arpalaytet se kaant
17
1 hitaymiyya tapp hin waallawaan tapp qapad ila iyy shokku an kapop dey illo,
"hooyii!
horat arpalaytet se kaant haq lek qari laitt qari deyintun hed akkinninaa;
2 daamada husslah it olle arpalumen;
hin huss qara kallaanniyaanno woynet arpalumaaddeten taaroden" kid.
3 lamm hitaymishsh settenno laaffot miilotann lak patpatt kiyyop anan aan;
iskattet shakk it pinant room dakintadd dahenn qar mahhada otitta innaaken,
mashsh tappanne kaassa hund qaftu qari laittin akk.
4 iskattet settenno uuwaat roomatenne diikap kishshu uuwatt;
worqetanne daka tsorenne inqotin issirit;
harkadd qallessenno waallet worqet ila soorumant,
iyaan nam uuqiyanne oshum arpalumaadd uqqalli innaakood qapatt.
5 miintadd minassenno mahh dekam,
"paapiloon se kaant,
inkot arpalayyaatenne hekat oshum husslah dahenn" kidiyyu tsaafam.
6 iskattet settenno diik miilampayyaatenne diik maanyet yesuseten taarott antu akk;
helpaan antu it akke ikkaanessin shammad.
7 hitaymishsh settenno,
"maanaa shammannin?
heka iskattet sett hin dekamenne heka pinant se it qari laitt mashsh tappanne kaassa hund qapu hin dekamin hed akkinnina.
8 pinant hin att akkit turan hekishsh;
amman amm hekishshamu;
ukanna didim se kela sohanninta;
illo allipatinta;
orr hak husslah uumameesh hir mahhadaaddu maskap kiyyat qar taafama diiyy husslah qara kallaaniy,
pinant hin tureesh kinnaattaadd,
ammann teekaad,
ukanna lamm deyaad akkiyane shammanninan.
9 qall qaapattanne ufunat fadamishu ari ila kida.
mashshadaan tapp,
utawa tapp hin iskattetin uqqari laittenne
10 settep lamm daamada tapp kida,
hen hesunken;
shokku ammann hekiya;
ishshokku amm sanu hedeyemu;
helpa iyyat deyo iqojeseeh olatta iyy fadusinnin.
11 Daam lakkushiyot pinant se tureesh kishshonne ammann lamm teekit kida;
it pinant tapp se ila shakk kida;
itanno allipatint.
12 kaassa hund hin att akkit daamadaan sanu daamum qeeddatta diiy kida;
hekoddu male pinant se olle saatet shakkaah daamumaass hayyotum akkanninan.
13 daamada hin hund qaap shokkooh qapan;
iyyaa irroshaddonne hayyotumaaddu pinant settess allidaanninan.
14 iyyaa laah sett qarass tor qahinninan;
hekoddu male oot laahatin pold poldallaatenne Daam daamada kodd maalla iyyaan pushina;
iyyaan iyy olle kiyy,
hembamenne pahisamenne amaanamenno iyy olle pushinan."
15 hitaymishsh settenno sedep an kid,
"haq lek hin iskattet arpalaytet hin uqqari laitt att akkit,
kafanne orr lekenne siipanne kap hawhaw kikkiyyu kida.
16 kaassaan hundanne pinant hin att akkit iskattet sett qar hittinninan;
patet qarin inpainan;
patpatt it hattinninan;
sohaaddanno daminan;
apittannenno qassinninan.
17 maana maalla,
Moohot ikkim qaapaayy kaysinninaness qaap sed mutsuraaddu qalli haay;
semmaalla hak qaap Mooha kaysaanninoss iyyaa qaap shokkoohin olliseninan daamumaddonno pinant sett daanninan.
18 iskattet hin att akkit saparaan kaan daamada husslah qari daamumina kida.