Rúut naŋot to nꞌgoot Boos
3
Funak fucee,
Naomi asom Rúut narogool :
« Asáabulom,
ínje be eŋesi tan ubile gameeyo min újuh ubaj gásuumaay.
2 Nko úmimir Boos hakaheni mee nulagen újagagaool anolaal.
Ho be ejow jaat gárusa be ejos sikogool nasereren.
3 Uyuho min utaaso jaram uset,
nukaano wañ wajajak,
nugor ekarabanjo min ujow bu bo ban gommee nejos yaayu.
Bare jambil afaasi ho bafaagut fúcaho narem.
4 Nan abil mee ejow bu gafiiho,
nuñeeroorool nuñow tan afiiho mee.
Nucik min úrankul múguyoorumool,
nufiiho bo nꞌgoohool.
No ñeer ho fannaool be eliigi buu nuñume ekaan. »
5 Rúut narogool :
« Yoo.
Be ekaan wan urogaam mee peepe. »
6 Ñeer Rúut najow bu bo ban gommee nejos,
nakaan wan asomool alobool mee peepe.
7 Boos nácaho narem jaram súumool,
najow afiiho cik to nꞌfúluŋ fara sikok saasu.
Rúut nabuuy káŋ bu to,
nárunkal múguyoorum Boos min afiiho bo nꞌgoohool.
8 Bu nꞌetut fuk,
Boos eniinool nekaan jibibib,
náliyo,
nálowulo,
nañow mara akoña umu to nꞌgoohool nafiihoe.
9 Boos narogool :
« Aw ay hoom ?
» Násuupool arogool :
« Injé Rúut ájagagai.
Ubonket uŋarom umeeyen dó mꞌmúguyoorumi,
mara aw ubilaam gajogoor. »
10 Boos narogool :
« Añúm,
émit ekaan Acehériit mee ásoonieni.
Mútiliŋ maamu umu,
murereg mútiyaara man uliik mee nꞌasomi mara uteyut mꞌbúsol sikambaano gabaj mee nꞌgabajut mee may.
11 Añúm,
jambil úsebi !
Bugan gaagu gúmimir mara aw akoña ajage.
Wanoowan nulobaam,
ínje be ekaani wo.
12 Maregen,
ínje ibili gajogoor mara aw anom.
Bare babaj hajooŋi reg ínje.
13 Ñeer uŋot taahe.
Gajom mꞌbújom nuñowaal.
Eéni ho be esoŋ eŋar fuyuhoum fara funafaanehool,
naŋar.
Eéni asoŋut,
ikalikali nꞌgajow gara Acehériit mee ínje be eŋari.
Uŋot taahe bu gajom mꞌbújom. »
14 Ñeer Rúut nafiiho bo nꞌgoot Boos.
Bare nayuhoáali nꞌurab nan an ájuhut afaas an.
Boos narok dó mꞌbúyegehool :
« Yo ekoloe,
an mat ámir mara akoña aahu ajaalojow taahe. »
15 Boos narogool :
« Upúren fútikoi min ujok fo jak.
» Ñeer Rúut najok fo liŋ min awuhulool dó útembej gafaakan nꞌguñen wara bajoser afaak,
najogool nateb.
Púr to,
Boos nabaañ bu nꞌésuk yaayu.
16 Rúut nabaañ bu bo nꞌasomool.
Naomi nasonkenool arogool :
« Asáabulom,
buu nkaane ?
» Ñeer Rúut nagaanool peepe wan Boos akaanool mee.
17 Rúut nabenen arogool :
« Asenansen útembej gafaakan nꞌguñen wara bajoser mara narogandok mat ibaañ bu bo nꞌasomom guñenom waroor go. »
18 Naomi narogool :
« Asáabulom,
ulako taahe nunaaka min ñum mee ganogoor eeno,
mara éeni Boos ajawulenut elob yaayu jaat,
mat súumool. »