SALMO 73
Dioso bitso yawenonabiaba pijajiwi
Mapasalmoyo yaquina Asaf-pijinë.
1 Pamonae, Israel-pijinë pemomoxiyajuwënëwi, pibisiacuene apopexanawanapaewi, Dioso bitso yawenonabiaba. 2-3 Xanë imoxoyo tajopae Dioso tajumecowënëtsijawawecua, tacueneca-ëbixae pibisiacuene pexanabiabiwi, ayaijamatabëcuenewi penataewinua, tacuenetaejawata bitso pexaniacuenia petopitsapaponaejawatatsi.
4 Bajarapamonae aponasiwabëjai petëpaejawa yabara. Biji rajane, jumalixanepanaeya jinawanapa. 5 Caeto-ata apojinawanapae nabejiobitsiaya, pepitsinexa penamatawenonaecuene. Piabejejawanë apotocopiapatabiabitsi, pacuenia tocopiapatabiaba itsamonae. 6 Bajaraxuata, bitso ayaijamatabëcuenewi natane. Jiwi beyejebabiaba. 7 Pecobecowëjawanëa ayaijawa pexainaexae, siwanajamatabëxainabiaba ëpibisiacuene pexanaejawa. Nexata, jamatabëcuenewënëca bitso pibisiacuenejawanë pexanaenexa.
8 Orijibia, bajarapamonae, pibisiacuenia, capo̱capo̱naeya baracuaicuaijai tsabiabi daxitajiwi. Bitso ayaijamatabëcuenewi penataexae, pibisiacuenia atiobabiaba itsamonaejawabelia, piabejecuenejawanë peto-exanaenexatsi. 9 Ayaijamatabëcuenewi penataexae, pibisiacuenia baracuaicuaijai tsabiabi Dioso. Daxitanacuanë pewetsiwi nataeya, itaxutojema cuaicuaijai tsabiabi.
10 Bajarapacuenia pecuaicuaijaixae, jiwi xaniawaetsia namuxuna-ewetabiabatsi, pejumexaniataenexatsi petsipaebiliwaisianëtsi. Aponatocanaëjëtsi pibisiacuene pexanaejawa, xua exanawanapa bajarapapibisiacuene pexanawanapaewi. 11 Bajarapapibisiacuene pexanawanapaewi jamatabëcuenejumaitsi tsabiabi: «¿Detsa pacuenia yapëtaejitsipa Dioso? Apocaëjëpaetsi peyapëtaejawa xua exanawapanatsi», jamatabëjai. 12 ¡Pataema pacuenia exanabiaba bajarapamonae! Apojamatabëcuenebëjainejewa pijaneconi yabara, bitso nacuenebinejewa-ata, itsiata pewajënaeyabelia xainapona bitso pexainaejawa.
13 Xanë Tacueneca-ëbinë bajarapamonae tacuenetaejawata, jamatabë-itsinë picani: «¿Detsa xua yabara netoxanepana meta aneconijibia taponaponaejawa Dioso pitabarata, pibisiacuene exanaenejewanë? Ajibi tsaena. 14 Aneconijibia ponaponae-atanë, apotajitsipaecuenejawanë netocopiapatabiaba caematacabi canacujitsia. Nenaneconitsia-exanabiabame tajaneconi yabara», jamatabëjanë.
15 Yapëtaniji pibisiacuene ta-exanaejawa nijajiwijawabelia, itsa xanë pibisiacuenia cuaicuaijanë tsipae, pacuenia bajarapapibisiacuene pexanawanapaewi. Nijajiwi betajawajabitsaë taejitsipajë. 16 Bajayajebi canaëjëtsi-atanë pajamatabëcuene yabara pibisiacuene pexanawanapaewi pewajënaeyabelia pexainaejawa bitso xainapona, aponejitsipaecuenia jinawanapae-ata, apocaxitajarabinë. Neto-ayapëbejeb cajena tayapëtaejawa bajaraxua. 17 Bajarapacuenia jamatabëcuenenawëxaniabiaya canaëjëtajë tapatsijawabelia neponaponaebota. Itsa junuajë nijatemplobo-ënëabelia, bajarajota tanucaejawata, neyapëtaeya-exaname pibisiacuene pexanabiabiwi newerebiabijawanexa pibisiacuene pexanabiabineconi pejamatabëcuene, nenaneconitsia-exanaematacabita. 18 Pepacuene jemata werebiabianame. Apoxainae tsane pepanepaecuene 19 Bepijia tocopiarucaenatsi pebarëyajawami. Pinijicuenia junawiana. 20 Xua jiwi majitsinaebota tane, penamatacotsijawata nacofënëtabiaba. Bajarapijinia itsi tsane pibisiacuene pexanaewi. Xamë, tajaTuxanenë Dioso, itsa nonotapuname newerewerebiabinexa, pëcaewia-exanaename bajarapamonae pecuenemi. Nexata, pematatsënëa itsajiwi-ata apocuenenajamatabënapitsi tsane. Nacofënëtsiana saya.
21 Bajarapacuenia taneyapëtaeya-exanaecujinaemë, nexata xanë jamatabë-itsinë: «¿Detsa meta xuajitsia cueneca-ëbajë pibisiacuene pexanabiabiwi pewajënaeyabelia bitso pexainaponaejawa? Aeconoxae baja yapëtaniji pibisiacuene pexanaewi, Dioso penaneconitsia-exanaejawanexa», jamatabëjanë. Ta-urajamatabëcuene bitso nejamatabëbejiobita, 22 tsipaji natoyapëtaniji bitso ta-amatabocotajanëcuene Dioso pitabarata. Pacuenia dajubinë apoyapëtae liwaisi, bajara-itsinë. 23 Aeconoxae yapëtaniji apotajitsipaecuenejawanë tanetocopiapatabiabijawata, xamë taneyajawajawamë tsaponaponae. Necobewaetabame tacujuanenia taneyawenonaenexamë. 24 Nemuxujiobabiabame tayapëtaenexa pacuenia jitsipame tacato-exanabiabinexa. Tatëpaecujinae nepitsianame. Necaponaename nijapeniweniwenaenacuayabetsia. 25 Xamë baja cajena caenëmë caxainatsi athëbëtatsia tacayajawaponaponaenexa. Daxitacuenewecua, xamë, Diosomë, bitso cajitsipatsi. 26 Aperabësaëjibi-atanë tsane, jamatabëcuenefaefaenae-atanënua tsane, itsiata ëxamë, Diosomëjawabelia, najamatabëcueneyotsianajë. Nexata, nejamatabëcuene-asaëya-exanabiabianame. Xamë raja tajaDiosomë tsane daxitamatacabijawabelianexa.
27 Dioso, pamonae cawecuanatsata, pejinawanapaenexa pejitsipaecuenia, cawecuanaxuabiana daxitamatacabijawabelianexa. Daxita pamonae siwanajamatabëcuenecopatabiaba itsacuenejawanëjawabelia pewetsinexatsi xamëwecua, bajarapamonae werebiabianame. 28 Itsiata, xanë bitso netsixanepana xamë taca-imoxoyotsijawa, tajaDiosomë. Bajaraxuata, ca-itaxutuajamatejematsi tsaponaponae tane-ewetsinexamë tawajënaeyabelia. Nexata, daxita pacuenia neyawenonabiabame, tsipaebianajë itsamonaejawabelia.
C74—C77 […]