SALMO 37
¡Siwanajamatabëcuenecopare Diosojawabelia, pecayawenonaenexa!
Israel nacua peyanacua-ewetsinë, David-pijinë, peyaquinaesalmoyo.
1 ¡Pëtsa jamatabëcuenebëjamë pibisiacuene pexanaewi yabara! ¡Pëtsa cueneca-ëbamenua bajarapamonae pibisiacuene pexanaejawa! 2 Pacuenia po̱natoxi bepijia tsaquena, nexata tëpa, bajara-itsamatacabi itsi tsane pibisiacuene pexanaewi pijaneconi yabara.
3 ¡Siwanajamatabëcuenecopare Jehovájawabelia! ¡Pexaniacuene exanabiabare newajënaeyabelia! ¡Mapanacuataje neponaponae-epato, pëtsa copatame Dioso nejumecowënëtsijawa!
4 ¡Jehová asiwamëre daxitacuenewecua! Nexata, bajaraPonë carajutsiana xua bitso jitsipame nejamatabë-ëthëtojawawetsina.
5 Najamatabëcuenenacaewetsianame Jehovájawabelia pecajamatabëcuenematacaponaenexa daxitacuenejawalia. ¡Siwanajamatabëcuenecoparenua bajaraPonëjawabelia pecayawenonabiabinexa! Nexata, daxitacuene yabara cayawenonabiabiana. 6 Najumetsënëtsiaya itsamonae cabaracuaicuaijai-ata tsane, itsiata Dioso daxitajiwi xaniawaetsia yapëtaeya-exanaena xamë pibisiacuene aponexanaejawa.
7 Jamatabëcuenebëjamënejewa, bajayajebi-ata ewetsianame Jehová pecayawenonaejawanexa. ¡Pibisiacuene pexanaewi, pexainaejawa pewajënaeyabelia bitso ayaijawa xainaponae-ata, itsiata Jehová itsa aponaneconitsia-exanaetsi, pëtsa siwajamatabëcuenebëjamë!
8 ¡Pëtsa anaepanabiabame! ¡Copare nianaepanabiabijawa, tsipaji itsa anaepaname, xamë-ata pibisiacuene exanaejitsipame! 9 Pibisiacuene pexanaewi, Jehová werebiabiana. Itsiata, pamonae siwanajamatabëcuenecopaba bajaraPonëjawabelia, bajarapamonae Dioso rajutsiana mapanacuaje.
10 Pibisiacuene pexanaewi, cae-epatoyocujinae saya ajibi tsane. Jaitsi-atamë, apocaxitajarabimë tsane. 11 Pamonae beweliajamatabëcuenewi natane, Dioso rajutsiana mapanacuaje. Jamatabëcuenebarëyaya xaniawaetsia jinawanapaena. 12 Pibisiacuene pexanaewi, pibisiacuene jamatabë-exana pexaniacuene pexanaewijawabelia. Pibisiacuene pexanaewi, itoya tsabiabi pexaniacuene pexanaewi. 13 Petuxanenë Dioso saya capo̱capo̱na pibisiacuene pexanaewi, tsipaji yapëtane imoxoyo baja pewajënae penaneconitsia-exanaejawanexa bajarapamonae.
14 Pibisiacuene pexanaewi, nawemarajona pija-espadanë. Pijabitsabianë-ata tumaëbababa pebeyejebinexa bepejiobiwi, pexaniacuene pexanaewi. 15 Itsiata, bajarapamonae beyejebinejewa, beyejebianatsi pija-espadanëta. Jamatabëjorobacacuatsianatsi. Pijabitsabianëmi totsicababenatsi.
16 Pibisiacuene pexanaewi, ayaijawa pexainaejawa xainae-ata, amatamobi Diosojawabelia. Pexaniacuene pexanaewi, bejiobi-ata, namatamota Diosojawabelia, 17 tsipaji Jehová werebiabiana pibisiacuene pexanaewi. Pexaniacuene pexanaewi, juya yawenonaena.
18 Pianeconijibiwi, Jehová yawenonabiaba. Nexata, xua bajaraPonë rajutsiana, apowerewerecae tsane daxitamatacabijawabelianexa. 19 Pianeconijibiwi, janibomatacabita apopiajani tsane. Xainaena pexaejawa.
20 Bajarapacuenia Jehová apoyawenonae pibisiacuene pexanaewi. Pacuenia wayafota petsewipo̱na isotota tajua, pacuenia ëtsëxë-ata caewa bepijia, bajarapijinia pacuenia pibisiacuene pexanaewi werewerecaena.
21 Pibisiacuene pexanaewi, xua namatawenona, cowaetabiaba itsamonaejawabelia. Itsiata, xua cowaeta, apomatamotabiabi. Juya, pexaniacuene pexanaewi, itaxutotsoniataeyabiaba bepejiobiwi. Xua xaina, tsicobetsanabiaba bepejiobiwi peyawenonaenexa.
