SALMO 46
Dioso wajanacayajawaponaponaejawa peliwaisi
Mapasalmo obijitsia Corépijinë pemomoxi.
1 Dioso raja wajanaca-ewetsinë daxita piayaicuenewecua. Wajanacanasaërajutsinënua. 2-3 Bajaraxuata, apojunawitsi tsane, itsamatacabi mapanacuaje werewerecae-ata. Pinijitsutoxanetonë manuamenejawabelia othopae-ata tsane, manuamenepijimalataca ayaicuenia najumetsi-ata tsane, bajarapamalataca pinijitsutonë jëabi-ata, apojunawitsi tsane.
4 Dioso pijatomarata pejinawanapaewi bitso siwajamatabëcuenebarëya pamene bocapona bajarapatomaratuatuajëa, Dioso ayaijamatabëcuenenë daxitawecua peponaponaetomarata.
5 Dioso peponaponaexae bajarapatomarata, apowerewerecae tsane. Ajena matacabi tsina, petsi-ayaijawatatsi, Dioso yawenonaena bajarapatomarapijiwi.
6 Dioso pejume ayaicuenia penajumetsijawata, Itsanacuanëpijiwi ajamatabëcuenecowëbi tsane. Peyanacua-ewetsinacuanëjawa jiwi neconecojai tsane pecajunawi. Dioso pijumetanua werebiabiana daxita mapanacuamije.
7 Jehová, pijajiwiwajabitsaë penamatacaitorobinë, nacayajawaponapona. Wajasalinainë Jacob pijaDioso nacacaranata daxita piayaicuenewecua.
8 ¡Naxatsia! ¡Pataema papinijicuenejawanë itsamatacabi Jehová exanaena! ¡Pataemanua pacuenia werebiabiana mapanacuapijiwije! 9 BajaraPonë copiarucaeya-exanaena daxitanacuanëjawa penawajabitsaëtsicuenemi. Daxita wajabitsaë pijabitsabianëmi to-epatsicababena. Cuererebonëmi-ata to-epatanababena. Daxita xuanë wajabitsaë canawajabitsaëta, tajuitsiana isotota.
10 Jehová jumaitsi jiwijawabelia: «¡Moya panubenare! Panecuenecanaëjëtsianame, paneyapëtaenexa Diosonëcuenenë. Daxitanacuanëpijiwi necueneyapëtaena ayaijamatabëcuenenëcuene. Daxitanacuanëjawa pijinia neyaiyataena», jai.
11 ¡Jehová, pijajiwiwajabitsaë penamatacaitorobinë, nacayajawaponapona! ¡Wajasalinainë Jacob pijaDioso nacacaranata daxita piayaicuenewecua!
C47—C49 […]