— Mi yii on, mi yii ko mbaɗete ɗon Misira, mi fellitii ɗum ɗoo: maa mi ittu on Misira, ɗo leeptete ɗon, mi nawa on leydi Kanaana’en, Hete’en, Amore’en, Perise’en, Hiwite’en, Yebusa’en, leydi keewndi kosam e njuumiri.”
Maa ɓe keɗo haala maa. Njahaa, aan e mawɓe Isra’iila’en, to laamɗo Misira, mbiyon ɗum:
“Joomiraaɗo, Alla yimɓe Barahuuta’en, feeñanii min. Jooni noon, yamirii min yoo min njah nder jeereende balɗe tati, mbele amin mbaɗana Alla amen sadakeeji kirseteeɗi.” Mboɗo anndi, laamɗo Misira jogoraani woppude on njahon hay so waawnaama. Kono miin maa mi waawnu mo. Maa mi fortu juŋngo am, maa mi fiyru Misiranaaɓe kaawisaaji mbaadi kala ndi mbaɗoyat mi e hakkunde mumen. Caggal ɗuum, maa o woppu on njahon. Maa mi rokku ngool leñol newaare e yeeso Misiranaaɓe: so tawii oɗon njaha, on njahataa juuɗe mehe.