1 Ulobaal mara paayolaal afaan Aburaham. Waa númiraale mꞌburoŋool ? Bakaanerool waa mbuŋarulool ? 2 Néeni Aburaham Atúuha ajogoojok an átilintiliŋ mara bakaanerool, ájuhe asalooro. Bare to nꞌAtúuha, bakaanerool bucilutool min ájuh asalooro. 3 Maregen, Busafer baabu buroge : « Aburaham gáyinenool Atúuha, gucile najogool an átilintiliŋ. »

4 Anooan ájagage bu nꞌan, ho be eyab bacaamool. Ban bacaam baabu let gájii, bare ésupaool. 5 Bare an akaanut mee haani waaf bu nꞌAtúuha mimbil ayab bacaamool, náyinen mara Atúuha abonkehebonket ukaana síjunube, Atúuha be ejogool an átilintiliŋ mara gáyinenool. 13 Atúuha najojok fuliik bu nꞌAburaham mꞌbúbajumool be eseniil dúniya. Fuliik faafu ajogut fo mara Aburaham ákaanunkaanum fuyuhoumool, bare gáyinen Aburaham gucile najogool an átilintiliŋ. 14 Eéni fuliik faafu kaanenkaan déhooro bu mꞌbugan gákaanum mee fuyuhoum fara Atúuha, gáyinen gaagu gunafaut, ban fuliik fara Atúuha emontoŋ. 15 Maregen, fuyuhoum nja fukankaan Atúuha náñigen, bare éeni bajut fuyuhoum, efaat mat ebajo.

16 Yo ecil mee gáyinen gubile ekaan min an ayab wan Atúuha arok mee be esenool. Ban fuliik faafu ufu to naŋ gájii bu mꞌbúbajum Aburaham búroom bo peepe. Let bu mꞌbugan gákaanum mee fuyuhoum faafu déhooro, bare may bu nꞌgáyinen mee, naŋ min paayolaal Aburaham áyinen mee. 17 Mara dó mꞌBusafer baabu Atúuha arok mee : « Ikankaan nꞌaw pay giil gamemmeeŋ. » Ho ammee paayolaal to nꞌAtúuha, han áyinen mee. Atúuha han nja asen mee buroŋ gacet mee, ban nakaan wabajeenut mee nubaj. 18 Aburaham áfabenut, áyinenyinen ban nákago nꞌAtúuha. Yo ecil mee nakaan pay giil gamemmeeŋ, naŋ min Busafer baabu burok mee : « Búbajumi mee mbubile emeeŋ. » 19 Haani min acik mee símit ceme, áleelenut nꞌgáyinenool. Apinoorut fufallenool ban añeerut mara akoñaool Saara farool fufaagofaago. 20 Aŋáraroorut nꞌwan Atúuha arok mee be esenool, bare no gáyinenool gurege ngubaje sembe min asal Atúuha. 21 Sehooset wic mara wan Atúuha arok mee be ekaan, ájujuh akaan wo. 22 Yo ecil mee : « Atúuha najogool an átilintiliŋ. » 23 Busafer baabu barok mee : « najogool an átilintiliŋ », busaferuti bu nu ho noonool 24 bare bu mꞌbúroomolaal may, mara Atúuha be eñeer nꞌgáyinenolaal, alaal gáyinen mee ho ayihene Acilaolaal Yéesu nꞌecet, 25 Yéesu hasoŋ mee be ecet mara síjunubeolaal, han Atúuha ayihen mee min ajogolaal bugan gátilintiliŋ.

6 Uñeeraal nꞌAburaham : « Gáyinenool gucile Atúuha najogool an átilintiliŋ. » 7 Ñeer mbil seholaal mara : fiil Aburaham fanfanfaŋ, fo fommee gáyinen mee. 8 Busafer baabu bupii bo mburoge : Atúuha be ejok bugan gakaanut mee Esúiif gútilintiliŋ mara gáyineniil. Yo ecil mee Busafer baabu mbulobáali Aburaham furim fásuume : « Miiya mubil mee ecil nísoonien fiilóofiil nꞌdúniya. » 9 Ñeer gáyinen mee, Atúuha be ésoonieniil naŋ min ásoonien mee Aburaham háyinen mee.

