No Yuunusa waɗiri du'aare to Joomiraaɗo
2
1 Joomiraaɗo neli liinngu mawngu moɗi Yuunusa. Yuunusa heddii nder reedu liinngu nguun nyaloomaaji tati e jemmaaji tati.Mi noddii ma Joomiraaɗo nder torraaji am,
aan du a nootake kam.
Faa ley reedu laakara ƴeewnimaami,
aan du a nani kuuɓaali am.
4 A faɗɗii kam nder ndiyam lugguɗam
faa ley reedu maayo.
Semmbeeji ndiyam piilakeno kam,
bempeƴƴe ndiyam maaɗa fuu kuuriino kam.
5 Miin miɗo miilinoo: Wo mi diiwaaɗo yeeso maaɗa.
Ammaa gite am kuccitan katin faro suudu maaɗa seniindu.
6 Ndiyam sukkii kam kine,
ndiyam lugguɗam huurii kam,
Guumooje ley ndiyam cuddii hoore am.
7 Mi yoolake faa to baamle puɗɗi,
mi kasaama to luggiɗi
hono uwaaɗo nder yanaande ni.
Ammaa aan Laamɗo Joomiraaɗo am,
a ittoyii kam nder gayka halkere.
8 Nde yonki am nesunoo dillude ndeen,
miccitimaami, aan Joomiraaɗo am.
Wooɗi du'aare am du yottake to maaɗa,
to Suudu maaɗa Seniindu nduun.
9 Jokkuɓe allaaji ɓoli,
tottitake e moƴƴere maaɗa.
10 Ammaa miin kaa, mi yimante jimi jettooji ma,
mi sakkante kirsamaaji,
mi tabintinan ko kunanimaami fuu.
Wo to Joomiraaɗo, kisindam ƴuurata!
11 Ndeen Joomiraaɗo haaldii e liinngu nguun, de ngu tuuti Yuunusa dow leydi njoorndi.