28
यीशु दोबारा जी भुआ
(मरकुस 16:1-10; लूका 24:1-12; यूहन्ना 20:1-10)
1 सब्त रै धैड़ै थऊँ बाद हप्ते रै पैहलै धैड़ै भ्याग भून्दै ही मरीयम मगदलीनी अतै दूई मरियम कब्रा जो हेरना आई। 2 अतै हेरा, अक्क बड़ा भूकम्प भुआ, क्ओकि प्रभु रा अक्क दूत स्वर्गा थऊँ ऊतरू अतै नैड़ै ईच्ची करी तिनी नड्डा जो हिलाई दिता, अतै तैस पुर बैही गो। 3 तसेरा रूप बिजळी साईंये अतै तसेरै कपड़ै पाळै सांईये चंमकू करदै थियै। 4 तसेरै ड़रा रै पैहरैदार कंमी पै, अतै मरूरै सांईये भूच्ची गै। 5 स्वर्गदूते जनानी सोगी बलु, “मत ड़रा, अऊँ जाणदा कि तुहै यीशु जो जैडा क्रूस पुर चढाऊरा थु हेरना आई। 6 सो ऐड़ी निय्आ, पर अपणै वचना अनुसार जी भच्छुरा। अईआ ऐह जगह हेरा, जैड़ी प्रभु पैऊरा थु, 7 अतै झट गिच्ची करी तसेरै चेलै सोगी बला कि सो मरी करी जी भूआ, अतै तैस तुसु थऊँ पैहलै गलील जो गाणा, तैड़ी तुसु तसेरा दर्शन पाणा! हेरा, ऐह गल्ल मैंई तुसु तक पुजाई दितिआ।”
8 सो ड़रा सोगी अतै बड़ी खुशी सोगी कब्रा थऊँ झट तसेरै चेलै जो यह खवर हुणणा दौड़ी गई। 9 ता यीशु तिआं जो मुळू। अतै बलु, “सलाम”। तियें नैड़ै ईच्ची करी अतै तसेरै पैर पकड़ी करी तैसिओ दण्डवत करू। 10 ता यीशुऐ तिआं जो बलु, “मत डरा; मेरै भाई सोगी बला कि गलील जो चली गच्छा, तैड़ी तिआं मिन्जो हेरना।”
पैहरैदारा री सूचना
11 सो गाणा लगुरी थी कि पैहरैदारै नगर मन्ज ईच्ची करी पुरा हाल प्रधान याजका जो हुणाई दिता। 12 ता तिन्यै स्याणै सोगी किठ्‌ठी करी सलाह करी अतै सपाई जो मती सारी चाँदी दी करी बलु, 13 “ऐह बलै कि राती जैहणै अहै सोऊ करदै थियै ता चेलै ईच्ची करी तैसिओ चोरी लैई गच्छुरै हिन। 14 अतै अगर यह गल्ल हाकमा रै कना तक पुजली ता अहै तैसिओ समझाई लैले अतै तुसिओ जोखिम थऊँ बचाई लैलै।” 15 ता तियें पैसा लैई करी जियां प्रधान याजकै बलणै जो सखाये तिआं ही तिईयें करू। ऐह गल्ल अज्जा तक यहूदी मन्ज प्रचलित हा।
यीशु फिरी हुजै अतै आखरी हुक्म
(मरकुस 16:14-18; लूका 24:36-49; यूहन्ना 20:19-23; प्रेरिता रै कम 1:6-8)
16 ग्यारा चेलै गलीला मन्ज तैस पहाड़ा पुर गै, जैतिओ यीशुऐ तिआं जो दसुरा थु। 17 तिये तसेरा दर्शन पाई करी तैसिओ प्रणाम करू, पर कसकि कसकि जो शक भुआ। 18 यीशुऐ तंयारै नेड़ै ईच्ची करी बलु, “स्वर्ग अतै पृथ्वी रा पुरा हक्क मिन्जो दितुरा हा। 19 ठेरैतांये तुहै गच्छा अतै, सब जाति रै मणु जो चेला बणा: तिआं जो पिता, पुत्र अतै पवित्र आत्मा रै नां रा बपतिस्मा देय्आ, 20 अतै तिआं जो सब गल्ला जैड़ी मैई तुसिओ हुक्म दितुरै मनणा सखा: अतै हेरा, अऊँ जगत रै अन्त तक तुन्दै सोगीआ।”