aypila
19
1 se kanna nass kaan nass orr leketep kiyyu moontalleett sedep kidin antu dakay,
"halle luuyyaa!
dinilaanne serkaanne irrotanno heka moohaaynot!
2 horat iyyat quuriyyu shaakketanne tsillot;
arpalaytet se kaant arpalumaaddin huss patitt qarass horat quur;
horat it qari quuraayyennenno haarot diik erkamampayyooyy ooriyy."
3 qar ooren,
"halle luuyyaa!
qayyaa it ila sohanniyyu parparaashsh hak parparatess erreel sohannina!"
kiden ullupen.
4 qimaayyaa hund lakkenn afurenne uuma afur hinett Mooha se sheeddaan qari laddiyy turass sunken,
"ameen halle luuyyaa!"
kidan ishshoomaden.
sarket laah sett
5 sheedda daamum qara nass sedep kidiyyu sohad,
"inn iyyaan iyy huuriyy erkamampayyaayy hin tittinaxanne hin kakkaanenno dahenn moohaaynu aypisadaa!"
6 nass,
nass orr leketep kiyyu,
nass haq urqiyyotep kiyyu,
nass kaan hordana qaqawaatep kiyyonno sedep kidin antu dakay,
"halle luuyyaa!
iyy heikk fottiyyu moohaannu poldat hedaamumi!;
7 oot sarket laah sett paittenne haypanisheshayyenno dikkisatt maalla hooyaa masmasinaa!
ikkaani masmasinaa!
serkaanno iyyi dehannaa!
8 uuwaat qahnat haahsahahinnishshonne immiilt ikkim uwannintu iti daassam;
uuwaat hin qahnat erkama tsillot heka miilampayyaat kida.
9 sekanna hitaymishsh hinett,
"orr eetot sarket laah sett qallep hembam iyyaan hartood kidii tsaafii" ani kid;
lamm,
" lel hin shaakket,
lel settenno heka Moohaat" hekid.
10 ananno hitaymishsh setti shoomatttaassin lukkooyy keli sunk;
iyyat illo,
"sedep koda diiyii!
hedenne kafaayt hin yesusi maanyet koddiyy olle ananno erkamampayt;
Mooha shoomaduii!
maanyetum Yesus,
laaffot himat."
ani kid.
se fart at qari laddiy
11 sekkanna moontanno qahisant antu akk;
lamm fart atannon akk;
hin fart se qari laddiy iyy amaanamenne shaakketampayt hekidamin;
iyyat tsillumaann horat quurin adaassenno adin;
12 indooyyaanno haalayt apittatep kiyyan;
mashshayy qaranno sawtawwa lek kiyy;
mahh iyy pateeshsh nam pil ufunaatta diiy tsaafam kiyy;
13 iyyanno uuwaat diikin roopant uuwad;
mahhaayyenno "lel Moohaat" kidamin.
14 orr adant heka moontall iyyaan farassa axat qari laddiyy,
uuwaat atatenne it miilt qahnat uuwaad iyy kanni annin.
15 pillaw kaan qaarelayt iyyat siipin dawinonno kapayyalle sohannin;
iyyanno halitt silfatenn iyyaa peashinnina;
iyyat por woynet uqqalli jiipa qalli iqannina.
por woynet settetenno jiiayta se kaan heka Mooha se heikk fottiyyot akkinnin.
16 uuwaatayyenne shapatayy qarass mahh,
"Daam daamada,
pold poldalla" kidiyyu tsaafam.
17 lamm hitaymishsh shokku lashsh qarass ell antu akk,
iyyanno hampiraan moontallin hayanniyyass nass kaanin sedep kid ullup,
"eetot kaant hekat Mooha kapop hooyaa!
orqudop kiddaa!
18 soha daamadaatenne soha kaadayyaa toratenne soha tannapot adantatenne soha farassaatenne heka orr se fart qara anniyyatenne soha poldallaatenne heka aylammaatenne,
soha orr kakkaanetenne heka orr tittinaxatenne soha nam heikk hooyaa damaa!"
19 settep lamm pinant settenne daamada husslahatenne wotaattaraaddonno se fart se qari laiyyenne wotaattaraayy adaass orqudop kidden antu akk;
20 pinant settenno heqapant;
himampayt eerpampayt se shammot lekit ootaadd erkasan orr se ishaak pinant sett qeeddadenne pahanashaddi shoomanniyy patin dapusiyenno it olle qapam;
iyyaanno lakkaddon kiyyataddun pakatet apitt se tiinetin doohishshu ilop allkashamen.
21 iyyaan hat lamm pillaw se kap nam se fart at qari laddiyy qalle sohadenn ikawsamen;
hampiraanno dahenn soha orr sett damen quuhen.