5
Itsa baja wereta daxita Jehová pijatemplobonexa Salomón, nexata bajaraponë capata templojawaberena daxita pecanacuenebijawanënexa David paxapijinëmi xua najamatabëxaina perajutsinexa Diosojawabelia. Capata oronanitota pexanaejawanë pecanacuenebijawanënexa, bajarapacuenia palatananitota pexanaejawanë pexaniawaetsinexa Jehová pijatemplobota, payatu-ucutsijawata baxaniawaetabiaba Dioso pijajawanë.Salomón capatsia-exana Dioso penajumeliwaisixaniawaetsibaula templobojawaberena
(1Re 8:1-11)
2 Nexata, Salomón caetuatsia-exana Jerusalén tomarajawaberena daxita pamonae Israel nacuata penamatacaitorobiwi ancianowi, bajarapacuenia pewetsiwi caenë pemomoxibitsaëto canacujitsia, bajarapacuenia pamonae-ata peyaiyataewitsi pijamonaetuatuajëta. Daxita bajarapamonae nacaetuata tsipaji tixitsijitsia Jehová penajumeliwaisixaniawaetsibaula Sión-tsutowerena, David-pijinëmi pijatomarawecua, pebuatsinexa jane baja petsiwajënaexaniawaetsitaxunaeta templobo-ënëta. 3 Nexata, daxitajiwi nacaetuata Jerusalén tomarajawata, pexanaenexa pafiestaa exanabiaba siete juametota caewai canacujitsia, bobërëtoxita pejinawanapaejawapijifiesta. Nexata, nacaetuata, penajamatabënapitsinexa Salomón yajawa daxita israelitawi. 4 Itsa baja pata daxita penamatacaitorobiwi Israel-pijinë pemomoxi nexata Leví pemomoxiyajuwënëwi pita jane baja Dioso pijabaula pecaponaenexa. 5 Nexata jane baja, sacerdotewi wëtacarapona templobojawabelia. Yajawacaponanua Dioso pijacarpabomi, daxitaxuanënua bajarajota canacuenebabiaba. Bajaraxuanë capona sacerdotewi, itsamonae Levípijinë pemomoxi yajawa. 6 Nexata Dioso pijabaula pecajonewajënaeya templobo-ënëabelia, pepopeyanacua-ewetsinë Salomón, daxita pamonaenua yajawanacaetuatanubena bajarapabaulamuxuneneta. Tajuitanubena altar-jumata dajubimonaenë perajutsinexa Jehovájawabelia. Bajarajota, tajuita ovejamonaenë, bajarapacuenia vaca pebitonë, bitso ayaijawa apopenamata-ëjëtsicapanepaecuenia. 7 Bajaraxuacujinae baja, sacerdotewi capona bajarapabaula, Jehová penajumeliwaisixaniawaetsibaulanexa, pebuatsinexa templo-ënëabetsia, pataxunaeta toxaniawaeta bajarapabaula pebuatsinexa. Bajarapabaula buata Lugar Santísimojawata, itsajota tsiwajënae-exananutabeje anija-ángel-nëbeje querubinejumapecataenëbeje pecorofebëxëpanata. 8 Bajarapa-ángel-nëbeje pexananutsinëbeje namata-enetsia nacorofe-upicaxinaeya nucabeje bajarapabaula matatsënëwereca. Daxita bajarapacorofetobeje mata-acatanucabeje bajarapabaulajuma. 9 Itsiata baitsi jane, peyawëtacaraponaenaebobeje bajarapabaula matatoxenetsia apia bajarapabuatsitaxunaewecua. Nexata, upipitsapaicabeje Lugar Santojawabetsica, Lugar Santísimo peyatu-ucutsijawacujinaereca patusatojawa. Itajara bepenapebetsijamatabëcuene tsabiabi bajarapa-upibeje, apocaëjëpae itsiata petaejawa wayafowerena. Bajarapacuenia nacopata ajena pamatacabijawaberena-ata. 10 Bajarapabaula-ënëta saya najetaruca anija-ibopanayobeje, Moisés-pijinëmi pebuatsijawami pacujinae Israel-pijinë pemomoxi jinawanapa Horeb-tsuto imoxoyojawata, itsa pa-ibopanajawatabeje Jehová yaquinaruta penajumecajoneliwaisi israelitamonaejawabelia, pacujinae pitsapa Egipto nacuajawawerena.
11 Jehová penajumeliwaisixaniawaetsibaula pebuatsicujinae Lugar Santísimojawata, nexata daxita sacerdotewi pitsapa Lugar Santo peyatu-ucutsijawawecua wayafuabelia penubenaenexa. Daxita pasacerdotemonae nanubena bajarajota, daxita bajaraxuanë pexanaewajënaeya, bajarapamonae nacuenexaniawaeta Dioso petocaëjëtsicueniatsi bepenaxuirabiwicuenia petaeyaniwatsi Jehová pijacuene pexanaejawata. Itsamonae sacerdotewi apopijamatacabi-atab petocaëjëtsijawatsi penacuenebinexa Jehová pijacuene, bajarapacuenia exana itsiata. 12 Nexata, daxita pamonae penaxëanaewi, Levípijinë pemomoxiyajuwënëwi, yajawanubena penamatacaitorobiwi. Baitsi Asaf yajawanuca pijabitsaëto, pamonae pebijiwi pijamonae, pexi-ata, bajarapacuenia penaxëanaewi penamatacaitorobinë Hemán pijabitsaëto yajawanuca, Jedutún pijabitsaëto-ata. Bajarapamonae nanubena piniji-altar-jawa pemutowetsina. Naxatabanubena pexanaejawa linopapaëbërëpanata. Itsamonae canubena címbalojawanë pecanaxëanaenexa, bajarapacuenia itsamonae salteriojawanë, itsamonae pijinia arpajawanë. Bajarapamonae yajawanubena sacerdotewi, ciento veinte ponëbeje piobiwi trompeta.
13 Nexata, daxita bajarapamonae caecuenia najuanaxëana. Bajarapacuenia-ata caecuenia najua-oba trompetajawanë. Canaxëananua címbalojawanë, salteriojawanë-ata, itsapecanaxëanaejawanë yajawa. Bajarapacuenia caejumecuenia wënëcanaxëana pexaniacuenia Jehová. Bajarapacuenia pexaniajamatabëcuene-ata rajuta. Bajarapamonae penaxëanaejawata jumaitsi tsaponae:
—Wënëxaniatsianatsi Jehová, tsipaji bajaraponë pexaniajamatabëcuenenë, wajanaca-asiwajamatabëcuene-ata apopetowerewerecaenëtsi —jai tsaponae.
Bajarapaepatota penaxëanaejawata, nexata ënëwënëca bepajubojawa Jehová pijatemplobo. 14 Bajarapacuenianua ënëwënëca Jehová pijapenivenivenaecotia. Nexata, sacerdotewi bajarajota apocaëjëpaetsi orijibia pexanaenexa xua nacuenebawanapa, tsipaji Jehová pijapenivenivenaecotia wënëca bajarapatemplobo-ënë.
C6—C36 […]