3 Allaahu on daali: «Yo ndaygu waɗu», ndaygu waɗi. 4 Allaahu on ndaari ngun ndaygu, tawi ɗun no moƴƴi. Ontuma Allaahu on sendindiri ndaygu ngun e niwre nden. 5 Allaahu on inni ndaygu ngun «ɲalorma», o inni niwre nden «jemma». Ɗun ko ka ɲallal aranal waɗi, onsay niɓɓi, weeti.

6 Allaahu on daali: «Yo heedaango wonu hakkunde di'e ɗen, ko sendindira ɗe.» 7 Allaahu on waɗi heedaango ko sendindira di'e wonɗe ley ɗen e wonɗe dow ɗen. Ɗun waɗiri non. 8 Allaahu on inni ngon heedaango «weeyo». Ɗun ko ka ɲallal ɗimmal waɗi, onsay niɓɓi, weeti.

9 Allaahu on daali: «Yo di'e wonɗe ka ley weeyo ɗen mooɓondir e nokkuure wootere fii no njorndi yaltitira.» Ɗun waɗiri non. 10 Allaahu on inni ndin njorndi ɗon «leydi», o inni di'e ɗen «baharu». Allaahu on ndaari ɗun, tawi ɗun no moƴƴi. 11 Onsay Allaahu on daali: «Yo leydi ndin fuɗin tutateeriiji, kuɗi rimooji awdi, e leɗɗe dariiɗe ka hoore leydi ko rima ɓiɓɓe wonduɓe e awdi, ɗe bee e noone mun.» Ɗun waɗiri non. 12 Ontuma leydi ndin fuɗini tutateeriiji, kuɗi rimooji awdi, ɗi bee e noone mun, e leɗɗe rimooje ɓiɓɓe wonduɓe e awdi, ɗe bee e noone mun. Allaahu on ndaari ɗun, tawi ɗun no moƴƴi. 13 Ɗun ko ka ɲallal tammal waɗi, onsay niɓɓi, weeti.

14 Allaahu on daali: «Yo ndayguuji wonu ka kammu, ko sendindira jemma e ɲalorma, ɗi wona maandeeji, ko andina saa'iiji ɗin e ɲalaaɗe ɗen e duuɓi ɗin, 15 yo ɗi jalbu ka kammu ko hentina aduna on.» Ɗun waɗiri non. 16 Allaahu on tagi ndayguuji ɗiɗi, njanu e tosooku, njanu ngun ardoo ɲalle ɗen, tosooku ngun ardoo jemmaaji ɗin, o watti ɗon koode ɗen. 17 Allaahu on feŋi ɗun fow ka kammu, ko hentina aduna on, 18 ko ardoo jemma e ɲalorma, sendindira ndaygu ngun e niwre nden. Allaahu on ndaari ɗun, tawi ɗun no moƴƴi. 19 Ɗun ko ka ɲallal nayaɓal waɗi, onsay niɓɓi, weeti.

20 Allaahu on daali: «Yo maaje ɗen ɗuɗɗinor ko wuuri, yo colli wiiru ka hoore leydi, taƴita weeyo ngon.» 21 Allaahu on tagi ɗee kulle njane ka nder ndiyan, e noonee kulle wuuruɗe, awƴayɗe ɗuuɗa ka nder ndiyan, ko bee e noone mun. O tagi kadi colli, ɗi bee e noone mun. Allaahu on ndaari ɗun, tawi ɗun no moƴƴi. 22 Allaahu on waɗi barki e majji, o daali: «Rimee, ɗuuɗon, hebbinon maaje ndiyan ɗen, yo colli ɗin kadi ɗuuɗu ka hoore leydi.» 23 Ɗun ko ka ɲallal jowaɓal waɗi, onsay niɓɓi, weeti.

24 Allaahu on daali: «Yo leydi ndin funtin kulle wuuruɗe, ko bee e noone mun: daabeeji e kulle daasotooɗe e kala kulle buruure, ko bee e noone mun.» Ɗun waɗiri non. 25 Allaahu on tagi kulle buruure, ɗe bee e noone mun, e daabeeji ɗin, ɗi bee e noone mun, e kala ko daasotoo ka leydi, ko bee e noone mun. Allaahu on ndaari ɗun, tawi ɗun no moƴƴi.

26 Allaahu on daali: «Tagen non aaden, waɗen mo wa nando men e sugu men, on laamoo liƴƴi ɗin ka baharu e colli ɗin ka weeyo e daabeeji ɗin, o laamoo aduna on fow, e kala ko daasotoo e ndii leydi.»

28 Allaahu on waɗi barki e maɓɓe, o daalani ɓe: «Heɓee ɓiɓɓe, ɗuuɗon, hebbinon aduna on, huɓindoɗon mo. Laamee liƴƴi ɗin ka baharu e colli ɗin ka weeyo e kala kullun ladoohun ka leydi.»

29 Allaahu on daali: «Mi okkii on kala ko tutetee waɗa awdi, kala leggal ngal ɓiɓɓe mun wondi e awdi, ɗun wona neemaaji mon. 30 Kala kulle oo aduna, kala sondu ka weeyo, kala ko ladata e ndii leydi, kala ko wondi e wonkii, mi okkii ɗun kala ko hecciɗi ko waɗa neema.» Ɗun woniri non.

31 Allaahu on ndaari ko o tagi kon fow, o tawi ɗun no moƴƴi fota. Ɗun ko ka ɲallal jeegaɓal waɗi, onsay niɓɓi, weeti.