajarapa-ibotoxanetotuatuajëarena ayai-iraxaneto, mera, pitsaparena. 16 Ibotoxanetotuatuajëarena Dioso pitsapaeya-exana mera bepepamenecuenia.
17 Itsiata, bajarapamonae tsiteca pibisiacuene exanapona. Dioso, athëbëtatsia pe-ecaenë, apojumecowënëtsi. Nexata, bajarapamonae itsa jinawanapa petusato nacuata, naneconita Diosojawabelia. 18-72 […]
C79—C90 […]