4
यीशु री परीक्षा
(मरकुस 1:12-13; लूका 4:1-13)
1 फिरी आत्मा यीशु जो बियावान जगह मन्ज लैई गो, ताकि शैतान रा दूत इब्लीस तसेरी परीक्षा करी सका। 2 यीशुऐ चाळी दिन रात कुछ ना खाऊ, फिरी तैसिओ भूख लगी। 3 ता इब्लीसे इच्चीकरी तैसिओ बलु, अगर तू प्रमात्मैं रा पुत्र हा, ता इंया नड्डा जो बल्ल कि रोटि बणी गान। 4 यीशुऐ बल्लु;
“ग्रन्था मन्ज लिखुरा कि मणु सिर्फ रोटी खाई करी ही ना,
पर हरेक तैस वचन थऊँ जिन्दा रैही सकदा, जैडा कि प्रमात्मैं रै मूँहा थऊँ नकैन्दा।”
5 फिरी इब्लीस तैसिओ पवित्र नगर यरूशलेम रै बड्डै मन्दरा जो लैई गो, अतै तैस मन्दरा रै चूण्ड़ी पुर खड़ेरी दिता। 6 अतै बल्लु, “अगर तू प्रमात्मैं रा पुत्र हा ता अपणै आपा जो एडी थऊँ फैंकी दे: क्ओकि ग्रन्था मन्ज लिखुरा कि:
तैस तेरै वारै मन्ज अपणै स्वर्गदूता जो हुक्म दिणा;
कि सो तिजो हथ्थो-हथ्थ चुक्की लैन;
करखि ईंआ ना भोआ कि तेरै पैरा मन्ज ठोकर लगा।”
7 यीशुऐ तैस सितै बलु; ग्रन्था मंज एह भी लिखूरा,
कि तू प्रभु अपणै प्रमात्मै री परीक्षा मत कर।
8 फिरी इब्लीस तैसिओ अक्क बड़े उचै जिनै पहाड़ा पुर लैई गो, अतै पुरै संसार रा राज्य अतै वैभव दसी-करी 9 यीशु सोगी बलु, कि जे अगर तू मेरै पैरै पैई करी मेरी भक्ति करा, ता एह सब कुछ मूँ तिजो दि दिणा। 10 ता यीशुऐ तैस सोगी बलु; हे इब्लीस शैतान दूर भुच्ची गा, क्ओकि ग्रन्था मन्ज लिखूरा कि:
तू प्रभु अपणै प्रमात्मैं रै ही अग्‍गो झूकैं
अतै सिर्फ तसेरी ही भक्ति करैं।
11 ता इब्लीस तसेरै नेड़ै थऊँ चली गो, अतै हेरा, स्वर्गदूत इच्ची करी तसेरी सेवा करना लगै।
यीशु रै सेवा रे कमा री शुरूआत
(मरकुस 1:14;15 लूका 4:14, 15, 31)
12 जैहणै यीशुऐ हुणु कि यूहन्ना पकडाई दिता ता सो गलील जो चली गो। 13 अतै नासरत जो छड्डी करी झीला रै कनारै कफरनहूम मन्ज रैहणां लगा, जैडा कि जबूलून अतै नपताली रै देसा रै ब्रखै हा। 14 ताकि जैडा यशायाह भविष्यद्वक्ते बलुरा थु, पुरा भोआ कि:
15 जबूलून अतै नपताली रै देस,
झीला रै रस्तै यरदन नदी रै पार गैर यहूदी जेड़ै गलील मंज
16 मणु अज्ञानता मन्ज जिंऊ करदै थियै तिन्यै अक्क बड़ी लौ हेरी;
अतै जेडै मौत रै देसा अतै तठेरी छाईं मन्ज बैहुरै थियै, तिआं पुर सो लौ चमकी।
17 तैस टैमा थऊँ यीशु प्रचार करना अतै यह बलना शुरू करू, कि मन फेरा स्वर्गा रा राज्य नेडै चली आ।
पैहलै चेलै रा हदआ गाणा
(मरकुस 1:16-20; लूका 5:1-11; यूहन्ना 1:35-42)
18 यीशुऐ गलील री झीला रै कनारै हंड़दै-हंड़दै दूँ मछुआरै भाई जो पाणी मन्ज जाल पांदै हेरू, जिआं मन्ज अक्क शमौन जैसिओ पतरस बलदै थियै, अतै तसेरा ही भाई अन्द्रियास। 19 अतै तिनी तिआं जो बलु, मेरै पिचो चली अईआ, मूँ तुसिओ मणु जो पकड़णा अतै तिंया जो प्रमात्मैं री कनारी फेरणैं बाळा बणाना।” 20 सो झट अपणै जाला जो छड़ी करी तैस पिचो चली पै।
21 अतै तैड़ी थऊँ अगो गिच्ची करी, तिनी जब्दी रै पुत्रा याकूब अतै तसेरै भाई यूहन्ना जो अपणै बुड्डै सितै किस्ती पुर जाला जो ठीक करदै हेरू: अतै यीशुऐ सो भी हैदी लै। 22 सो झट किस्ती अतै अपणै बुड्डै जो छड़ी करी तैस पिचो चली पै।
यीशु रा रोगी जो ठीक करना
(लूका 6:17-19)
23 अतै यीशु पुरै गलील मन्ज फिरदा अतै तंयारी धर्म सभा मण्ड़ली मन्ज उपदेश करदा अतै राज्य रा सुसमाचार प्रचार करदा, अतै मणु री हर तरह री बमारी अतै कमजोरी जो दूर करदा रैहूं। 24 पुरै सिरिया मन्ज तसेरा नां फैलदा गो, मणु सब बमारा जो, जेड़ै कई तरह री बमारी अतै दुखा मन्ज पैऊरै थियै, जिंआ मन्ज दुष्टात्मा थी, मिर्गी बाळै, हद्रंगी जो तैस बलै लैई आए अतै तिनी तिंया जो ठीक करू। 25 गलील, दिकापुलिस, यरूशलेम, यहूदीया री जगह अतै यरदन नदी रै पारा थऊँ भीड़ा री भीड़ा तैस पिचो चली पैई।