Na Turak i
Judas
1
Ikkanak iyaw, i Judas a gumasserbi i Jesu Kristo anna wayi i Santiago. Matturakak sikwayu amminan a pinili i Dios Ama a akwana, a iddu-iddukanna anna imu-imuran i Jesu Kristo.a2 Idasalku a tattullot a allakkannana kayu i Dios, iddukannana kayu anna pammapiyannanengke yo akkatoleyu.
Na Sasan-Mestruwera
3 Ikkayu a iddu-iddukangku, kanggamkuwengke nad a matturak sikwayu meafu si pannabbut a nabbabafarallayantam amminan a minangikkurug ira. Udde sitoye, naitak a maawagku a matturak sikwayu meafu so mappatuyag si nakam diyaw takesi mataddan ino angngurug a namitta a neyaddana i Dios so tolenera. 4 Natturakak sikwayu gumafu se ammeyu naginna a natallung dakayuweno korwan a sasan-mestruwera a mangilillin a pabawun ino tunturuwera meafu so simpat i Dios takesi makaangwa si kinamaral. Tinalekkuranda yo Afutam a Jesu Kristo a makan-akwa si angattam. Baggira yo tolayera a awan Diosda a siin kepay e nakaparanin a makastiguwan meantu si katurakkan.
Na Pannunut so Sasan-Mestruwera
5 Maski ammuyun amminan iyawera, kanggamku a ipadandam sikwayu a tinabbutna i Afu Dios ino Israelitera si akkeyimbutda so Ehipto. Udde si kauddiyanna, kinastiguwanneno tolayera a amme mangurug sikwana. 6 Dandamman diyaw payeno anghel ira a ammera inangweno kalangananda a neyaddana i Dios sikwara. Inanawandeno lugar a neyaddana i Dios sikwara a manolay si langit. Antu kinawarannera i Dios amu-amu so kalammukan na infiyernu makiyad so Aw na pannunut sikwara. 7 Kakunna yo anghel ira a kinastiguwan i Dios, yo taga-Sodoma anna taga-Gomorra anna so tolayera a karebbing a lugarda e nakastiguwan ira pay so awan pakiyaranna a afuy so infiyernu a pappalán si amminan. Nangwera si amminan a garannud na pakikkarallaw, maskiyeno makidurug si bakkanda a kaparefu onnu atawa.b
8 Kunnapay so sasan-mestruwera a nakibulun so grupuyu. Ana paimatandera a manussug sikwara a mangwa si kamarallan si baggira ingkepay. Ammera a mappatangngal so pakapangwa i Dios anna insu-insultundeno anghel ira i Dios. 9 Maski i Miguel a afu-afu na anghel ira, sin makitinnulyat baggina sike Satanas nu yanya sikwara yo mangappana so baggi i Moises e ammena nassapit si maral sike Satanas. Ino lamang sinapitna e “Kastiguwan naka i Afu Dios!”c 10 Udde massapit si maral ino sasan-mestruwera si sanna a ammera maintindiyan. Mekunnera si aggayam ira a ammera nonotan ino akakwanda, awan korwan a tuntulanda nu bakkan ino nakamda a antu yo manaral sikwara. 11 Madammatnengkeno akkastiguna i Dios so manunturuwera si sasan-tunturuwera. Mangwera si maral kakunna i Cain a namatay si wayina.d Maanap ira a nalliwat kakunna i Balaam a nalliwat sin nabayagin a tiyempu gumafu se maagum ira pay si pirak.e Anna kakunna pay i Korah, narrebeldera metulyat sike Dios, antu makastiguwan ira pay a kakunnana.
12 Iyaw a sasan-mestruwera e kakunna yo dakkut sikwayu—mangiyatatal ira si pattatarallangan diyaw si pangnganan a mawwawayi si angngurug. Makiakkan ira sikwayu anna ammera maatal so akakwanda. Mekunnera si gumappastuwera a tabburanda lamang yo baggira ingkepay. Awan serbira kakunna yo dulam ira a ipalle-palled na leled udde ammena mangikangkalin si uran anna kayuwera a awan bungana si tiyempu na aggani, nasiddut maski yo gamutnera anna kurwengke natayin. 13 Kakunnara pay yo madakkut a lulu so matutuyag a palung ira so bebay, maita na tolayera yo kaatatal a akakwanda. Ammera mainnanaman, manillera bullalayawera a nawawan so fustu a dalan. Antu nangiparan i Dios si lugar para sikwara amu-amu so infiyernu nu sintaw awan ingke sirwat.
14 I Enoch a nebilang so meka-pitu a diyafuwan i Adam e nallabbun meafu sikwara. Kunna, “Maningngag kayu, dumatangnga i Afu Jesus bulunneno rinifu a anghelnera 15 takesi nunutanna amminan. Kastiguwannana amminan a tolayera a mattulyat sikwana so amminan a maral a inangwara si makurang a pangilawara sikwana. Kastiguwannana amminan iyawera a sinaliwat a ammera maddayaw sikwana. Kastiguwannanera amminan so maral a sinapitda metulyat sikwana.”
16 Iyaw a sasan-mestruwera e maumid a marreklamu anna ammera makuntentu, manandaral ira si kasittolera, anneno lamang a tuntulanda e yo maral a gakkadda. Balagasayera si aggabiranda, anna illo-illokundeno tolayera takesi maappareno kanggamda.
Pappalán anna Tabarang ira
17 Udde ikkayu a iddu-iddukangku a wawwayi, dandamman diyaweno sinapit na apostol ira i Afu Jesu Kristo a mededemmu. 18 Kunda, “Si mauddi a tiyempu, ananeno mangayoyung a tolayera a antu lamang a tuntulanda e yo maral a gakkadda.” 19 Ira yo tolayera a manaral si pattataratayu. Mangwa-angwera si maral anna awan sikwareno Espiritu i Dios.
20 Udde ikkayu a iddu-iddukangku a wawwayi, maddidinnuffun kayu takesi annanot kepay a mattuyag ino angngurug diyaw sike Dios. Maumid kayu a maddasal si duffun ino Espiritu i Dios. 21 Maumid a mapureban diyaweno idduk i Dios. Sigga-innanaman diyaweno allak i Afutam a Jesu Kristo makiyad si manolay etam a bulunna amu-amu. 22 Ikallak diyaweno mabbabang ira si angngurugga. 23 Duffunan diyaweno korwan ira a matabbut si akkastigu i Dios.f Ikallak diyaw payeno korwan a tolayera a naillokuweno sasan-mestruwera udde mimud kayu takesi ammera kayu maimfluwensyan. Ikalussoyuweno akakwanda kakunna yo pammay diyaw si namantsan a barasi.
Pammadayaw anna Pammabalat sike Dios
24 Dayawantam i Afu Dios a baggina yo mimud sikwayu takesi amme kayu malliwat anna makapatallang sikwayu a awan pakaliwatanna anna ana dokal a pammalamuwang si kadayawanna. 25 Baggina lamang yo Dios anna Mannabbuttam megafu sike Afutam a Jesu Kristo. Mamefu kepay siin makiyad sitoye anna amu-amu, bagginan yo dinayaw, neyatannang, manangngal anna makapangwa. Amen.