40 Wooɗiyel.
Waɗɗiino e jamaanuuji,
suka eetaaɗo hunnde.
Wooɗiyel o wi'etee.
Nyannde gom o naati ladde.
O tawi goɗɗum na tewta ko nyaama.
O ardini goɗɗummiiru ndu o hondi.
Ɓe njottinoo wuro fu,
o wi'i goɗɗummiiru ndu joodoo yaasi.
Jemma fuɗɗii jenngude faa hiraande waddaama.
Goɗɗummiiru wi'aa ɗakkoo hiirtoo.
O ɗakkii.
Ɓe fu ɓe kawriti na ɓe kiirtoo.
Ɓe fu ɓe nyaami faa ɓe kaari,
ɓe njoppidi goɗɗummiiru le'al njiiri.
O nyaami.
O nyaamidi faa o ɓiirti le'al.
Gaɗa ɗuum o hucciti Wooɗiyel o wi'i:
"Wooɗiyel mi haaray,
wooɗiyel mi haaray ya."
Ni wooɗiyel wi'i innam:
Innaa a nanii naa
Baabaa a nanii naa
Kuunga na gaɗa suudu
Kuunga ɓutta na gaɗa suudu
Na wi'a Wooɗiyel mi haaray ya.
Ni ɓe ɓotti kadde nji'e maɓɓe fu ɓe kokki goɗɗummiiru ndu.
O watti o wi'i Wooɗiyel mi haaray.
Wooɗiyel wi'i innam:
Innaa a nanii naa
Baabaa a nanii naa
Kuunga na gaɗa suudu
Kuunga ɓutta na gaɗa suudu
Na wi'a Wooɗiyel mi haaray ya.
Inniyo ndaari nano ndaari nyaamo,
walaa ko hokka.
Gaɗa inniyo o,
walaa ko hokka ni heddii o ndaari baaba Wooɗiyel.
Walaa fu no waɗee.
Ɓe njiɗaa mettinde ɓeernde ɓiiɓe.
Ɓeernde ɓiiɓe le mettan so goɗɗummiiru ndu hokkoraaka ko moɗa.
Heddii baabiyo o,
ndaari deekum,
ndaari ɓiyum.
Fay gooto e maɓɓe ɓeerdem welaa.
Walaa ko waawi welnude ɓeernde inna Wooɗiyel so wanaa nde beernde Wooɗiyel weli.
Walaa ko waawi welnude ɓeernde Wooɗiyel so wanaa nde goɗɗummiiru heɓi ko moɗa.
Baaba wooɗiyel diri ɗakkii goɗɗummiru.
Goɗɗummiiru harii baabiragel moɗi de hucciti Wooɗiyel wi'i:
"Wooɗiyel mi haaray."
Wooɗiyel hucciti innam wi'i ko woowunoo wi'ude.
Inniyo fii ɓalinngo.
Fay bokem pesaa ƴiiƴam warataa.
Jooni kaa o faamii ko goɗɗummiiru haajaa,
o yiɗaa mettinde ɓeernde ɓiiko.
Wooɗiyel watti miccintini o:
Innaa a nanii naa
Baabaa a nanii naa
Kuunga na gaɗa suudu
Kuunga ɓutta na gaɗa suudu
Na wi'a Wooɗiyel mi haaray ya.
Ni inniyo diri ɗakii.
Kuunga ɓutta moɗi ɗum.
Inna Wooɗiyel moɗaama,
baaba wooɗiyel moɗaama.
Wooɗiyel jooɗii.
Illa rimaa anndaa yeddeede,
anndaa salaneede.
Kanko won eetaaɗo inna,
eetaaɗo baaba.
Kuungaaniiwa ko woni gaɗa suudu ɗum reedum heeway.
O wi'i Wooɗiyel mi haaray.
Wooɗiyel tiggitii yooboonde suudu de wi'i:
Alla a nanii naa
Annabiijo a nanii naa
Kuunga na gaɗa suudu
Kuunga ɓutta na gaɗa suudu
Na wi'a Wooɗiyel mi haaray ya.
Heddii Alla jippini mboddi ndi luwe pemmborɗe.
Mboddi na jippoo kuungaaniiwa na moɗa ɗum.
Ba ɓoytan ni ndeera kuungaaniiwa felli.
Ko moɗanoo fu wuytii.
Inna Wooɗiyel wuytii,
baaba Wooɗiyel wuytii.
Ndelle paamee koo eeta sukam,
faa wittoo no yoniri,
na minnyana ɗum ko boni.
Raamata Bari