hitaym yihuta
paanussa
1
1 yihuta kafitta yayqoop erhayt Yesus kristoos kapa,
orr se hembam,
Mooha appan hoxsasham illo Yesus kristoosin lushamess.
2 mutsuroottanne,
andotanne hoxsunt inni lekenii.
kollisampayyaa eerpampayyaa
3 moyshaddot,
oot dinatta se innu ollin qafnu inni tsaafassin ikkaani fad makess,
hekoddu male amaantet se shokkoohin itturi miilampayya daasant ikkim qimintan sotintan inn korsa tsaafa an fadusitt.
4 antu maalla sed inni tsaafa fad,
oot orr shakkan hin horashiddu olo ulli tsaafant deketin otanshayn ilop kalen maalla kida.
iyyaanno,
iyyaan Mooha huura diinniyy,
daayyaayyenno oshshumin oohiyyanne se iyyeeh piddampaytaynonne poldaaynu kodd Yesus kristoos marmiyy kida.
5 sed dahenn turaqatta et ufnaattan koddu nafenno,
poldat siipaayy huss kiptsi qalle ikkim sohashshiyy diniyy illo ukanna orr se amaanna diinniyyu ikkim allipatiyin inn mashsh oorisa fad.
6 settep lamm hitaymiyya Mooha hin hayyotumaaddu lushatta diittan manaddu all diiyy immashshi oorsadaa.
Moohot hak lashsh se kaant hekat horatatess hidan parparatin poorinnat nayq ili iyyaa lushusiyy.
7 paana sedep kiyyonn sotomenne kamoraanne saparaan ukapaash kiyyanno arpalumen;
paana daassama diiyyennenno ollin arpalumen.
semmaalla iyyaa orr se horat apitt parpar qeeddanninoss paahnat kodden.
8 paana settep kiyyonn orr hin oommoshaddu sinkitti kodattan dakinshaddu oshumusinnin;
hayyotassenno amm acacamiyyanemu;
hin moontalle serka qapanno otin.
9 helpaan hitaymishsh Mooha hin kaan mikaayla nafenno dakint muus qara taapiloos olle shiittamade,
"Mooha hed tusho" he ikid male,
amm otitta helelemu.
10 orr hin lamm iyaan iyyaa qallqaapatta pushmaaden dahenn otin;
qum horet se qaap daftep iyaan iyyaa nassin ishshaakiyyanenn patinan.
11 pelawu iyyaass!
iyyaa paana qaayel qallenn aanen;
iyyaa kodashshet maalla kiden patandapat peleaamep kishshu qallep tunen;
qum qorenno shiittep,
shiittan allpaten.
12 orr hin deesot male damoshayn hekat hoxsunt ili akkaanniyyane pinnatt inni koddin.
iyyaa mashshaddoseeh ishshikinnin;
soort roop daft haayyan annishshop,
qoyr helpa dalotate dalot dap,
hittinan allipusham,
lakkin toyep kiyyan.
13 iyyaa iyyaan kaahatta pakatet se hara harishshotep deesoshiddu harishshop,
hiskaan errquda anniyy illo poorinnat nayq parpar iyyaa lushishshop kiyyan.
14 oot orr sedetenno henok hin ataam kanna dalashot tappiyyaa kodd,
"toare,
poldat miilampayyaan kumaddan dihamiyy olle nam heikk qari horat quura deyina.
15 lamm orr se Mooha ufunaatta diiyy dahenn erkamaddu hin nayq iyyaa erkayyen dahenn maalla horat iyyaa qari quurina;
juppampayyaa hin Mooha ufunaatta diiyy,
lel otitt se iyyaa Mooha qari lelenenn dahenn maalla hort qari quurina."
hekid him.
16 orr hin iyyaan helpa min kumulliyyanne akkan shokkooh nafi masmasa diinniyy kida;
iyyaa hadashaddu se nayq kannass anninn;
kapaaddu ishaama foojateeh ishaamin illo iyaan iyyaa seniyy maalla nam issep qapannin.
korsa muutayta
17 hekoddu male inn lamm moyshadot,
hin orr hitaym heka poldaaynu heka Yesus kristoos turaqatta lelen immashshi oorsadaa.
18 iyyaanno,
"sapan muutaytaate beejjanppayyaan hadashaddu oshshittet kanni anniyy koddinan" he inni kiden.
19 iyyaa iyaan otanshayn qalle reehaytan deyiyy;
orr qaap sohaateeh qapu,
laaffot miilot dapp kida.
20 hekoddu male inn lamm moyshadot,
amaanteshayn se miilitin qimaa kokkaadaa;
irrot laaffot miilotatennenno dinkamadaa.
21 mutsuroottaayyenn poldaannu Yesus kristoos ikkim kiyyat parpar qallin innin painninnu lushattan mashshayn hoxsunt Mooha qall illushadaa.
22 orr se shurshuriyyu mutsuroodaa;
23 orr karayy apitt ila passiyyaa diniyyaa;
orr shokkoss lamm uuwashaddu se dakinshaddu se juppotin oshshuntin iqappatt naf qari hittiyyaa,
hor huurran iyyaa mutsuroodaa.
dinkam aypila