SALMO 40
Dioso peyawenonaexaetsi, pexaniajamatabëcuene perajutsijawa Diosojawabelia peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Bajayajebi ewetajë Jehová taneyawenonaenexa. BajaraPonë nenamuxuna-eweta tawajëtsijawa. 2 Nexata, bitso piayaicuenewecua Jehová necapanepa. Nenuta baja itsajota apo-ayai. 3 Jehová nenaxëanaeya-exana pejanawaji. Nexata, tanaxëanaejawata, pexaniajamatabëcuene rajutajë wajaDiosojawabelia. Jiwi itsa newënëliwaisitaena ayaicuenia Jehová taneyawenonaponaejawa, yaiyataena bajaraPonë. Nexata, bajarapamonaeyajuwënëwi, ayaibitsaëtoxaneto, siwanajamatabëcuenecopabiana Jehovájawabelia.
4 Pamonae ayaijamatabëcuenewi apopenataewi, pamonae-ata asiwaya aponawajëcabiabi jumapecataenëanëjawabelia, bitso jamatabëcuenebarëya itsa siwanajamatabëcuenecopabiana Jehovájawabelia. 5 Tajatuxanenëmë, tajaDiosomë, pinijicuene nexanaejawa paneto-exanabiabame. Panejamatabënajinabiabame. Itsajiwi-ata apocaëjëpaetsi bajarapitsipinijicuene pexanaenexa. Bitso nawita pinijicuene nexanaejawanë. Nexata, aponecaëjëpae daxita pinijicuene nexanaejawanë tanamata-ëjëtsinexa.
6 Apojitsipaemë xuanë jiwi carajutabiaba ofrendacuenia. Apojitsipaemënua dajubinë-ata pebeyaxuababiabijawa pewi pecarajutsinexa ofrendacuenia. Neyapëtaeya-exaname mapacueneje. Xuanë jiwi ofrendacuenia carajutabiaba, bajaraxuanë pejamatabëcueneta acuenebi jiwi newecua-ajibia-exanaejawa pibisiacuene pexanaeneconi. 7-8 Bajarajane manucajëje. Pacuenia jitsipame, barëyaya tacato-exanaenexa. Nijumeliwaisi xainajë tajamatabë-ëthëtota.
9 Daxitajiwi baja tsipaebajë pexanialiwaisi. Tsipaebajënua xamë newecua-ajibia-exanaejawa pibisiacuene pexanabiabineconimi. Xamë yapëtaneme daxitajiwi tatsipaebijawa bajarapaliwaisi. 10 Apoyawajunuaxainaenë bajarapapexanialiwaisi. Daxita nijajiwi tsipaebaponajë, jiwi nitaxutotsoniataejawa. Tsipaebaponajënua jiwi, necapanepaejawanexa-ata. Apoyawajunuaxainaenë jiwi bitso niasiwajawa. Tsipaebaponajënua nexaniajainëcuene-ata.
11-12 Tajatuxanenë, netocopiapata baja bitso apopexanepanaecuenejawanë. Orijibia, pibisiacuene ta-exanaeneconi, bitso yanajamatabëxainajë, tsipaji bitso ayaijawa tanamata-ëjëtsicapanepaejawawecua. Nexata, xamëjawabelia bitso auranë. Cacujunawatsinua. Neconecojanë tacajunawi. ¡Nexata, nitaxutotsoniataema! ¡Asiwaya netaeyabiabare! ¡Nejumeliwaisi, pexaniajailiwaisi, pejamatabëcueneta nenayajiwiyapëtaeya-exanare pibisiacuene ta-exanaeyaniwa!