SALMO 19
Dioso bitso pexaniacuene pexanaejawa peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Dioso raja itaboxo exana. Nexata, itaboxo itsa tanetsi, nacayapëtaeya-exana Dioso bitso ayaijamatabëcuene pexainaejawa. Itaboxo nacayapëtaeya-exananua Dioso pexanaejawatsi.
2 Caematacabi canacujitsia, caemerawi canacujitsia-ata, nacayapëtaeya-exanabiaba bajaraPonë bitso ayaijamatabëcuene pexainaejawa.
3 Itaboxo picani apoxainae pijajume. Itaboxo apocuaicuaijai. Apojumetaetsi wajanacatsipaebijawa.
4 Itsiata, daxitanacuanëpijiwitsi itaboxo itsa tanetsi, yapëtanetsi itaboxo wajanacayapëtaeya-exanaejawa Dioso bitso ayaijamatabëcuene pexainaejawa. Nacuatabujawabelia pejinawanapaewi-ata, itaboxo yapëtaeya-exanatsi Dioso bitso ayaijamatabëcuene pexainaejawa.
Itaboxotatsia Dioso ruta juameto, matacabipijito. 5 Pacuenia pebitsojinaenë pecujinaejinaejawa cujinaejina, pacuenia-ata pejananacojiobinë barëyaya pijabowecua pitsapa peponaenexa itsajawabelia, bajarapijinia itsi matacabipijijuameto. 6 Pitsapaina itaboxo pecopiarucaejawawetsina. Tajë pijanamutua najetaruca, pepatsinexa itaboxo pecopiarucaejawabetsia. Matacabipijijuameto petajuwecua itsacuenejawayo-ata apowecuanamatayabitsi.
7 Jehová penajumecopatsiliwaisi Moisés-pijinëta pepopexanialiwaisi, tsipaji bajarapaliwaisi jiwi najamatabëcuenepënëyorotsia-exanatsi Jehovájawabelia. Jehová wajanaca-itorobiliwaisi apobecuene-aebitsi, tsipaji baja cajena pexaniajailiwaisi. Bajarapaliwaisi pejamatabëcuene, beweliajamatabecuenenëmi, peyapëtaenë naexana. 8 Jehová penajumecopatsiliwaisi caejamatabëcuene xaina. Nexata, pajiwi jumecowënëta bajarapaliwaisi, jamatabëcuenebarëyaya-exanatsi. Jehová pitorobiliwaisianë jumenapebeta. Nexata, bajarapaliwaisi jiwi jamatabëcuene-itayotatsi pacuenia exanaponaponaejitsia. 9 Jiwi peyaiyataejawa Jehová bitso xanepana. Daxitamatacabijawabelia beyaiyatane. Jehová pitorobiliwaisianë, pexaniajailiwaisi baja cajena. Najëpaeya daxitajiwi cuene-itawetabiaba, pibisiacuene pexanaeyaniwa. 10 Jehová, toxanepanatsi jiwi pejitsipaejawa nitorobiliwaisianë oronanijawa matatoxenetsia; bitso penamatamotsijawanë pexaniawiria-orojawa matatoxenetsia. Bajarapaliwaisianë bitso pemuxujitsipaeliwaisi, jabëra pejitsipaejawa matatoxenetsia, banaperijawawerena pejucaera. 11 Nitorobiliwaisianë toxanepanatsi pecuene-itawetsinexatsi nijajiwitonënë. Nexata, itsa jumecowënëta bajarapaliwaisi, bitso pexaniacuenia yawenonaenatsi.
12 Jiwi pijacuata aponatoyapëtae pijaneconi nenajumecopatsiliwaisinejewa. Jehová, newecua-iquinaename bëpënëa paneconi xainajë. 13 ¡Newecua-iquinare be-ayaijamatabëcuenenë tanataejawa! ¡Pëtsa copatame bajarapapibisiacuene tanejamatabëcuene-amoneyabijawa! Nexata, xaniawaetsia ponaponaenajë xamë nitabarata. Pinijineconi aponato-exanaponaenë tsane xamë nitabarata.
14 Jitsipajë daxita tajumaitsijawanë pecajamatabëcuenebarëyaya-exanaejawa. Jitsipajënua daxita tanajamatabëxainaecuene tajamatabë-ëthëtota pecajamatabëcuenebarëyaya-exanaejawa. Jehová, xamë raja ne-ewetabiabame, neyacaranatabiabamenua piayaicuenejawanëwecua. Necapanepamenua pibisiacuene ta-exanaeneconiwecua.
C20—C21 […]