Salomón nawijata Hiram-jawabelia, Tiro tomarata pepopeyanacua-ewetsinë
(1Re 5:1-18; 7:13-14)
2
Salomón jane baja natocaëjëta penacuenebinexa Jehová pijatemplobo, bajarapacuenia penatonacuenebinexanua pijabonexa peyanacua-ewetsibo.a 2 Bajarapabobeje penacuenebinexa, nato-itapeta setenta mil ponëbeje petojotsiwinexa, bajarapijinia pacuenia ochenta mil ponëbeje ibojawanë penacuenebiwinexa petsutoyenepanajawata, tres mil seiscientos pijinia ponëbeje penamatacaitorobiwinexa bajarapanacuenebiwi.3 Bajaraxuacujinae, Salomón tonajume-itoroba Hiram-jawabelia, Tiro tomarata pepopeyanacua-ewetsinë:
—Neto-exanaename pacuenia to-exaname taxa David-pijinëjawabelia. Ponë to-itorobame cedronaejawanë penacuenebinexa pabojawata ponaponaejitsia pepopeyanacua-ewetsinë. 4 ¡Nejumetaema xaniawaetsia! Xanë raja namatawenonajë tatonacuenebinexa Jehová Dioso pijatemplobo. Bajarapataxunae patotsatsianajë Jehová patajaDioso ëpijacuene saicaya pecanacuenebabiabinexa. Nexata, bajarajota yaiyataeya patajuitabiabianajë petuxujuwinanipërëjawanë bajaraPonë pitabarata, bajarapacuenianua patajebabiabinexa pan-jawanë caematacabi canacujitsia patanajamatabëcuene-itajëtsinexa Dioso pataneyajawajawa. Bajarajotanua dajubi daxitanëanë patajuitabiabijitsianë caebajayacunua, caecaniwiyo canacujitsia, bajarapacuenia penacuera-ewetsimatacabianëta, bajarapacuenia pejanajuametotapijitajuitsijawa-ata, bajarapacuenia itsawënëfiestajawaxijawa patatonacaetuatabiabimatacabianë Jehová patajaDioso pewënëta patatajuitabiabinexa dajubi. Bajarapacuenia Jehová patajaDioso panetonajumecopata paxanë Israel-pijinë papemomoxinë pata-exanabiabinexa daxitamatacabijawabelia. 5 Patemplobo xanë tonacuenebijitsianë, bajarapabo bitso pinijibo tsane, tsipaji patajaDioso bitso pepo-ayaijamatabëcuenenë daxita diosowiwecua. 6 Acuenebi picani itsajiwi-ata petonacuenebinexa Dioso pijabonexa, itsajota ponaponaejitsia patajaDioso. Biji itsa itaboxo pepo-ayaijawa athëbëabetsia itsa bajaraPonë apoyacaëjëpaetsi peponaponaenexa, ¿Dexua yabara betonacuenebajë bajarapabo? Itsiata, bajarapacuenia nitoroba tato-exanaenexa. Xanë bitso beweliajamatabëcuenenënë bajaraPonë pitabarata, nexata apoyapëtaenë xua yabara nitapeta tato-exanaenexa pijatemplobo. Bajarapabojawata, apoponaponae-ata tsane, saya jiwi petotajuitabiabitaxunaenexa inciensopërëjawanë xanë itsiata bitso beweliajamatabëcuenenënë bajaraxuanexa netsita —jai Salomón Tiro tomara pewetsinëjawabelia. Hiram jejai peto-exanaenexatsi pewajëtsicuenia. 7-18 […]