sunkanta paapiloon
18
1 sekanna hitaymishsh pil iyy hayyotum kaan qapu moontalleett lekkanniyon akk,
serkooyy minan hussat attumay.
2 iyyanno nass kaanen,
"paapiloon hin kaant hesunkit!
hesunkit!
man qayyat koddit,
man laaffot oshshittet dahennetenno koddit!
man hampira oshiyaanne iyaan nam uuqiyat koddit!
3 siipat dahenn ukot arpalumaadd
se jiiayta Mooha akkinnishshu uken,
daamada hussatenno it olle arpalumen;
nakkaatawa hussallahatenno senusa kallatatenne lekussa shorokumad minan shorohot kodden."
hekid ullup.
4 nass pilanno moontallett sedep kidin antu dakay,
"siipoot!
juposhadd olle kinnaattaanne;
jiiayta Mooha it olle qootatta tura;
it ila allisohadaa!
5 juposhidd hak moontalletess toorant;
Moohot nayqunshadd qaapad;
6 qum it daatt mini iddayyaa;
hin it koditessenno hark lakk immitaattiyaa;
waallet se it ukot hawhaw kishshu uqqalli lahit qalless
hark lakk kodaa illahaa;
7 qum it isserkittenne naalt mittass
miidaa,
pooysiyyaa;
it mutsuroodd qalleet,
'haaetapin laina;
amm antu hiyaytetemu;
amm apure pooyt an qara paintamu' hekidin.
8 semmaalla jiiaytadaan dahenn lashsh shakkaah it qari painan;
toxtanne pooytanne laaotanno it qari painan;
apittannenno qassannint;
hin it qari horat quuriyyu,
Moohot poldat irrampayt."
9 daamada huss hin it olle arpalumenne naalan kallaad helpaan it doohishu iyyaa qayyaa akkiyaane ullupinan,
it pooyinan;
10 miidamaad qara nahaan por sek ellinan,
"saparaan kaanenne irrampaytet paapilonello!
pelaw hed!
pelaw hed!
horashitt saatet shakkaah ilass paitt" kidinan.
11 feaan konkaaddu qalle kiyy sed kanneesh nam piddinu teek maalla nakkaatawa husslah it qara pooyinan;
idappinninan;
12 mehaddaan konkaaddu qalli feamenno,
worqetanne pirretanne daka tsorenne inqotanne uuwaat qahanatenne uuwaat diikap kishshonne,
haritetanne uuwaat roomatene qoyr dinnaahunt somm qapu dahenn,
mehadda iilla arp ila soorumamenne mehaddaan qoyr lombenne naassetanne silifanne ipne pereta ila soorumam dahenn;
13 qoalla qoyr iyyaan dinnahiyanne qimaametanne qoyr dinnahiyonne kerpetanne hitsaananne ukot woynetatenne tif ekertatenne daammaanne kaappaanne lohaanne helemmaanne farassaanne sarakellaanneb aylammaanne orr pilanno kida.
14 nakkaatawaanno,
"hin diddikk att hadatt hed kenda hesekaaden tawen;
shorokumaytenno siraattanno dahenn hepaten;
sedeeshsh amm hin akkannihhintamu!"
he it kidinan.
15 nakkatawaan mehadda iti kashan shorohot kodd miidamaadd qara nahaan por sek ellinan,
pooyaanne dappisaan,
16 "saparaan kaan
uuwaat qahanatenne uuwaat roomatenne,
uuwaat diikap kishshonno uuwaanishu,
worqetannenne daka tsorenne inqotannenno sirattess pelawu,
pelawu!
17 shorokum sedep kiyyu kaan saatet shakkaah qalless pat!"
hekidinan.
orr sinkiyya konka koddenne,
iyyaan konka qalle anniyaanne,
iyyaan konka qara erkanniyanne hin pakatet qara erkanniyanno dahenn por sekass ellen;
18 helpaan saparaan doohiyan,
iyyaa qayyaa se sohanniyyu akkene,
"sapara pil iyaan sapara hinep kaan aha kiyan apure?"
kidaan ullupen.
19 mashshaddu qarassenno tsura puladen pooyaanne dappisan,
"orr hin pakatet qara konkada qap dahenn
hin shorokumaaddin shorohot kodd,
pelawu!
pelawu!
saparaan kaan saatet shakkaah qalless allipaten!"
20 moontanne miilampayyaanne orr hitaymatenne himampayyaallo,
Moohot haaroshayn oorisaass it qari horat quure,
hin it qari deyn masmasaa!
kden ullupen
21 sekanna hitaymishsh irrampayt shokku dakalla kaan ombashap kiyyu qeedd pakatet ilop happ illo sedep kid,
"saparaan kaan paapiloonet
irrot sedep kishshonn happaminta;
amm sed kanneesh shokkooh nafin akkaannintamu.
22 nass shonqa dawampayyaatenne laalampayyaatenno,
nass kulluttat dawampayyaatenne kaass keehisampayya,
lakkiyya amm hed ila dakaysamaanninamu,
soorit erkama harka mina erkanniyyu dahenn
amm sedeeshsh hed ila akkaanninamu;
nass ombashatenno
amm sedeeshsh hed ila dakaysamaanninamu.
23 attumat ispaatenno amm sedeeshsh hed ila opawintamu;
nass haypanishatenne heka haypaat amm sedeeshsh hed ila dakaysamaanninamu;
nakkaatawaatt huss qara orr kakkaan makess;
soumaaytennenno siip dahenn patan dapusitt.
24 it ila diik himampayyaatenne heka miilampayyaatenne,
heka orr se husslah qara ikawsametenno dahenn akkaad.