Na Meka-tallu a Turak i
Juan
1
Ikkanak i Juan a afu-afu na minangikkurug ira. Antuweyaw yo turakku sikwam Gayo a gakkurug a iddukangku. 2 Iddu-iddukangku a kolak, idasalku a mapiya nad yo akkatolem anna mattuyag ino baggim a kunnapay a ammuk a matuyagka si espiritum. 3 Maanggammannak ingke sin dinumatang ino korwan a kakkolaktam ira si angngurug sitaw anna kunda se makurugka si kagakkuruwan anna aggatoleka meantu sitaw. 4 Awan korwan a makapaanggam sikwak nu bakkan a madingngagku inoyera a ibilangku a anakkuwera si angngurug a manolay si kagakkuruwan.5 Iddu-iddukangku a kolak, yo asserbim si wawwayiyera si angngurug a maddoyu-doyug a akakwandeno aggangwa i Dios, maski so ammem a ammu-ammu e mangipaita a makurugka sike Jesu Kristo. 6 Baggireno nassapit meafu so aggiddukngu si minangikkurug ira. Parennad se duffunannuweno kakunnara so paddoyugga gumafu se iyan yo makapaanggam sike Dios. 7 Se iyaw a tolayera e maddoyu-doyug tapenu masserbi sike Jesu Kristo, anna ammera narang si duffun so bakkan a minangikkurug ira. 8 Kunnantu, maawag a ikkanetam a mangurug e manuffun nad sitaw a tolayera takesi makaballay etam sikwara a mangipakaammu si kagakkuruwan.
I Diotrefes anni Demetrio
9 Ana yo neturakku siin so minangikkurug ira sitan, udde i Diotrefes ammena inarasaweno pakandamak gumafu se kanggamma a baggineno afu-afu sitan. 10 Kunnantu, nu umangak sitan, ilawangkuna amminan ino maral a akakwanna anneno passalasirina metulyat sikwami. Inammayan i Diotrefes a padulotan ino kolak ira si angngurug anna neyallangngeno korwan ira a manggam a mappadulot sikwara anna ammenera nepabulun a makibulun so pammu-ammungan ino minangikkurug ira.
11 Iddu-iddukangku a kolak, ammem tuntulan ino maral udde tuntulannuweno mapiya. Seanya yo mangwa si mapiya e anak i Dios udde seanya yo mangwa si maral e ammena ammu-ammu i Dios. 12 Passi a mapiyeno sapi-sapitan ino tolayera meafu sike Demetrio anna maita iyan so aggalangwana a dumandan si kagakkuruwan. Taddammi a mapiya baggina a tolay e ammum a gakkurug ino sapi-sapitammi.
Na Panguddi a Akkidyot
13 Oddu kepay nad yo kanggamku a sapitan sikwam, udde ammek idagga sito turakku, 14 se innanamangku a ammenana mabbayag e makkainnita anna makkatetabbag etana.
15 Piya yo ana sikwam.
Kumustan dakeno kolaktam ira sitaw. Ipakumustanak pay so kolaktam ira sitan.