SALMO 27
Dioso jiwi pejamatabëcuene-itayotsijawa, daxita piayaicuenewecua pecapanepaejawa-ata peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Jehová raja nejamatabëcuene-itayota. Necapanepanua daxita piayaicuenewecua. ¿Detsa pajiwi nexata cujunawianajë? Jehová raja pesaëta ne-ewetabiaba. Nexata, itsajiwi-ata apocujunawinë tsane.
2 Tajawajabitsaë, pibisiajamatabëcuenewi, itsa netsimaxëpata tanebeyaxuabinexa picani, nacueratabiaba.
3 Ayaibitsaëto tajawajabitsaë nematatoyoronae-ata, apojunawinë tsane, tsipaji itaxutuajamatejemanë tsaponaponae Diosojawabelia. Nesiwapitsapae-ata tajawajabitsaë tanebeyaxuabinexa, itsiata jamatejemanë tsane, tsipaji itaxutuajamatejemanë tsaponaponae Diosojawabelia.
4 Caejawa baja wajëtajë Jehovájawabelia tanetocopatsinexa. Bajaraxua bitso jitsipajë daxitacuene mapanacuapijicuene matatoxenetsiaje. Nexata, wajëtajë Jehovájawabelia tanetocopatsinexa pijatemplobota taponaponaenexa tasaëtsaponaponae-epato mapanacuataje. Jehová pijabota itsa ponaponajë, tacanaëjëtabiabinexa pijacuene, tawajëcabiabinexanua pijatemplobo-ënëta xua bitso pexaniacuene.
5 Pamatacabi piayaicuene netocopiapatsiana, bajaraPonë nematayatsiana pijatemplobota, tawecuapanepaenexa piayaicuene. Itsa jume, nenutsiana ibotoxanetojumatatsia, tawecuapanepaenexa piayaicuene.
6 Tajawajabitsaë, pamonae nematatoyorotsia netsimaxëpatsiana tawecuapanepaenexa Jehová neyawenonaena. Nexata, xanë bajaraPonë taneyawenonaejamatabëcuene, pijatemplobota dajubiwi juya ofrendacuenia rajutsianajë bajaraPonëjawabelia. Naxëanaeyanua, wajita pexaniacuenia wënëxaniatsianajë taneyawenonaejamatabëcuene.
7 «¡Jehová, nejumetaema tacajunatsijawa! ¡Nitaxutotsoniataema! ¡Nejumecanawiare! 8 Itsa nejumaitsimë: ‘Nejamatabëcueneta saya nimoxoyotsianame,’ itsa nejamë, nexata baja tajamatabë-ëthëto cajumepita. Tajamatabë-ëthëto cajumaitsi: ‘Jehová, ca-imoxoyotsianatsi,’ cajai.
9 »¡Pëtsa newecuanasaicayabame! ¡Pëtsa anaeya nenawecua-itawetamenua nijajiwitonënë! Xamë raja neyawenonabiabame daxitacuenejawabelia. Xamë raja Diosomë, necapanepamenua tajawajabitsaëwecua. ¡Pëtsa necopatame taja-epato! ¡Pëtsa nexuabame! 10 Taxa, taenabeje, nexuabi-ata tsipae, itsiata xamë, Jehovámë, ne-ewetsipame daxitacuene yabara. 11 ¡Jehová, neyapëtaeya-exanare nejamatabëcuene! ¡Nematacaponare nijanamutua, tsipaji tajawajabitsaë nenaitaxutoca-eweta! 12 ¡Pëtsa tajawajabitsaë tocopatame tane-exanaeyaniwa pacuenia nesiwanajamatabëxaina, tsipaji tajawajabitsaë nesiwanajamatabëcuenewereta penajumetsënëtsiliwaisita taneneconitsinexa! Nesiwanajamatabëcueneweretanua bitso tanebejiobia-exanaenexa.
13 »Xamë taneyawenonaejawanexamë yabara, jamatabë-itsinë tsabiabi: ‘Mapanacuataje, Jehová taneyawenonaecuene taenajë icatsia’, jamatabëjanë tsabiabi», cajaitsi Jehová. 14 ¡Jehovájawabelia siwanajamatabëcuenecopare pecayawenonaenexa! ¡Ajamatabëcuenesaëmëre! ¡Pëtsa jamatabëcuenefaefaename! ¡Jehovájawabelia pepacuene siwanajamatabëcuenecopare pecayawenonaenexa!
C28—C31 […]