14. Seetaane naliik gabanten Yéesu
14. Satan tente de tromper Jésus
Máca 4.1-11
Seetaane naliik gabanten Yéesu
1 Púr to,
Búyeget Baset mee mbuŋar Yéesu bu nꞌerampaasa yaayu mimbil Seetaane aliik gabantenool.
2 Nalat bo gunak gafaŋ gúruba (40) fuk nꞌtufunak,
bacaar mbujogool ŋáar.
3 Ñeer abantena aahu Seetaane nacigulool narogool :
« Eéni maregen aw Aleeh Atúuha,
urok sílankiin se sílowulo gúmbuur. »
4 Yéesu narogool :
« Busafer baabu buroge :
“Wabil mee ecil an naroŋ let múcahoaay déhooro,
bare may furim fanoofan fápurulo nꞌAtúuha.” »
5 Púr to,
Seetaane naŋarool bu Yérusaleem,
ésuk yaset mee,
najiŋenool bu dó fatiya Yaŋ Atúuha nayihenool nꞌélabuun yaayu
6 narogool :
« Eéni maregen aw Aleeh Atúuha,
úñag bu nꞌetaam.
Busafer baabu buroge kum :
“Atúuha be eboñúl simalayikaool mara aw.”
Buroge may :
“So bu gaweeheni jambil goohi gulonk élankiin.” »
7 Yéesu narogool :
« Busafer baabu buroge may :
“Jambil uliik gabanten Acehériit mee ammee Atúuhai !” »
8 Seetaane nabaañ aŋar Yéesu bu fatiya emontaañ yárookene máamak,
naliigool jáyiih jaaju peepe jammee nꞌduniya son mujak jo
9 afaak narogool :
« Be eseni jo peepe,
éeni uyahom gújuul nunaakom. »
10 Bare Yéesu narogool :
« Seetaane,
úpur taahe !
Busafer baabu buroge :
“Aw be eyah Acehériit mee ammee Atúuhai gújuul,
nunaak ho noonool pat.” »
11 Ñeer Seetaane najow akahool to.
Simalayika nsícigul Yéesu nsicookoorool.