waallawaan miir Mooha uqqalle kiyyu
16
1 nass kaan hitaymiyyaan tappass,
"aanaa!
miir Mooha se waallet tapp qalle kiyyu husslah qari tiiqaa!"
kidiyyu man miilot sett talla sohanniyyon dakay.
2 hitaymishsh tureeshshatenno heaan waallet se qalle husslah qari tiiq;
orr se ishshaak pinant sett qaponne pahanashayyi shoomanniyy peesat nayq nam rakkusinnishshonn qapamen.
3 hitaymishsh lakkiyyaanno waallet se qalle pakatetall tiiq;
pakatet settenno diik nam toyetep koddit,
uuma kiyyat qapu pakatet ila kallaanniyyonno dahenn raaw.
4 hitaymishsh halpattiyyaanno waallet se qalle haq urqiyyonne aykaallep tiiq;
iyyaanno diik kodden.
5 hitaymishsh se haq qarin hayyotum qaponno,
"hed se kiyyonne ulla kalu miilampaytallo!
oot att sedep horat quurt maalla
att tsillampayt;
6 oot iyyaa diik miilampayyaatenne heka himampayya allitiiqen maalla;
hedenno diik iyyaa ukkitt;
hin iyyaass fadusinnin"
hekidin antu dakay.
7 por laaqqa uqqari Mooha dehasa qaraashshanno nass,
"heye!
hed se heikk fottiyyu pold moohaallo!
horat att quurishshu shaakketanne it pahit" kidiyyun dakay.
8 hitaymishsh afuriyyaanno waallet se qalle lashsh qari tiiq.
lashshanno apittaddin nam doohisaass irrot iddaasant;
9 orranno apitt se kaanenn doohen,
mahh Mooha se jiiaytadaayy qarin hayyotum qapotenno oten;
serka idaattaassenno amm jupposhaddu qara hemitaatenemu.
10 hitaymishsh heniyyaanno waallet se qalle sheedda daamum pinant sett qarass tiiq;
daamum pinant settetenno poorinnat koddit;
orrat miidamaaddu minann arrapaddu qall damin;
11 miidamaaddonne peesashaddu minannenno Mooha moontall oten;
amm erkamaan nayq qaranno hemitaatenemu.
12 hitaymishsh lehiyyaanno waallet se qalle haq kaan urqiyyu efraatsis kidamiyyu qarass tiiq;
ikkim paanot daamadaan dind lashsh yaamishooll deyiyyi dikkisaminu haqatin kokiyy.
13 kap paf settetenne kap pinant settetenne kap himampayt eerpampayt qallenno laaffot oshshiyya halpatt,
koannatap kikkiyy sohanniyyanen akk.
14 iyyaa laaffot qayy iyyaan shammot erkanniyy kida;
laaffotadda hin lashsh tor se kaant,
Mooha se heikk fottiyyun koddintu qallep ikkim daamada husslah dahenn kalinninaness iyyaa kapop anninan.
15 "toare keraapin inn kenda deyina;
nam patpatt kinnaatta illo orrat deesoshayy akka tura uuwashayy qar lushanniyyu iyy hartood!"
16 laaffotadaan nanayqanno daamadaanett por se kap ipretatin armaketon kidamiyyu orqudiqapen.
17 hitaymishsh tappiyyaanno waallet se qalle haayya qarass tiiq;
man miilot sett talla sheedda daamum qaraashanno nass kaan,
"hekaysaatt" kidiyyu sohad.
18 paqanaanne hordanaanne qaqawwaanne,
shilda huss iyaan kaanenno kodden.
shilda huss iyaan sedep kaan hak namat huss qara uumameeshsh hiran amm apure hekoddenemu.
19 saparaan kaanenno halpattass qall qootamen;
sapara orr ayhuta kodda diiyyetenno hepaqisamen.
Moohot paapilon se kaant immashshxoorsad,
waallet woyynet se miirayy hin qim uqqalli innaakod ikkim ukintosenno kodusiyy.
20 utunnawaan haq ila kiyyaanno dahenn allifeeladen;
utawwaanno amm heakkaadenemu;
21 paddayt kakkaan shokkushokkotayye kiilot hund afurenn hen koddaayy moontallett siip qari roop;
oot paddayt hin jiixayta Mooha minin dey ikkaan kaan kodd maalla siipat Mooha oten.