8 Gáyinen gucil mee min Aburaham asoŋ gawook Atúuha, min ajow bu bo mꞌmof mucee man abilool mee esen, bámirut ban ajae boot. 9 Gáyinenool gucil mee min atoosoor alako naŋ ajaaoora mꞌmof maamu man Atúuha arok mee be esenool. Nacong nꞌsíguut, babajerool Isaak nꞌSakob ngucong naŋ ho. Babajer Aburaham, Atúuha arogiirok be eseniil may waaf wanur waawu. 10 Ban Aburaham enaak naameene ésuk yabaje gúcit gahahank kaŋ, yan Atúuha fannaool abile écit nayihen yo.

11 Gáyinen gucil mee min akoñaool Saara haani min áfaanul mee, nájuh ebaj aleeh, mara náyinenyinen Atúuha : Wanoowan narok mee be ekaan, ho be ekaan wo. 12 Yo ecil mee, amaañen hanur ammee Aburaham haani min áfaanul mee najooŋoor ecet, búbajumool mbumeeŋ naŋ siwuut sammee nꞌémit son buruus bara gapana fal, dó peepe an ájuhut apin dó. 13 Bugan gaagu peepe gucecet nꞌgáyineniil Atúuha dó. Guyabut waaf wan Atúuha arok mee be eseniil, bare guŋandenŋanden wo kuhi, gufaak ngusal wo. Gusonsoŋ mara bugo ejaaoora, gasafaali ngujaalo baabe nꞌdúniya. 17 Gáyinen gucil mee min Aburaham aŋar aleehool Isaak bu gásimen, nan Atúuha acamen mee be eñow gáyinenool. Maregen, Aburaham boheen gásimen aleehool, hanur aahu, ban ayayab wan Atúuha arok mee be esenool 18 nan Atúuha arogeenool mee : « NꞌIsaak nubil mee ebaj guleeh gabile ekaan búbajumi. » 19 Aburaham nꞌgapinoorool Atúuha ababaj sembe sara gayihen an acecet, yo ecil mee Atúuha nabaañenool aleehool, nogoor naŋ an acecet nayihoúl.

20 Gáyinen gucil mee Isaak násoonien guleehool Sakob bugo nꞌEsawu mara wam bo mee néjool.

21 Gáyinen gucil mee, Sakob nan ammee necet, násoonien guleeh Suseef peepe, hanur hanur. Afaak ajojok fugolool, nayah gújuul min asal Atúuha.

14 Gutiom, nafa yéy yon to an erok náyinenyinen ban bakaanerool buliigut go ? Gáyinen naŋ gaagu gújuhe pére gukaan min Atúuha apagenool ? 15 Eéni ati'i teer áliini abajut bubonnoor son múcahoaay funagóofunak, 16 nafa yéy yon to acee mꞌbuguul erogool : « Ujow nꞌgásuumaay, émit ekaan ubaj bubonnoor nubaj úcaho upooñ déhooro » ho barandenutool ? 17 Eéni ulobaal mara gáyinen, sanur saasu, mara éeni úyinen Atúuha déhooro ban bakaaneri buliigut gáyinen gaagu, nafaut.

18 Bare an nájuhe arok : « Acee áyinenyinen Atúuha, bare aahu bakaanerool bujajak. » Mee ! Uliigom buu nújuhe úyinen baliigut gáyinen gaagu mꞌbakaaneri ! Injé may mꞌbakaanerom nibili eliik gáyinenom. 19 Núyinenyinen mara babaj Atúuha hanur. Dó jajak ! Haani siseytaane saasu may síyinenyinen mo, ban nsísebi jaram nak sitelen. 20 Bágun be ! Nucamencamen émir waa ucile nafaut gáyinen aw baliigut go mꞌbakaaneri ? 21 Taŋ, waa ucile Atúuha najok paayolaal afaan Aburaham an átilintiliŋ ? Mara bakaanerool kum ; asonsoŋ gásimen aleehool Isaak to nꞌfúsimenum faafu. 22 Uñoñow, Aburaham gáyinenool kum gujaaoojaaoor mꞌbakaanerool ! Bakaanerool bucil mee min gáyinenool gútiiŋ. 23 Wan Busafer baabe ube burok mee wo ukaane : « Aburaham gáyinenool Atúuha gucile najogool an átilintiliŋ. » Ngurogool apaal Atúuha. 24 Maareer ñeer jiñoñow Atúuha najogejok an átilintiliŋ mara bakaanerool, let mara gáyinenool déhooro.