Na Mekadwa a Turak i
Juan
1
Ikkanak i Juan a afu-afu na minangikkurug ira.Antuweyaw yo turakku sikwam a bafay a pinili i Dios anna so anaknguwera. Gakkurug a iddukan takayu, bakkanak lamang kunsi kunnapay amminan a makaammu si kagakkuruwan 2 gumafu se yo kagakkuruwan e sigigyan sikwatam anna anana sikwatam amu-amu.
3 Idasalku sike Dios a Amatam anni Jesu Kristo Jesus a Anaknga a ibali-balinda a massimpat sikwatam, allakkanda etam anna indanda etam si piya megafu si kagakkuruwan anna idduk.
4 Naanggammannak ingke a maiteno korwan so anaknguwera a manolay si kagakkuruwan meantu so dundun i Ama sikwatam. 5 Udde sitoye, iddu-iddukangku a ina, arangngangku sikwam a makkaiddu-idduk etam amminan. Bakkan iyaw a bawu a dundun udde anen sikwatam iyaw sin palungu etam a nangurug. 6 Antuweyaw yo kanggamma sapitan ino idduk a sapi-sapitangku: manolay etam meantu si dundun ira i Dios. Antuweyaw yo dundun a nadingngag diyaw sin kepay a makkaiddu-idduk kayu si siggatatan.
7 Gumafu se nassiwarak sito talubaggan yo mangillokuwera. Ammera takkilalan a i Jesu Kristo e nattabali si tolay. Na kunna sinay a tolayera e mangilloku anna kapakwa i Kristo. 8 Mimud kayu takesi amme maawan ino nappakelammia takesi maarasoyuneno amminan a kapiyanan a netamba i Dios sikwayu.
9 Seanya yo amme makimoray so tunturu i Kristo anna managga kepay sitaw e amme nakisittata sike Dios. Udde seanya yo mangibalin a makimoray so netunturu i Kristo e nakisittata sike Dios a Amatam anna sike Anaknga a i Jesu Kristo. 10 Ammeyu arasawan so baleyu onnu padulotan nu seanya yo umang sikwayu a ammena manunturu si kagakkuruwan meafu sike Kristo, 11 se yo mangarasaw sikwana e makibulun si maral a aggangwa inay a tolay.
Na Panguddi a Akkidyot