22 Pamonae Jehová yawenonabiaba, bajarapamonae rajutsiana mapanacuaje. Pamonae pijinia Jehová naneconitsia-exanaena pibisiacuene pexanabiabineconi pejamatabëcuene, bajarapamonae werebiabiana.
23 Pexaniacuene pexanaewi, Jehová yapëtaeya-exanabiaba pexaniacuene pexanabiabinexa. Muxujiobabiabanua pacuene bajaraPonë jitsipa peto-exanaenexatsi pesiwajamatabëcuenebarëyanexa. 24 Pexaniacuene pexanaejiwi, jopae-ata tsane Dioso pejumeliwaisiwecua, itsiata bajayajebi bajarapacuenia apotsitecae tsane, tsipaji bajarapamonae, Jehová cobewaetabaponapona bepijia peyotsinexa.
25 Perujunënë baja. Itsiata, pejewaxinëjawaweliacujinaenë caeto-ata apotaenë Dioso pexuabijawa pexaniacuene pexanaejiwi. Bajarapamonae pexënatojiwi-ata, apotaenë itsamonaejawabelia palata amoneya pewajëcaejawa, penatocomuatsinexa pexaejawa. 26 Pexaniacuene pexanaewi, itaxutotsoniataeyabiaba itsamonae. Xua xaina, amoneya rajutabiaba. Itsajawata tsicopatabiaba. Pexaniacuene pexanaewi pexi-ata, bajarapacuenia itsamonae itaxutotsoniataeyabiaba.
27 ¡Copare pibisiacuene nexanaejawa! ¡Pexaniacuene exanabiabare! Nexata, panacuata ponaponame, xaniawaetsia ponaponaename daxitamatacabijawabelianexa. 28 Jehová raja asiwa pexaniacuene pexanaewi. Pamonae jumecowënëtawanapa pitorobicueniatsi, bajarapamonae Jehová apoxuabi tsane. Juya, pamonae pibisiacuene exana, bajarapamonae bajaraPonë werebiabiana. Pibisiacuene pexanaewi pexi, pemomoxi-ata, ajibi tsane.
29 Pexaniacuene pexanaewi Jehová rajutsiana mapanacuaje, daxitamatacabijawabelianexa pejinawanapaenexa.
30 Pexaniacuene pexanaewi, xaniawaetsia muxujiobabiaba itsamonae. Bajarapamonae yapëtane xua pexaniacuene pexanaenexa, xua-ata pibisiacuene pexanaeyaniwa. 31 Pejamatabë-ëthëtota bajarapamonae xaina Dioso pejumeliwaisi. Nexata, Dioso pejumeliwaisiwecua apojopae tsane.
32 Pibisiacuene pexanaewi, naitaxutoca-ewetabiaba pexaniacuene pexanaewi pebeyejebinexatsi. 33 Itsiata, Jehová apocopatsi tsane pibisiacuene pexanaewi pebeyejebiyaniwa bajarapamonae. Itsamonae najumetsënëtsiaya neconitsi-atatsi tsane juez-nëjawabelia, itsiata bajaraPonë apocopatsi tsane pexaniacuene pexanaewi penaneconitsia-exanaeyaniwatsi.
34 ¡Najamatabëcuene-ewetsiaya siwanajamatabëcuenecopare Jehovájawabelia pecayawenonaenexa! ¡BajaraPonë jumecowënëre! Nexata, pexaniacuene cato-exanaena. Carajutsiana mapanacuaje necanacopatsinexa nija-iracuenia. Nijacuata taename pacujinae werebiabiana pamonaemi pibisiacuene pexanaewi.
35 Bajayata taniji pibisiacuene bitso pexanaenë. Bajaraponëmi bitso ayaijamatabëcuenenë nataeya ponaponabiaba. 36 Itsiata, bajaraponëmi bajayajebi apoponaponae. Bepijia tëpa. Nexata, jaitsi-atanë, apocaxitajarabinë.
37 ¡Canaëjëre xaniawaetsia peponaponaejawa pianeconijibijiwi, pibisiacuene apopexanaejiwi! Bajarapajiwi pewajënaeyabelia jamatabëcuenexanepanaeya xaniawaetsia ponaponaena.
38 Pibisiacuene pexanaewi, Jehová werebiabiana.
39 Pexaniacuene pexanaewi, Jehová yawenonabiaba. Nexata, piayaimatacabita caranatabiaba itsacueneyaniwa. 40 Bajarapamonae Jehová yawenona pewecuapanepaenexa pibisiacuene pexanaewi. Capanepatsinua pesiwanajamatabëcuenecopatsixae bajaraPonëjawabelia pecapanepaenexatsi.
C38—C39 […]